سلوكيات القيادة المصرية الزفت ... زهقت

**Seifmando** · 12-09-2011 12:24 PM

المشاركة الأصلية كتبت بواسطة prisoner

ناس كتيرة كده واحب اقولك انى واحد منهم سواقتى على حسب المود والاغنية اللى شغالة كمان بس حصللى موقف وحش جدا وربنا سترها معايا انى كنت هاخبط بنى ادم ماشى على الارض ودى كارثة فى حد ذاتها ده غير الحوادث اللى الواحد شافها بعينه من الغرز وسواقين ممتازين لانها ملهاش كبير خالص وربنا يستر طريقنا وانا قعدت اقوم نفسى فترة كبيرة وقدرت انى اسوق سواقة ادمية واتمنيت ان كل واحد يعمل زى هانبقى كويسين وفى الاخر الغرز اللى احنا بنعملها مش هناخد بيها جوايز ولا تقييم من حد بل بالعكس هاتبقى فى ميزان سيئاتنا اللهم احفظنا وابعد عننا السيءات اجمعين تقبل مرورى تحياتى

نورتنى يا فندم
وعقبالنا كلنا يارب

**Mohamed_Rashad** · 12-09-2011 12:29 PM

لقد أسمعت لو ناديت حيا
ولكن لا حياة لمن تنادي
ولو نار نفخت بها أضاءت
ولكن أنت تنفخ في رماد

**A_H_M_A_D** · 12-09-2011 01:25 PM

مع إحترامي ليك , ولكلامك اللي كله صح و كلنا بنعيشه كل يوم

بس حضرتك محتاج تكبر دماغك مع اللي بيحصل يوميا , أنا أول ماسوقت زمان كنت باتنرفز من أقل حاجه و أزعق و أشتم كمان

بعد كده لقيت إني أنا اللي خسران في الموضوع كله , باحرق أعصابي و اللي قدامي و لا الهوا , دلوقتي إتعلمت أحط أعصابي في تلاجه و أنا سايق , وأشغل الاوتو بايلوت بتاعي و لا كأني باتفرج على فيلم فيديو

واللي عايز يعمل حاجه يعملها , طالما مخبطنيش خلاص براحته , يعمل اللي هو عايزه , وبامشي و اسيبه ولا كأنه عمل حاجه

صدقني لو عودت نفسك على كده هاترتاح جدا و تلاقي نفسك بتقضي مشاويرك و أعصابك هادية لحد كبير

شغل التكيف و الكاسيت و سيب الناس تعك براحتهم

أنا مش بقولك إن الموضوع ده سهل , لأ ده عايز تدريب شديد بالذات في الأول , ومش هاقولك إني علطول باطبقه لأ أحيانا بارجع لجنان زمان و اصغر مخي مع سواق تاكسي أو ميكروباص و أرجع أندم

بس في الاخر لو طبقت الكلام ده إنت الكسبان ,

يا كده يا تهاجر على أي دولة فيها الإختراع ده اللي إسمه أصول القياده

**wesam_salom** · 12-09-2011 01:52 PM

سامحنى على ردى
حضرتك كلامك صح
بس اسلوبك فى التعبير عن رأيك محتاج يكون اهداء شويه ومن غير ما تشتم وتشيل ذنوب

**Ashraf_Ashraf** · 12-09-2011 02:03 PM

سؤال بسيط هو فى سلوكيات اصلا فى المرور فى مصر دا كل واحد ماشى بقانون حجم وسرعه عربيتك كل ماتكبر وبتسارع اكبر كل مايبقى ليك الحق فى عمل اللى نفسك فيه والباقى المفروض يسكتوا ومايفتحوش بقهم
ياجماعه والله المفروض كلنا بلا استثناء عن تجديد الرخصه يدخلونا مدرسه تعليم فن القياده مش تعليم تحريك السياره بالاضافه الى كشف نفسى دقيق لانى بصراحه بشوف خلق قاعده ورا الدركسيون كانها بتقول ياشر اشتر

**ahmed76** · 12-09-2011 02:09 PM

نصيحه : لما تنزل تروح اى مشوار بالليل ركز كويس جدا فى الالوان :

لو العربيه اللى قدامك نورها احمر تبقى ماشيه معاك فى نفس اتجاهك
ولو ابيض يبقى جايه فى وشك

**ahmadrayani** · 12-09-2011 02:13 PM

للأسف هذا الذى يحدث معك هو لسان حال جميع شوارع الجمهورية بلا إستثناء ... أنا بأسافر كتير جوه مصر ومفيش محافظة فيكى يا مصر إلا وفيها نفس أساليب القيادة الزفت اللى فى القاهرة والجيزة ..... وكما قال الأستاذ جلال عامر .. الثورة غيرت الملوك ولم تغير السلوك !

**strongxx** · 12-09-2011 02:14 PM

فعلا يا جماعه.......موضوع السواقه في مصر بقي رهيييييييب وفيه مقوله سمعتها من أسقع وأبرد سواق تاكسي فيكي يا جمهوريه وهو ده سر بروده الشديد وهو سايق..لو الدنيا اتهدت وإتجابت عاليها واطيها واتعجنت في بعض متتهزش منه شعره.......المقوله بتقول

....*ّّّّ(((( طنش تعش تنتعش )))) ّّّّ........

الحكمه دي ان طبقتها لاقيت الحياه وردي والدنيا حلوه ....بس المشكله بقي بتعكنن لما ألاقي حد واخد مكاني إلي ببقي متعود أركن فيه وكمان يكون غريب عن المنطقه.........لكن علي الطريق كاني سايق لوحدي علي الصحراوي الساعه 4 الفجر والطريق فاضي كله......لو تعاملت مع الطريق والناس بالإسلوب ده حترتاح راحة محصلتش.....لاني زمان كانت بتوصل معايا اني كنت بنزل أضرب بجد وأشتم وأسب للناس وسط الشارع

**A_H_M_A_D** · 12-09-2011 02:40 PM

المشاركة الأصلية كتبت بواسطة ahmadrayani

للأسف هذا الذى يحدث معك هو لسان حال جميع شوارع الجمهورية بلا إستثناء ... أنا بأسافر كتير جوه مصر ومفيش محافظة فيكى يا مصر إلا وفيها نفس أساليب القيادة الزفت اللى فى القاهرة والجيزة ..... وكما قال الأستاذ جلال عامر .. الثورة غيرت الملوك ولم تغير السلوك !

مفيش زي اللي بيحصل في القاهرة

أنا روحت أسوان و شوفت إزاي سواقين التاكسي هناك بيلتزموا بالإشارات حتى و الشارع فاضي و مفيش عسكري برضه تلاقيه واقف في الإشارة الحمرا , يعني و لا أوروبا

سواق ميكروباص أسواني بيقولي إنه حاول ييجي يشتغل في القاهرة ماستحملش أكتر من أسبوع و رجع لبلده هناك يبوس الأرض من اللي شافه

**osama.m** · 12-09-2011 03:25 PM

والله عندك حق في كل حرف
المشكلة ان ساعات كتير بتبقى عايز تمشي ملتزم عشان على الاقل تريح اعصابح
بس بتلاقي كل اللي حواليك بيبلطجو فا لازم تعمل زيهم عشان تخلص
يعني امبارح ماشي في طريقي وواحد عايز يطلع من الركنة و خلاص عربيتي سدت علية الطريق و دا مصمم بردو يطلع من الركنة و ياخد الطريق قبلي
ربنا يتوب علينا بجد و كل واحد فينا عايز يلتزم عشان شدة الاعصاب و نحافظ على عربياتنا و حياتنا