الموضوع: تنظيف سربنتينة التكييف الداخلية فى اللانوس

طبعا مع فصل الصيف و عدم وجود فلتر تكييف فى عربياتنا الجميلة... اصبح من الضرورى القيام بالموضوع دة... انا كنت بالفعل عملتة قبل كدة بس فى عربية الوالد و من سنين طويلة... ايامها مكنش فيه نايل موتورز اصلا فا مكتبتش عنة حاجة

دلوقتى فيه نايل موتورز و فيه عربية تانية محتاجة تنضيف... قولت اضبط نفسى يوم الخميس الصبح اروح اكشف على التكييف عشان مش بيسقع و اول لما ارجع ابدا الشغل و قد كان...

بدات حوالى الساعة 12 الضهر و متوقع الشغلة متاخدش وقت طويل بما انى عملتها قبل كدة... لكن تاتى الرياح بما لا تشتهى السفن

اول حاجة طبعا فكيت الكرسى اللى جنب السواق عشان فاضى مساحة للتعامل مع التكييف... و فكيت الفبرة اللى فوق العتب و الفبرة اللى بتغطى الكونترول و الكونترول نفسة عشان ميجيش علية مية ولا اى وساخة و كدة و طبعا فكيت درج التابلوة عشان يدينى مساحة اشوف بعض المسامير و كمان شوية اضائة

دخلت زى الشاطر فى ىالعربية بضهرى عشان انام تحت التكييف... و اكتشفت فى اللحظة دى انا فقدت قد ايه من لياقتى البدنية و تخنت قد ايه... انا حسيت انى دبة بتحاول تدخل قفص عصافير... لا عارف الف بجنبى ولا عارف اعدى رجلى من الباب ولا عارف اعمل اى حاجة... المهم بعد عناء بضبطت نفسى على الوضع الصحيح و فكيت المروحة فى السريع و الكام مسمار اللى على الطرف الخارجى (ناحية درج التابلوة) و فية مسمارين من الجنب مش بيبانوا الا لما يتفك الفبرة اللى فى جنب التابلوة... المهم يعنى ان كل دى كانت حاجات سهلة ماخدتش تلت ساعة

جينا بقى للمسامير المقرفة اللى فى الضهر... فيه حوالى تلاتة فى الداير اللى بتركب فيه المروحة و دول وصلت ليهم بدون مشاكل عشان كنت بحسس بايدى الاول عشان اعرف اماكنهم و افكهم... و انا بفك معلمتش فين مكان المسامير زى ما طارق باشا قال... حنشوف بعد شوية ليه الموضوع دة مهم

جينا بقى لاصعب مسمارين اللى هما محشورين ناحية صدر العربية... انا طبعا عاصرت المسمارين دول قبل كدة و عارف انهم محتاجين وصلة مرنة عشان الواحد يعرف يوصل ليهم... المهم رحت لعلبة اللقم اللى فيها الوصلة و فتحتها و كانت المفاجئة.... الوصلة مش موجودة ولا اللقمة ال7... فى اللحظة دى افتكرت انى كنت مسلف الوصلة و اللقمة لاكرم و لما رجعهم ليا مرجعتهمش مكانهم....

طبعا صباح الاهمال منى بس دة مش وقت تانيب ضمير... فضلت ادور على الشنطة اللى فيها الوصلة فى شنطة العربية و شنطة العدة و درج التابلوة... مفيش فايدة... طيب دلوقتى انا فكيت كل حاجة وواقف على المسمارين دول... اكيد مش حرجع اقفل كل حاجة تانى و يبقى المجهود دة ضاع على الفاضى... و فى فسس الوقت انا عارف ان الموضوع مش سهل خالص و كلة عذاب... المهم توكل على الله و قول ححاول و زى ما تيجى تيجى

المشكلة الحقيقية كانت فى اللباد اللى مبطن الارضية وواخد مساحة كبيرة من الحتة اللى المفروض المفك يبقى فيها عشان يوصل للمسمار... حاولت اشيل اللباد بس كان قافش مكانة... مش عارف هو ملزوق ولا محشور ورا التكييف... المهم شديتة جامد فا قطعت منة حتة... قلت اكمل بقى قطع لحد ما اوسع حتة تكفى المفك... صحيح انا مبحبش ابوظ حاجة فى العربية بس مبحبش الفشل اكتر من البوظان

دفست المفك على قد ما اقدر و حاولت الف لحد ما المسمار اتفك... دخلت على التانى بنفس الطريقة و الحمد لله اتفك... طبعا حمدت ربنا انى قدرت اوصل للنتيجة دى من غير اى ادوات خاصة خصوصا انى عارف انة صعب جدا جدا فك العلبة دى من غير الوصلة المرنة

اخراج العلبة من مكانها كان مقرف شوية لانها شبة مزنوقة فى كذا حاجة و محتاجة شوية صبر... اول ما طلعت من مكانها كان المنظر هااااايل:





دى المنطقة اللى بيبقى الهوا فيها خارج من المروحة و داخل على السربنتينة:



و دى المنطقة اللى موتور المروحة بيسحب منها هوا بارد لتبريد الموتور نفسة بنتع المروحة:



طبعا ملاحظ ان ورق الشجر و الطين لسة مندى... دة بعد اغلاق التكييف باكتر من ساعة و نص... و دة السبب فى ريحة العطانة اول ما نشغل التكييف مرة تانية:



دة بقى شكل السربنتينة:



زبالة السنين:





صباح العفن:





طبعا بعد الصور دى مش محتاجين نقول ليه تكييفات العربية دى كفائتها مش قد كدة ولا لية بتطلع ريحة ولا لية الفايظ بيتسد... كل دة بسبب الباشا اللى فكر ان عدم وجود فلتر تكييف فى العربية حاجة لطيفة (ربنا ينتقم منك يا شيخ)

اول حاجة نضفتها هى العلبة الفبر... نفضتها على الرصيف و ديتها مية و شوية دعك خفيف بقت زى الفل و الحمد لله:



المهم بقى تنظيف السربنتينة... طبعا انا لا كان معايا منظف مخصوص ولا رشاشة اوتوماتك... مكنش معاية غير زجاجة جلانس فاضية و قلت انه حتؤدى الغرض... بس اكتشفت انها ضعيفة جدا و معملتش اى حاجة لان التراب و الوساخة مدفونة بين ريش السربنتينة و محتاجة ضغط عالى عشان تطلع... طبعا مينفعش استعمل خرطوم مية بضغط عالى فى حتة زى كدة ولا اقدر اجيب كومبريسور هوا جنبى ولا اى حاجة.... طيب اية الحل؟؟؟

فكرت فى فكرة مجنونة شوية و هى انى استعمل علبة منظف المنافولد كبديل... الفكرة هنا ان المنظف بيطلع باندفاع كبير جدا من العلبة و كمان هو اصلا منظف و الاهم انة بيتبخر بسرعة فا مش حيظروت الدنيا فا قررت استعملة... الحقيقة هو كان بيجيب نتيجة هايلة و انا شغال بية... بس طبعا انا مكنتش واخد خوانة انة بيخنق بالشكل الفظيع دة الا لما جيت اخد نفس و شميت دفعة محترمة منة دخلت على نخاشيشى مباشرتا... انا حسيت ان حد دلق جردل تلج على المخ... طبعا خرجت برة العربية عشان اعرف اتنفس تانى لانى كنت شبة مخنوق... و بعد شوية كملت بس برضة شوية من السراى جم جنب عينى فا حرقتنى جدا... و انا خارج المرة دى دماغى رشقت فى الفبرة اللى راكب فيها الكنترول و فتحت قورتى

خرجت برة العربية عشان اتنفس زى الناس و مسحت دماغى و عاينت السربنتينة عشان اعرف نضفت ولا لا... و دة كان المنظر:







الفرق واضح و النتيجة هايلة و تستاهل كل التعب و المجهود... انا مكنش عندى وقت اصبر لما الدنيا تنشف فا نشفتها بفوطة كدة على الطاير و شكرا للتحية... مهى السربنتينة كدة كدة بيتكثف عليها مية من التشغيل و مش بيجرالها حاجة

المهم بدات عملية التركيب و طبعا بدات بالمسمارين اياهم عشان اكون فايق ليهم من البداية و كملت تركيب باقى المسامير لحد ما وصلت لمسامير الداير اللى ورا...انا طبعا قولت انى معلمتش مكان المسامير لانى بحسس و اعرف فين مكان كل مسمار و بتعامل... لكن فى الحتة دى فيه مسمار طلع عين اهلى... مش عايز المسمار يخش مكانة ابدا ابدا.... غيرت وضعى تحت التكييف و اسمعملت اكتر من مفك و استعملت ايدى الشمال مرة و اليمين مرة ابدا... و دة كان اخر مسمار و مش طالبة اخل الشغلة و اسيب مسمار مش راكب مكانة... بس انا مش فاهم لية مش عايز يركب... فيه ايه غلط؟؟؟

اخر ما زهقت قولت اصور المسمار بالموبايل عشان اشوف ايه المشكلة... مهو انا مش شايف حاجة و مقضيها تحسيس (و لامؤاخذة) بس واضح ان الموضوع دة مش نافع... المهم دخلت الموبايل فى الحتة دى و لقطت صورة و كانت المفاجئة.... انا بشتغل نفسى:



الحتة دى مفيش فيها مسمار اصلا... دى مجرد ذنبة عشان تثبيت العلبة على الوضع الصح... طبعا باين فى الصورة ان فيه مسمار فى الشمال لكن اليمين مفيش حاجة و كمان مفيش اصلا خرم لدخول مسمار... انمل و انت بتحسس بتبقى حاسس بفتحة للمسمار لكن مش عارف ان فية جوة الفتحة ذنبة

المهم نفضت للحتة دى خالص و قعدت افتكر فين اماكن المسامير اللى فكيتها لان كدة فية مسمار فاضل لحد ما افتكرت انة مسمار راكب فى حتة مزنوقة كدة على الجنب و لازم المفك يعدى من فتحة فى العلبة الفبر عشان يوصلة

بعد تقفيل العلبة ركبت المروحة و الفيش بتاعتها و ضبطت اللباد و الموكيت و ركبت الكونترول و بعدة الفبر بتاعة و بتاع العتب و ركبت الكرسى و الدرج و كل حاجة رجعت زى ما كانت تمام

انا مجربتش التكييف تجربة قوية بعد التنظيف لكن التجربة الاولية اللى عملتها كانت كويسة... التكييف فعلا ساقع و لما تجيب المروحة على 1 بتحس ان فيه هوا طالع من فتحات التكييف... كان الاول ولا اكنك عامل حاجة اصلا

اخيرا اللى عايز يجرب القصة دى لازم يبقى عندة صبر و لياقة بدنية

MMamdouh

كان نفسي اكون اول المهنئين علي هذا العمل
الف سلامة علي رائس سيادتك وعايزنها سليمة لينا علاطول
السربنتينه مكانتش متسخة اوي بس هناك فرق كبير بين قبل وبعد
ربنا يباركلك فيه
بدل الوصلة المرنة ممكن اي طقم سنتريت بيد صغيرة فعال اكثر مع المسمارين الي امام صدر العربية
الفرش اللباد بيبقي فيه مسمار تقريبا في حوص السيارة بيبقي رابط فيه علشان كدا بيتقطع عند محاولة انزاله بالعنف