الموضوع: الديسك ولا الاسطوانه؟؟؟!

المشاركة الأصلية كتبت بواسطة msami

انا فعلا لقيت سلك الدبرياج هوا اللي مش مظبوط
و واحد ربنا يكرمه في الحرفين قاللي دا السلك و عملو و مرضاش ياخد فلوس
اما الزرجينه فانا عملتها بس عايز اعرف اضرارها ايه
و معلش اخر حاجه هو ايه سلك الدبرياج الاوتماتيك ده؟
علشان الراجل قاللي احسن غير السلك و ركب واحد اوتماتك

الحمد لله ان مشكلتك اتحلت بدون مصاريف و للأسف كانت هتكون علي الفاضي و بسبب تفسير خطأ للمشكلة من ميكانيكي مش فاهم

بخصوص موضوع الزرجينة فده بيتعمل عن طريق استخدام بستم ضغط زيت و بيثبته بين فردة الشاسيه و مكان تثبيت الفردة و البستم بيضغط علي أجزاء العفشة فيما بينهم لحد ميفتحلك القيمة اللي تضبط وضع العجل في المكان الصحيح اللي يخليه قائم عمودي علي الأرض بدون ميل

المهم ان أضرار الزرجينة هو انها بتأثر علي أجزاء العفشة لكن أي جزء بالضبط مش عارف لأنها دائما تؤثر علي أضعف جزء في المنطقة اللي حصل عليها الضغط دي (ما بين فردة الشاسيه و شمعدان العجل ) و طبعا الكلام ده غلط تماما لأن الصح انك تضبط العجل بالرجلاش الموجود و اللي للأسف معظم اللي بيشتغلو في العربيات ميعرفوش عن الرجلاش شيء

بخصوص موضوع السلك الأوتوماتيك فده عبارة عن سلك دبرياج بيضبط نفسه بنفسه انت فقط بتركبه و تضبطه في الوضع الصحيح لأول مرة وهو بعد كده لما بيحصل تأكل في الديسك و الاسطوانة هو بيضبط نفسه علي نفس الوضع اللي اتظبط عليه أول مرة و من وجهة نظري انه فكرة ممتازة ولكن ممكن استخدام السلك العادي (اللي بيترجلش يدوي ) و ظبطه صح و خلاص لأنه بيؤدي نفس الغرض و لأن قيمة التأكل في الديسك و الاسطوانة مش مؤثر قوي علي وضع الدبرياج و كمان السلك الاتوماتيك غالي قوي يعني تقريبا ثلاثة أضعاف السلك العادي

فرأيي تركب العادي و خلاص و تخلي اللي يركبه يظبطهولك صح و خلاص و تشتري نوع كويس ألماني او ايطالي مثلا عشان يعيش معاك ولما تشتريه و انت بتركبه تشحم أطرافه فقط و متحطش زيت داخل الجراب الخاص بيه لأنه ده غلط جدا (للأسف معظم الميكانيكية بيعملو كده ) و بيؤدي لتأكل غلاف البلاستيك اللي علي السلك و كذلك تأكل غلاف البلاستيك المغطي للجراب من الداخل

و بالتوفيق ان شاء الله