المشاركة الأصلية كتبت بواسطة smsmxxxxxx
انا هفهمك
الموتور علشان يشتغل محتاج خليط من الهواء والبنزين بنسب معينة ودا اللى بيحددهم الكاربراتير
ولازم طبعا يحصل اشتعال للخليط ده عن طريق البوجيهات
ولازم الفولت اللى داخل للبوجيهات يكون عالى ( من 15000 الى 20000) فولت مش فاكر بالظبط
وفولت بطارية العربية 12 بس فكدة لازم حاجة ترفع الفولت
ودى وظيفة البوبينة وهى عبارة عن محول كهربائي رافع
بس علشان البوبينة تتطلع الفولت ده لازم نوصلها ال 12 فولت بتوع البطارية فى توقيت معين ونرجع نفصل عنها التيار تاني
واللى بيقوم بالمهمة دى هو الابلتين اللى هو عبارة عن مفتاح تلامس اقرب شبه ليه جرس الباب
بتدوس عليه يوصل تيار تسيبه يفصل لوحده
طيب الابلتين ده ايه اللى بيشغله (اللي بيضغط عليه علشان يوصل)
اللى بيعمل ده هو الاسبراتير عن طريق بروز حديد فيه لما بيلف بيخللي الابلتين يفتح ويقفل فى توقيت محدد
وفى نفس الوقت الاسبراتير بيوزع الفولت العالى بتاع البوبينة على الاربع بوجيهات فى توقيتات محددة
طيب وظيفة الكوندنسر ايه ومحتاجينه ليه
نرجع تانى للابلتين لما الاسبراتير بيلف بيوصل الابلتين و بيفصله الاف المرات فى الدقيقة
يعتى بسرعة جدا ودا بيولد شرارة كهربائية بين نقط تلامس الابلتين
تخليه يسخن ويلدع يعنى الاطراف تلزق فى بعض
فعلشان دا ميحصلش وصلوا الكوندنسر مع الابلتين علشان يمتص الشرارة دى ويحمي الابلتين
فالمشكلة اللى حصلت معاك ان الكوندنسر اللى ركبته طلع بايظ
فبالتالى الابلتين بيروح لادع والعربية تقف منك
يقوم ييجي الميكانيكي يصنفر الابلتين ويغيرلك الكوندنسر تقوم العربية تشتغل
بس المشكلة ان كل الابلتين والكوندنسر مش مضمونين
علشان كدة قلنالك ريح نفسك وركب الاشعال الالكترونى
هيريحك من كل وجع القلب ده
اما الكاربراتير اللى عايز يتغير فدا متغيروش غير لما كذا ميكانيكي يبص عليه
واصبر شوية متزهقش
انا من سنتين كنت زيك كدة بالظبط ولولا الاخوة هنا ساعدونى انا كنت ولعت فى العربية من كتر ما كنت متدايق
فانتا معلش عايزك تعمل بحث بكلمة بيتلز فى المنتدى وتقرا كل المواضيع علشان تاخد فكرة وتعرف ان كان فى ناس مشاكلهم كانت اكبر من كدة بكتير واتحلت