تم تركيب المساعدين المونرو وقطمه الدركسيون

**hugan** · 08-09-2011 02:16 AM

النهارده الحمد لله ركبت المساعدين الجديده
كنت شاريهم في رمضان ولم يتم التركيب لاني كنت محتاج عمود دركسيون ولم يكن موجود في التوكيل
ولم اريد الشراء من اي محل لاني كنت عارف ان القطمه الجيده تم عمل تعديل لها في الوارد الجديد لمنع صوت النقر الشهيره الموجوده في الدركسيون
اشتريتها النهارده من تكنو سرفيس 2
غدا ان شاء الله موافاتكم بتقرير عن وضع العفشه واصوات النقر بعد تغيير القطمه او عمود الدركسيون زي التوكيل ما بيسميها والمساعدين الجديده ظروفها ايه مع العربيه
بعد تجربه العربيه علي طريق سريع وعلي طرق مد غدغه

**king516** · 08-09-2011 11:52 PM

النقر هو لما تلاقى طاره الدركسيون بتغربل منك جامد جدا جدا جدا جدا مع كل عين قط او طرق وعره

**hugan** · 09-09-2011 02:21 AM

الموديلات من 2010
تم تركيب علبه الدركسيون المفروض انها معدله لمنع النقر لذلك اختفي العيب في هذه الموديلات وموجود في 2006الي 2009
والنقرليس هو الغربله
الغربله هي ارتعاش الدركسيون واهتزازه في يدك علي السرعات العاليه
النقر هو تك تك تك او بمعني اصح كانك بتنقر علي قطعه خشب بصوابعك او انت حاطط بليه من اللي كنا بنلعب بيها زمان في كوبايه بلاستيك مش زجاج وعمال ترجها وبتظهر لما تكون ماشي في طريق غير ممهد او علي عين القط
نرجع لموضوعنا
النهارده صباحا من المطريه الي الزمالك
ومن الزمالك الي كارفور المعادي
ومن المعادي الي الزمالك
ومن الزمالك الي التجمع
ومن التجمع الي المطريه
تعمدت ان اذكر المناطق للحكم علي العربيه ما بين طرق عاديه وطرق مكسره في التجمع
اولا الثبات

ثبات ما شاء الله مثالي
ولا في يمين ولاشمال حتي مع الرياح الشديده في اول طريق السويس
النعومه
اختلاف شاسع عن السابق
مفيش احساس بتفاصيل الطريق زي الاول
المطبات تعدي عليها بسهوله مفيش هبد ولا رزع عيون القط مفيش احساس بيها زي الاول
كنت لما اعدي مثلا علي تقاطع فيه قضبان مترو كان فيه دربكه جامده اختفت نهائي
الجزء الاهم وهو ان كان في ايضا دربكه في الدركسيون وصوت النقر المعروف عند المشي علي الطرق المكسره
بفضل الله اختفي نهائي
تم تعليه العربيه من الخلف بمقدار 1.5 سم عن الاصلي باستبدال علايه 5سم مكان الاصليه كانت حوالي 3.5 لاني انا بحب العربيه تكون عاليه من الخلف وتكون مايله للا مام
ما بحبش العربيه تكون مستويه
معلومه اخري عرفتها من العفشجي ان سوست الهوندا تركب في الخلف لكن مش عارف اي موديل
تم تغيير كاوتشه كوبلن لانها كانت مقطوعه
لعربيه دي فعلا مشكلتها كانت في عفشتها
المساعدين اللي اتفكت تقريبا مساعدين لقيطه لا اب لها ولا ام مجهوله الماركه مش مكتوب عليها اي حاجه واظن ان هو ده السبب في ردائه عفشه العربيه
العفشجي اشتري المساعدين الامامي ب60 جنيه لانهم شغالين سواقين التاكسي بيمشوا حالهم بيهم لفتره
الموضوع غير مكلف لمن يعاني من العفشه
لكن احساسك بالعربيه بيختلف نهائي وكانك راكب عربيه تانيه
يارب اكون افدتكم

**king516** · 09-09-2011 09:15 AM

مبروووك ياهوجان وربنا يباركلك فيهم لكن ليا سؤال بسيط معلش
انا مش عايز اعلى العربيه لو بأذن الله ركبت لمساعدين دول فياترى هتبقى نفس الأستواء ولا هتعلى لوحدها ؟؟؟

**hugan** · 09-09-2011 05:58 PM

المشاركة الأصلية كتبت بواسطة fourseasons

مبروك يا عم هوجان و تدوبهم فى عرق العافية ان شاء الله.مقولتلناش المساعدين جبتهم بكام و غاز ولا زيت ولا الأتنين مع بعض و القطمة جبتها بكام؟ ياريت تظبتنا يا عم هوجان

المساعدين الامامي ال 2 ب 550
الخلفي ال 2 ب450
القطمه بالضريبه 400
معلومه اخري رحت مركز بيكين في شارع دمشق اسال عليها لقتها ب300 لكن مفاجاءه البياع فاكرني تلميذ
جايب لي واحده خلع
مخلوعه من عربيه قبل كده ومصمم انه يقنعني انها جديده
مكان تثبيت المسامير معلم في القطمه
فايريت اللي بيشتري من بكين يتاكد من قطعه الغيار

المشاركة الأصلية كتبت بواسطة king516

مبروووك ياهوجان وربنا يباركلك فيهم لكن ليا سؤال بسيط معلش

انا مش عايز اعلى العربيه لو بأذن الله ركبت لمساعدين دول فياترى هتبقى نفس الأستواء ولا هتعلى لوحدها ؟؟؟

نفس الاستواء لان مقاس المساعد ما تغيرش نفس ارتفاعه
والعلو مش باين قوي لكنه افضل من الاول

**hugan** · 10-09-2011 01:43 AM

المشاركة الأصلية كتبت بواسطة firstknight_eg

ايه يا عم ده انا توهت

عموما الف مبروك يا هوجان وسؤال بسيط، انا معايا رقم المساعدين المونروا اللي بيركبوا للتيجو، ولفيت كتير وما لقيتهمش.

تفتكر اقدر اللاقيهم فين

لابد من ذكر المشاوير علشان الحكم علي العربيه
المهم
لما سالت في معرض البيع كان موجود مساعدين ال 620
وال 516
لكن التيجو لا
لكن في الغالب اكيد هاتنزل
استناني يومين وهاعدي عليهم واسال علي مساعدين التيجو