قدامي هوندا وعايز أستفسر شوية

انا طبعا لفيت علي أهم مواضيع في القسم وفهمت كتير
بجد في كنوز موجودة
بس برضه عشان أبقي مطمن عايز أستفسر
دلوقتي العربية 92 كاملة اوتو SI مش متعدل فيها
بيقولي الموتور بتاعها حالته كويسة بس مش عارف الكود بالظبط وهي بتطلع 130 أو أكتر وهي 1600
انا أستنتجت انه d16a9
صح كدة ولا واحد تاني ؟
انا لسة ماشوفتهاش
الفتيس بتاعها هو الأوريجينال وفيه 1 و 2 و 3 و d4 وكان بيأكد عليا انه في 1و2و3
مش عارف كان قصده ايه !
مش المفروض كلهم كدة ؟
العربية فيها كوبلن شمال بيعمل صوت ... سعره كام ومنين ؟
وطبعا عايز أسأل ... قطع غيار الموتور ده والعربية كلها متوفرة ؟
وألاقيها فين وعايز كدة نماذج أسعار
تقريبا الموتور ده مفيهوش vtec
بس المواتير اللي فيها vtec زي d16z6 انا شايف انه أقل في الهورس باور
ليه بقي ؟
وأنهي أحسن
وحاجة مهمة جداااااااااا ... أستهلاك البنزين هيبقي عامل أيه ؟
معلش طولت وهتعبكوا معايا
انا كنت عايز أجيب سيفيك وصرفت نظر وأديني عايزها تاني

اولا بالنسبة لمحرك ال si الاوريجينال هو فعلا ال d16a9 بس دة خاص للسوق الشرق الاوسط

بالنسبة لمواصفات المحرك دة ان قوتة تتراوح من 130 الى 137 حصان حسب البلد اللى رايحلها وطبعا بيبقى انجيكشن و2 كامة بدون vtec

طيب نيجى بقى للمشكلة التانية وهية ان المحرك دة الفتيس بتاعة الاصلى بيبقى 2 و d3,d4 مافيهوش 1

ودة معناة حاجة من الاتنين يأما فتيس العربية دية باظ وطبعا عشان غلاء سعر الفتيس بتاعها وندرتة لان المحرك دة مافيهوش استيراد يبقى هو جاب فتيس ال 3 شجرة الخاص بالمحرك ال vtec الكامة الواحدة وطبعا الفتيس دة بطبيعتة تقيل واستجابتة ضعيفة لكن الفتيس الاصلى بتاع المحرك دة ماشاء الله علية وحش

* بالنسبة لسعر الكوبلن الخارجى بيعمل 275 جنية للواحد يابانى وهاتة nkn

* استهلاك البنزين للعربية دية ممتاز بيعمل 200 كم فى الصفيحة داخل المدينة وممكن يعدى , وخارج المدينة 320 كم للصفيحة

* بالنسبة لموضوع الهورس باور فهو مش اقل كتير يعنى حوالى 3 حصان الى 5 حصان ودة ناتج عشان المحرك بقى كامة واحدة بدل من 2 كامة وبعدين ال vtec دة مش دائم دة صمام بيفتح عند عدد لفات معينة

* الاحسن بين الماتورين طبعا الكامة الواحدة مش بحب ال2 كامة d16a9 لانة :

1- خشن فى صوتة

2- قطع غيارة قليلة , سواء استيراد او جديدة

لكن كسحب ماتور تحفة وتحملة عالى

بالنسبة للعربية قطع غيارها موجودة بوفرة جديدة واستيراد وسعرها متوسط

تسلم يا سامح :)
بتجيب من الأخر دايما :)

اقتباس:

---

المشاركة الأصلية كتبت بواسطة semsem kane

اولا بالنسبة لمحرك ال si الاوريجينال هو فعلا ال d16a9 بس دة خاص للسوق الشرق الاوسط

بالنسبة لمواصفات المحرك دة ان قوتة تتراوح من 130 الى 137 حصان حسب البلد اللى رايحلها وطبعا بيبقى انجيكشن و2 كامة بدون vtec

طيب نيجى بقى للمشكلة التانية وهية ان المحرك دة الفتيس بتاعة الاصلى بيبقى 2 و d3,d4 مافيهوش 1

ودة معناة حاجة من الاتنين يأما فتيس العربية دية باظ وطبعا عشان غلاء سعر الفتيس بتاعها وندرتة لان المحرك دة مافيهوش استيراد يبقى هو جاب فتيس ال 3 شجرة الخاص بالمحرك ال vtec الكامة الواحدة وطبعا الفتيس دة بطبيعتة تقيل واستجابتة ضعيفة لكن الفتيس الاصلى بتاع المحرك دة ماشاء الله علية وحش
الفرق شديد قوي كدة ؟
لو دايقني بقي الفتيس فيما بعد ... أجيب أنهي فتيس ؟
* بالنسبة لسعر الكوبلن الخارجى بيعمل 275 جنية للواحد يابانى وهاتة nkn
تمام
* استهلاك البنزين للعربية دية ممتاز بيعمل 200 كم فى الصفيحة داخل المدينة وممكن يعدى , وخارج المدينة 320 كم للصفيحة
حلو جدا
ده طبعا من غير قرص وشد
* بالنسبة لموضوع الهورس باور فهو مش اقل كتير يعنى حوالى 3 حصان الى 5 حصان ودة ناتج عشان المحرك بقى كامة واحدة بدل من 2 كامة وبعدين ال vtec دة مش دائم دة صمام بيفتح عند عدد لفات معينة
تمام
* الاحسن بين الماتورين طبعا الكامة الواحدة مش بحب ال2 كامة d16a9 لانة :

1- خشن فى صوتة

2- قطع غيارة قليلة , سواء استيراد او جديدة

لكن كسحب ماتور تحفة وتحملة عالى

بالنسبة للعربية قطع غيارها موجودة بوفرة جديدة واستيراد وسعرها متوسط

---

شكرا :)

انا شفت الهوندا اللي كنت قلتلك عليها يا سمسم
العربية معجبتنيش خالص ... متهانة شوية
انما شفت واحدة تانية في نفس اليوم
موتورها d15b3
فتيس أوتو بس مفيهوش 1 ... هو بادي من 2
حالتها نضيفة وماشية 140 ألف كم
التكييف معجبنيش قوي
فيها جنط سبور 13 !
الأزاز القدماني فيه شرخ بسيط
جربت الكيك داون وكل حاجة وشغالة تمام
المرايات الكهربا مش شغالة ... تتظبط أزاي ؟
الفوانيس بتاعة الأشارة منورة علي طول ... تقريبا مواصفات أمريكي
راشة برة رش نضيف وفبريكا جوة
تسوي كام بقي العربية بالحالة ده ؟
معلش طولت عليك :)

اللى فيها ماتور الكربراتير دى في الغالب Ex مش Si أسعرها مابين 38 و42 ألف للكويس
وعادى أغلب عربيات الموديل ده الفتيس بيكون فيه النقلات D4 , D3 , 2 انما في بعض المواتير المتسقطة زى الـ SiR الاتوماتيك وغيره بيكون فيه 1
موضوع الاشارة مناورة ده عادى بتتعمل وممكن يكون مغير فوانيس مش شرط العربية تكون مواصفات امريكى أو اوروبى
المرايات امرها سهل هيا والزجاج الامامى لو هتغيرهم الاتنين يعملوا في حدود 600 - 650 جنية

شكرا يا رجالة
العربية ده كمان طلع فيها خبطة في القايم ومكنتش شايفها كويس وكشفتها قبل البيع بيوم زانا كنت بتناقش معاه
دلوقتي انا مش لاقي عربية
حيرة :(

ربنا ييسر الحال وتلاقى حاجة كويسة

اقتباس:

---

المشاركة الأصلية كتبت بواسطة ahmedabeed

ربنا ييسر الحال وتلاقى حاجة كويسة

---

شكرا :)

عموما يا ريس انا فى واحد معرفة كان جايب واحدة امريكى مكنة فيتيك سودة 1500 سى سى و كراسى امريكى الى هى بتبقا بمخدع واحد من الجنب الراس بتعتها بتبا بحامل واحد من الجنب كده كراسى محترمة و جامدة جدا و العربية كاملة فتحت سقف و كان واقفة عليه ب 41.5 و صرف عليها الف و نص بعد كده صينات و غير سبيكى اورجنال من غير خرط و تقريبا سمبر و العربية كانت زى الفل و كلو تمام

ا لا مريكي دي قطع غيارها متوفرة