جددت رخصة السواقه الحمد لله كنت ناعى همها جدا
السلام عليكم ورحمة الله وبركاته
انهارده جددت رخصة السواقه الحمد لله
الاول جبت شهادة مخالفات من المرور و روحت امبارح قسم شرطة دمنهور ختمتها دق كفته وبعدين على نيابة المرور برده ختمتها دق كفته
اللى ميعرفشى يعنى ايه دق كفته دى معناها انه بيحط الختم وخلاص من غير مايبص فى حاجه يعنى روتين ابن ستين ملهوش لازمه
بعدين روحت المرور انهارده الساعه 7 ونص الصبح اشتريت شهادتين باطنه ونظر انى سليم معافى رغم ان مفيش دكتور كشف عليا طبعا لانهم بيتباعوا فى المكتبه ب45 جنيه نفسى اعرف لازمتهم ايه طيب طالما هما منظر على الفاضى
وطلعت المرور ختمت ورق من مباحث المرور برده دق كفته وده عطلنى شويه واتصورت ودفعت فى الخزنه تقريبا 60 جنيه وخدت الرخصه الحمد لله الساعه 9ونص
وماكدبشى عليكم ده يعتبر انجاز و سببه ان فيه واحد اعرفه خليته هو اللى جرى بالورق وختم وخلص وانا قاعد مكانى يادوبك قومت للتصوير واديته اللى فيه النصيب ولولا كده كنت اتلطعت لبعد الضهر وهما مروحين
طبعا انا عارف ان فيه ناس حاتهجمنى دلوقتى بس اناوجهة نظرى ان طالما ورقك سليم ومش حاتعمل حاجه غلط يبقى لو عاوز تنجز وترحم نفسك من البهدله هين قرشك ولا تهين نفسك وده الى عملته علشان انجز وقتى