محتار بين الفيرنا و النيو اكسنت

**eslamanwar** · 10-09-2011 09:59 PM

السلام عليكم

يا جماعة انا محتار جدا بين الفيرنا و النيو اكسنت . انا بفكر فى حاجة فيهم هاجيبها مستعملة و مانيوال فى حدود 45 - 50.
فى ناس بتقول ان الاكسنت 2005 و 2006 فى مشكلة فى الباور عشان كهرباء
و ان الفيرنا ثباتها مش حلو

ارجو الافادة علشان انا بعت عربيتى و محتاج عربية

شكرا

**mpop** · 11-09-2011 01:28 PM

مش عارف ايه حكاية الثبات مع الفيرنا ! انا جايبها 2012 وطلعت بيها على 170 وكمان كنت ماشي متوسط الطريق على 140-160 !! وكنت هزود بس قلت كده حلو وكنت باخد بيها غرز والعربية ما شاء الله ثابتة بعد ال 120 بتحس بغربلة بسيطة جدا ممكن كمان ماتخدش بالك منها بتروح بعد 140 وكمان كله ده ولا جنط ولا تغيير كاوتش ده ال Standard بتاع العربية ............. شوف انت ايه اللي اريحلك وتوكل على الله
وفي المستعمل اهم حاجة حالة العربية
واسمحلي في اقتراح حط 50-45 مقدم عربية وهات زيرو
لان مثلا لو 10 عايزين يبعيو عربيتهم 2 فقط اللي هيغيروها تجديد انما الباقي يبقى في عيب وماعرفوش يصلحوه ( مجرد وجهة نظر شخصية )
وربنا يوفقك ان شاء الله

**eslamanwar** · 11-09-2011 02:02 PM

متشكر جدا بس انا للاسف مش هقدر على التقسيط . بس معلش ليا سؤال عندك هو موديل السنة هيفرق فى الفيرنا يعنى فى فرق مثلا بين 2004 و 5 و6 ولا كلهم زى بعض و انى احسن الاوتوماتك ولا المانيوال ؟؟

**mpop** · 11-09-2011 02:08 PM

بص على حسب معلوماتي لحد 2004 ده الكوري المستورد يعني بعد كده تقفيل مصري وكمان الفيرنا مافيش فيها حاجة بتتغير بس يقال ان من مودويل 2010 رفعو علبة الشكمان بحيث انها ما بقتش تحك في المطبات

والفيفا تقفيل هندي بس ما انتشرتش زي العادية

وبرضه سمعت معلومة مش متاكد منها ان فتيس الاوتامتيك بتاع الفيرنا هو اللي في الالنترا والجيتز
حتة مانيوال ولا اوتامتيك ما اقدرش افتي فيها انا جايبها مانيوال والعربية ماشاء الله جميلة
ان شاء الله ربنا يوفقك للي فيه الخير

**mmww** · 11-09-2011 02:20 PM

النيو اكسنت افضل كمتور وكخامة وجودة تقفيل كوري وثبات

**samyomar** · 11-09-2011 03:23 PM

اذا تساوت الحاله فى العربيتين يبقى النيو اكسنت افضل من الفيرنا و ذلك للاتى
- موتور الاكسنت تكنولوجيا اعلى
- بحس انها امتن و صاجها اجمد من الفيرنا
- شكلها ارقى و افخم
- صالون شيك و تابلوه مميز يشبه تابلوه الالنترا
بالنسبه للثبات الاتنين بعد ال 120 الثبات بيقل شويه لانهم عربيات مدينه مش مصممه للسفر و الجرى
لا تنسى الاستخاره

**AutoTycoon** · 11-09-2011 04:02 PM

المشاركة الأصلية كتبت بواسطة mpop

مش عارف ايه حكاية الثبات مع الفيرنا ! انا جايبها 2012 وطلعت بيها على 170 وكمان كنت ماشي متوسط الطريق على 140-160 !! وكنت هزود بس قلت كده حلو وكنت باخد بيها غرز والعربية ما شاء الله ثابتة بعد ال 120 بتحس بغربلة بسيطة جدا ممكن كمان ماتخدش بالك منها بتروح بعد 140 وكمان كله ده ولا جنط ولا تغيير كاوتش ده ال Standard بتاع العربية ............. شوف انت ايه اللي اريحلك وتوكل على الله
وفي المستعمل اهم حاجة حالة العربية
واسمحلي في اقتراح حط 50-45 مقدم عربية وهات زيرو
لان مثلا لو 10 عايزين يبعيو عربيتهم 2 فقط اللي هيغيروها تجديد انما الباقي يبقى في عيب وماعرفوش يصلحوه ( مجرد وجهة نظر شخصية )
وربنا يوفقك ان شاء الله

يا راجل حرام عليك بجد انا بجنط 15 و كواتش عرض 195 و بعد ال120 بقلق منها و مش بكون حاسس بالطريق

الفيرنا عربية حلوة جداً للي متغريهوش في الجري و كدا

**eslamanwar** · 11-09-2011 04:37 PM

متشكر جدا لردودكم السريعة و المفيدة جدا. انا بدات اميل فعلا للنيو اكسنت. بس انا لقيت فى 1300 و 1500 سى سى. فهل الفرق كبير و ملحوظ بين الاثنين يعنى السحب مع التكيف هيتاثر بشدة فى ال 1300 ؟؟

**meshmesh_egypt** · 11-09-2011 11:06 PM

مفيش مجال للمقارنة
الفيرنا فئه اقل من النيو اكسنت
بص على الفرنا وكمية العربيات منها الى ماشية فى الشارع وماتورها فوووت ومطلع دخنه وبص على النيو اكسنت مش هتلافى منها ولا عربيه مدخنه لان ماتورها متطور جدا جدا وكفاءته عاليه انما الفرنا هى اكسنت 2003 وليس بها اى تطور تكنولوجى
وليس هذا معناه ان النيو اكسنت مالهاش عيوب ولكنها افضل من الفيرنا بكل المقياس لانها متطوره فى كل شىء
ولكن اكشف على قطمة الدريكسيون الكهرباء كويس عشان كان مشاكله كتير وسعر تغيره غالى جدا وعشان كده غيروه من اول موديل 2008 او2009 على ما اعتقد وخلوه باور زيت

**meshmesh_egypt** · 11-09-2011 11:07 PM

المشاركة الأصلية كتبت بواسطة eslamanwar

متشكر جدا لردودكم السريعة و المفيدة جدا. انا بدات اميل فعلا للنيو اكسنت. بس انا لقيت فى 1300 و 1500 سى سى. فهل الفرق كبير و ملحوظ بين الاثنين يعنى السحب مع التكيف هيتاثر بشدة فى ال 1300 ؟؟

مفيش نيو اكسنت 1300 او 1500
موديل 2006 و2007 كان 1400 و 1600 cvvt