تفاصيل تغيير الكاتينة و طرمبة المياة
السلام عليكم
بعد حيرة شديدة جدا في اختيار نوع الكاتينة و السيور قررت اني اشتريهم من توكيل شيفورليه للاحتياط فقط عشان ابقي ضامن علي الاقل انه مش جايب حاجات مستعملة و حاطط ليها كرتونه جديدة
المهم المكونات كانت كالتالي :
سير كاتينة كوري جي ام اصلي
شداد كاتينة كندي جي ام اصلي
سير دينامو كوري جي ام اصلي
سير تكييف كوري جي ام اصلي
بكرة تكييف كوري جي ام اصلي
طرمبة مياه كوري جي ام اصلي
اويل سيل طرمبة مياه
فلتر بنزين كوري جي ام اصلي
فلتر هواء كوري جي ام اصلي
بوجيهات ngk في علبة جي ام و محفور عليها انها كوري و دي انا مستغرب منها لاني اعرف ان المفروض انها ياباني
فلتر زيت كوري جي ام اصلي
عديت بالمرة جبت منظرف انجكشن من محل اكسسوار
مجموع سعر قطع الغيار 920 جنية بالضريبة و منظف انجكشن ب 35 جنية و زيت باور موبيل ب 45 جنية لان الميكانيكي فك طرمبة الباور عشان يعرف يوصل لطرمبة المياه و دي برضة مستغرب منها جدا هل هو غلطان ولا ده تعقيد في تركيب العربية ؟
المشكلة اني نسيت اجيب سلوك بوجيهات لاني بصراحة كنت فاكر ان تغيرها مش ضروري بس الميكانيكي قالي لازم تغيرها عشان دي كربون و ممكن تقطع مش زي بتاعة الانسر مش بتتغير فهل كلامه صح ؟
عندي شوية ملاحظات احب اضيفها للاعضاء هنا لتبادل الاراء و المعرفة
اول حاجة : العربية كان راكب فيها سيور جيتس سير الكاتينة كان مرخي جدا جدا اول مره في حياتي اطلع سير كاتينة من عربية بالمنظر الفضيع ده بالظبط زي ما يكون مفيش شداد !!! الميكانيكي قالي ربنا ستر انه مقطعشي
تاني حاجة سير الدينامو كان جيتس برضة بس مصنوع في تايلاند و كان سيء جدا برضة
شداد الكاتينة اللي كان راكب كان بتاع اوبل و ده استفزني جدا علي الرغم من اني عارف انه مش بيفرق بس الصح صح يعني كل عربية يجي ليها حاجتها و الشداد كان طالع خشن بس مش اوي
طرمبة المياه طلعت مخرومه خرم كبير جدا جسم الطرمبة نفسة مخروم !!! و فعلا المياه كانت بتنقص في الايام الاخيرة جدا و الميكانيكي زي ما قولت فك طرمبة الباور الاول و جبنا سرنجة كبيرة الاول فضينا زيت الباور من القربة بتاعته قبل ما نفك عشان علي الاقل الزيت ميقعشي علي الارض كتير انا معايا صورتها بس مش عارف ارفهعا عشان حجمها كبير و ضغطتها وبرضة كبيرة اوي
شوية ملحوظات علي الميكانيكا بتاعة العربية :
اول حاجة تركيب الكاتينة رخم جدا بالمقارنة بالانسر
تاني حاجة فعلا زي ما الاعضاء هنا قالوا لازم تغير طرمبة المياة مع كل تغيير للكاتينة او مرة و مرة انت و طريقتك لانها بتبوظ كتير و الميكانيكي اكد ليا المعلومة دي و قالي بغيرها كتير اوي
موضوع انه يفك طرمبة الباور ده سخيف جدا جدا ده غير ان طرمبة المياة مزنوقة جدا جدا
طبعا الحاجات من التوكيل غالية شوية بس زي ما قولت علي الاقل ببقي شاري دماغي لو الفرق في المجموع 300 جنية انا اشتريت دماغي بيهم و ركبت حاجات مضمونه
الميكانيكي و هو شغال فضل يتكلم يتكلم و يقولي الفيرنا اسهل من كده و اللانوس معقدة و عمر ما طرمبة المياة ما بتبوظ في الفيرنا عمرها ما عدت عليا و نرفزني بصراحة لاني مش بحب الفيرنا دي نهائي لله في لله
حبيت بس اشارك معاكم اللي حصل و شكرا ليكم