الموضوع: "السادة توكيل السبع لقد نفذ رصيدكم"

السلام عليكم و رحمة الله و بركاته
انا لسه واصل لدهب من ساعة بالظبط لحد ما طلعت الشنط و خدت دش بس مينفعش انام قبل ما احكى على موقف غريب حصل النهارده
اتحركت من الهرم على الساعة 2 الضهر "علشان أجرب العربية فى الحر" لحد ما وصلت موبيل فى الدائرى أول طريق السويس و مسافة ما شربت القهوة لقيت التليفون رن عليا نمره غريبة "و انا عمرى ما برد على نمر غريبة؟؟؟" المهم رديت لقيت الاستاذ ياسر من مركز السبع بيكلمنى :
ايه اخبار العربية و احنا آسفين على التأخير "بصراحة راجل زوق جداً" لدرجة انى نسيت كل المشاكل اللى حصلت و التأخير اللى حصل بس قلت له انا ليا عتاب على التوكيل ليه لطعونى ساعة من غير محد يبص على العربية
لقيت الاستاذ ياسر بيغتزر جداً مع وعد بأن أول زيارة يكون فيها تغيير الزيت و الفلتر و المصنعية و الصيانة و قفيز البطارية من غير ولا مليم
و كمان حيخلى الأستاذ معتز يتصل بيا يعتزر لى و كمان حيتصل بيا الساعة 12 بالليل يطمن عليا و على العربية لما أوصل دهب.
أحرجنى جداً زوقه و أدبه و قلت له ما لوش لزوم كفايه اتصالك و زوقك مفيش فايده مُصر جداً.
قفلت معاه و مفيش خمس دقايق لقيت التليفون بيرن نمره تانيه غريبة
برد لقيت الاستاذ معتز مدير المركز بيكلمنى؟؟؟؟؟؟
"راجل زوق جداً و محترم جداً"
بعد الاعتزار و الاسف لحد ما اتكسفت جداً من زوقه و أدبه مع تأكيد ان الصيانة اللى جايه مع تغيير الزيت و الفلتر و المصنعية و قفيز البطارية بدون و لا مليم مع مقابلتى شخصياً و الاعتزار وجهاً لوجه.......
لسه الموضوع مخلصش على كده
وصلت السويس الحمد لله بس لاحظت أن الحراره بتوصل للثلاث أربع يعنى فى النص بين h و النص و تنزل للنص تانى و للأمانة انا العربية انا و عيلتى و الشنطة مليانه و مشغل التكييف المهم
وصلت ريست السويس و قلت أبص على الميه فى القربة نقصت و لا لأ
ببص عليها لقيت نفس الموضوع القديم زى ما هو
المياه بتزيد فى القربة و تنقص من الريداتير
اتصدمت صدمه كبيره و بصراحة اتحرجت أكلم أستاذ ياسر أو أستاذ معتز
سبت العربيه حوالى ربع ساعة لأن المياه الزيادة فى القربة كانت بتغلى
من كتر ما اتغميت فتحت الريداتير بعد ربع ساعة مرة واحدة قامت المياه اللى فى الريداتير انفجرت فى وشى....
الحمد لله من ستر ربنا محصلش حاجة فى وشى بس ايدى اليمين اتحرقت من المياه المغلية .... الحمد لله على كل شى
بعد الاسعافات الأولية و الحمد لله كله تمام
قمت مزود الريداتير مياه معدنيه لأن الريست مفيهوش مياه خضراء و كملت
و فى ريست ابو رديس بصيت على القربه نفس المشكلة المياه زيادة عن الماكس اللى ظابط عليه حوالى 2 سم قبل الغطاء على طول
المهم وصلت دهب بعون الله بس حالتى النفسيه زى الزفت
لسه يا دوب طلعت الشنط و بغير لقيت التليفون بيرن؟؟؟
الاستاذ معتز بيطمن عليا و على العربية
بصراحة اتكسفت اقوله على اللى حصل لولا سؤاله و إلحاحه حكيت له على اللى حصل.
لقيت رده مفاجئة بكل المقاييس و لأول مرة فى جمهورية مصر العربية حاجة كده زى الأفلام
قال لى حضرتك حتأجر عربية على حساب التوكيل و انا بكره الصبح حخلى سواق الونش يكلمك علشان توصف له مكانك فى دهب ياخد العربية تيجى التوكيل 3 أيام تتصلح و ترجع تانى؟؟؟
فضلت أتحايل على الاستاذ معتز ان عندى عربية فى الشغل بدل تأجير عربيه لحد ما دى تتصلح مفيش فايده مُصر إصرار مميت انى لازم أأجر عربيه لحد ما عربيتى تتصلح

فمقدرتش أنام قبل ما زى ما قلت الوحش قبل كده لازم أقول الكويس.