حادث فظيع بعربيتي الشارك..الحمد لله
الحمد لله قدر الله وما شاء فعل وانا راجع للبيت امبارح في طريق حارة واحدة رايح جاي كنت ماشي بالعربية بسرعة 80 وكان الطريق فاضي جيت اعدي عربية اوبل استرا وفجأة ظهر نور عربية ماكنش ليها اي اضاءة اطلاقا من بعيد ..العربية ماشية من غير نور خالص وفجأة ضرب نور عالي في وشي وانا كنت بعدي العربية الاوبل.. وعشان اتفاديه دوست فرامل عالاخر مع كسر الدريكسيون يمين فخبطت الاسترا من ورا لقيت عربيتي وقفت مكانها والاسترا زحفت مسافة كبيره وفي الاخر العربية اتقلبت بالكامل فالهواء ونزلت علي ضهرها في ترعة المنظر لوحده يخلي الواحد متاكد 100000 المية ان اللي جوا العربية مات في لحظتها ولكن قضاء الله اراد بهم عمر تاني والاصابات كانت خفيفة جدا وستر ربنا مع الواحد كان كبير جدا جدا نزلت من عربيتي والناس اتلمت وطلعوا واحد ومراته من العربية بعد ما كانوا علي بعد لحظات من الموت غرقا والحمد لله مكنش حصلهم حاجة وتكفلت انا باصلاح الاوبل لان العربية فعلا اتدمرت اما عربيتي فمحتاجة اكصدام ورفرف وفانوس
عين الناس وحشة جدا جدا وقبليها واحد بيقولي بس انت كده راكب عربية مفهاش غلطة وانا بحسدك عليها لسه كنت صارف عالعربية ومعدلها لجي تي ومكملتش معايا حاجة ويحصل اللي حصل بس في الاخر بقول الحمد لله انها جت فالعربيات ومكانش في اي خسائر ادمية
والاغرب ان العربية اللي كانت جاية مقابل موقفش حتي ولا عبرنا كمل علطول عربيته ماشية من غير اضاءة ولا يفكر يرعش ولا اي حاجة بس انا شيلت الليلة لنفسي وانا غلطان بنسبة كبيرة في الي حصل بس قدر الله وما شاء فعل
ياريت كل واحد يمشي براحته ويتفادي خطء الغير كمية حوادث رهيبة وربنا يسترها معانا جميعا