لانسر شارك خليجي من الكويت 2010
gls لون أسود
كاملة ماعدا السبويلر و فتحة السقفة ، جنوط 16 ن فيتيس أوتو عادي مش استب ترونيك..
المكان : الطريق الزراعي القاهرة اسكندرية
المسافة : 6 كيلو على السريع ، و كيلو و نص جوه البلد ( طنطا )
الوقت : الساعة 10 بالليل - يوم 7 سبتمبر 2011
الشكل : الخارجي ممتاز طبعا ، الداخلي جميل برضه مع الكاسيت الجديد و الطاره المالتي و العدادات و شاشة المعلومات ، و الخامات الداخلية أنا شايفها جيده جدا عكس الكلام اللي سمعته ، و التقفيل كمان جيدجدا.
الاتساع : واسعة من الداخل فعلا ، و أنا لو قارنتها بالبومه ( عربيتي ) تقريبا مافيش فرق.
التكييف : مرعب بمعنى الكلمة .. على أول درجة منه ممكن يجيلك برد بعد 3 ثواني من تشغيله.
الكماليات : متوسطة المستوى .... يعني كان المفروض يكون فيه وحدة رفع و مرايات ضم أقل واجب ، و ياريت لو تحكم في الفوانيس أو خاصية فولو مي للفوانيس أو حتى تكون الكراسي التحكم فيها كهربي أو شاشة تاتش .... كل ده مش موجود .
الصاج الخارجي : برضه متوسط ... أنا رأيي إن الكورولا صاجها أقوى نسبيا من الشارك .. لكنه جيد و ممكن يكون هو ده اللي وزنه مناسب للعربية .... لكن كلنا عارفين إن كل إصدارات اللانسر بيكون فيها حماية عالية للمفصورة و عضم قوي للشاسيه.. بس برضه كنت أتمنى على الأقل أحس إن الصاج زي الكورولا.
الدهان : متوسط المستوى .. لو قارنها بالسيفيك أو المازدا الجديده نلاقي إن نوعيه الدهان نفسها بتاعت السيفيك و المازدا خامة أعلى .
راحة السائق : الإضائة على الطريق قوية و مناسبة جدا ، ارتفاع عن الأرض مناسب أيضا لحساب المسافات بطريقة جيده ، باور ممتاز جدا جدا في كل شيء و أمان على الطريق أيضا ، التصميم نسبيا تلافوا فيه عيب إن القائم اليمين يحجب الرؤية نسبيا عن البومه و دي ميزه كويسه ن دواسات طرية ، عدادات واضحة و فيتيس مريح في التعامل ، يمكن الكاسيت بعيد شوية بالتالي لازم تستخدم المالتي لكن في حالة حبيت تغير الاسطوانه هتتعب شوية و ده عيب بالنسبة لطوال القامة ( اللي بالمناسبة أنا مش منهم ).
تعالوا نتكلم عن العربية على الطريق بقى ...........................
السحب : جيد جدا ... على السرعات القليلة كويس أوي بس البومه بصراحه لحد الـ 80 تكسب .. لكن على السرعات العالية بجد تجميع سرعة وهمي بمعنى الكلمة ... يعني أنا جيب بيها 180 في مسافة أقل من كيلو و نص ... كبسة البنزين بعد الـ 100 دي بجد قوية جدا على غير عادة البومه .. أعتقد إن الشارك تكسب الكورولا في السحب على طول الخط حسب تجربي للعربيتين.... و ماننساش إن عيب التكييف مازااااااااال قاااائم .... التكييف بيأثر على السحب فعلا .. و عموما ده موجود في أغلب العربيات الياباني و في كل العربيات الكوري إجمالا.
الثبات : راااااااااااااااااااائع بمعنى الكلمة و اللي يقول عكس كده يبقى ماجربش العربية دي .... أنا كنت سايق على 170 - 160 و أنا باخد كيرف على الطريق السريع و أنا مش واخد بالي إن السرعة عالية كده ، و على 180 كان فيه حته مكسره على الطريق و أنا كنت ساعتها بنقل من حارة لحارة و العربية خدتها مرتاحه جدا جدا جدا.. و غرز على الـ 160 ولا في الدماغ.. ماعتقدش إن فرق الثبات بين الكورولا و الشارك كبير ... لكن اللي أنا متأكد منه عن تجربة إن فرق الثبات بين الشارك و أي عربية كوري كبييييييييييييييييير.
الفرامل : جيده جدا ... حاول أكبس فرامل و أنا على سرعة عالية قاصد أجرب الآي بي إس .. جميله .. تسعفك في مواقف كتير رخمه فعلا ، و صعب العربية تزحف منك.
راحة الراكبين : أحسن شوية من البومه ، لكن مازالت الكورولا تتفوق في راحة الراكبين خصوصا في الكنبة الخلفية.
نظام التعليق الخلفي : طبعا كلنا عارفين إنه مالتي لينك بس غير مستقل .. أنا حسيته و أنا طالع و نازل الكبري على الفواصل بتاعت الكبري خصوصا إنه كبري رخم جدا ، و كمان على المطبات الخفيفة و المنحنيات ... أنا شايف إنه كويس و ملائم و زون العربية مساعد جدا إن العربية تبقى متزنه.
أنا شايف إن العربية دي مقارنة بالعربيات اللي في نفس الفئة السعرية تاخد 8 من 10 يا جماعة.
بجد عربية كويسه جدا جدا و بتدي الواحد ثقة عالية جدا على الطريق و بيكون متحكم فيها كويس ، الإحساس بالأمان فيها عالي ( خصوصا عن البومه اللي أنا متعود عليها )..ينقصها الكماليات.
المفضلات