الموضوع: سلوكيات القيادة المصرية الزفت ... زهقت

سيدى الفاضل انت لخصت كل ما يحس بيه اى انسان محترم او عايز يعيش باحترام وانا بصراحة اتكلمت زى حضرتك بلهجة شديدة وعصبية ونرفزة وكنت اول واحد معنديش امل ان احنا نتطور ولو متر واحد للامام وشايف الدنيا سودا بس هاقولك انك عندك حق فى كل كلمة قولتها وكل تعبير بتعبر بيه عن مشاعرك المؤسفة للى بقى يحصل فى البلد واللى زاد فعلا بعد الثورة بس احنا لازم نكون صامدين ايوة لانك استحالة تقعد تقوم كل الناس دى فى الاخر هاتحس ان انت اللى غلطان والحلول كتيرة جدا بس المهم التوعية والارشاد الصحيح البلد دى مش هاتنضف الا لما الناس تفضى وتفوق شوية بمعنى ان احنا لو خصصنا من وقت كل مواطن شريف ومحترم زى حضرتك وكل الناس اللى مش عجباها الحال ونزلنا نوعى ونفهم الناس دى والله انا جاتللى الفكرة دى من زمان من قبل الثورة وكنت تخيلت فى نفسى انى عايز اعمل زى نظام شرطة سرية او امن عام الهدف منه الاول هو مساعدة الناس والتوعية الصحيحة باسلوب غير اسلوب الشرطة ولعلمك انا تفهمت انه لازم يكون معايا بعض الصلاحيات زى رجل الشرطة ويمكن اكتر شوية ومحتاج مساعدة من الناس اكتر ولكن لا حياة لمن تنادى مش قادر اقولك قد ايه انت حركت فيا مشاعر غيرة غريبة على بلدى والنعمة اللى فى ايدينا واحنا بنهدرها والله ممكن عايز اقولك معلومة انا كنت اكتر واحد احبطت وقرفت من البلد وولائى قل جدا لدرجة انى فكرت فى الهجرة والفرصة دى جالتلى وانا صغير شوية ايام ثانوية عامة بس كنت بفكر ازاى ولادى هايطلعوا غربييين وطبعا عارف انا قصدى ايه بدون الدخول فى التفاصيل وعايز اقولك انى بندم على الفرصة دى لغاية دلوقتى بس بقول انا فكرت صح وكل شئ نصيب والله العظيم مفيش حاجة هاتتغير الا لما احنا نغيرها بايدينا وعارف ان احنا محتاجين معجزة يعنى زى ماتعمل منتدى جميل زى ده للسيارات والاهتمام بتفاصليها ممكن يتعمل حاجة زيها وتكون مرتبطة بجهة معينة فى الحكومة تاخد بآرائنا لان كل واحد فى البلد ليه مطالب وحاجات واهتمامات بيحس ان هية الاولى للتغير لكن صعب ننفذ كل حاجة فى وقت واحد يعنى احنا بقالنا 30 سنة فى قهر وبلطجة وجهل وتخلف دى لو امراض كان زمانا اموات من زمان مفتكرش انه فجاة الناس هاتحس بحلاوة البلد دلوقتى لكن ممكن نعمل زى كورس مكثف ونقلل المدة على قد مانقدر يعنى هاديلك مثل بالرغم من انى كنت معترض عليه بس فى الاخر قولت اهى فكرة تتطرح علينا افكار كتيرة لما الثورة قامت وابتدت الشباب ربنا يحميهم بعمل تجميل وارصفة وشجر وطبعا الموضوع هبت على الاخر وليه اسباب كتير مش هانخوض فيها برضوا بس منها اللى مشغول ومنها اللىمش لاقى استجابة واهمال يعنى بس اهى محاولة وكنت شايف انها مش وقتها دلوقتى مشكلة بلدنا مش فى البويا والرصف مشكلتنا فى سلوكياتنا تعالى نفكر سوا ونقترح يمكن يجى حد زى انا وانت ويقولنا على افكار جديدة ومستعد للتنفيذ فورا زى مابتاخرش على مقابلة للمنتدى مش هاتاخر على بلدى اللى نفسى تكون احسن ومتاكد انها فيها الاحسن بس للاسف بلاد كتيرة مستفيدة من ده ومع العلم ان احنا مش هاندخل نفسنا فة السياسة ولا حاجة احنا هدفنا التصليح فقط وتبقى زى احزاب بس مش سياسية كل غرضها التغيير الفعلى وكفايا اعلانات احنا مبنفهمش الفكر ده من التغيير ونشوف بكرة مخبى لينا ايه لو عملنا بمقدار 10 % وحسينا ان فيه امل اكيد هانشجع ناس كتير ونوعيهم يعنى هاقولك على اخر مثل بسيط وقريت الموضوع ده من هنا فى المنتدى موضوع الاستيكر بتاع البلاى بوى ناس كتيرة حاطاه ومش عارفة ده ايه والاخ الفاضل اللى عمل الموضوع ده كان هدفه التوعية وناس كتيرة استجابت يعنى فى امل ولو بسيط ونبقى عملنا اللى عليناوالله انا من اكتر الناس حاسس بكل كلمة قولتها بس بلدنا وملناش غيرها مش عارفين ليه ربنا حاطنا فيها اكيد هو سبب واكيد هايبقى شرف يتمناه اى اجنبى او من بلد تانية يارب يكون كلامى خفيف عليك ومعلش طولت عليك ولسة عندى كلام كتير جدا بس كفايانا كلام واسف للاطالة تقبل مرورى وتحياتى

المشاركة الأصلية كتبت بواسطة seifmando

وليه انا وانت منتغيرش ونبدأ بنفسنا

أنا عايش في الدنيا بمبدأ

إن الله لا يغير ما بقوم حتى يغيروا ما بأنفسهم
و لذلك يا أستاذ سيف قبل ما بأنتقد أي شئ ......... بكون ما بعملوش .

ليه لما واحد يضايقك بالحاجات اللى انت قولتها فوق(مع انها تخلى الواحد يغلى) تفتح ازازك وتبص له وتبتسم ولو ابتسم هو كمان يبقى هو عرف غلطه
انا كنت زيك كدا كل ماحد يغلس او يكسر او يعمل اي حاجة غلط اخد الموضوع على صدري واتنرفز واحصله واجيبه واغلس عليه بنفس الطريقة اللى هو عملها فيا والحمد لله مكنش بيفتح بؤه لانى والله العظيم كنت ساعتها ببقى مستعد انى اضيع العربية واخش فيه من كتر غيظى
بس للاسف لما لقيت ان كل دا ملوش لزمة وتضييع لصحتى اللى هي اهم من اي حد تانى وممكن اخسر عربيتي فيها قولت لازم اغير من نفسي واعمل اللى قولتلك عليه فوق

جرب اسلوبى وانت تحس بنفس راحتى ان شاء الله

أنا من الناس اللي في حالها .......... بأمشي يمين على الدائري 90 % من الوقت و برضه مش بخلص من الناس
و أنا في السوبر ماركت بقف طابور و الاقي كله مش عايز يقف طابور
بسوق في حالي و لما الطريق يقف بأقف و لما يمشي بأمشي و مش بحاول أعمل ناصح .

و لكن أعصابي ببتحرق من اللي بيتعمل فيه

أنت هاتعمل كام واحد بالابتسام ..................... ده أحنا عايشين في مدينة تعدادها 20 مليون
و للآسف أغلبيتهم كدا و فاكرين أن كدا صح .

أنا امبارح ماشي على الدائري في الحارة الثالثة قبل الأخيرة على اليمين .
و الطريق كان ماشي فسرعتي كانت 80 تقريبا و الحارة التانية كان فيها نص نقل ماشي بنفس سرعتي تقريبا
و جاي واحد من وراه و عايز يعمل غرزة بيني و بينه فرحت كبست بنزين في حارتي و قفلت المسافة اللي كان ناوي يعمل فيها غرزة علشان المسافة كانت صغيرة و كنت مضطر أفرمل أو أعمل كدا .
و مادمت في حارتي فمن حقي أعمل كدا مادمت في السرعة القانونية و مش كاسر على حد .
يعني أنا في وضع دفاعي بحت عن حقي في الحارة و الطريق.

المهم اخينا معجبوش أني ماشي في حارتي ملتزم .......... بعد شوية لقيته عمال يكسر عليا و يجري ورايا المهم هديت و قلتله أدخل برضه مصم يرزل و يغتت (مع أني ما غلتطش فيه نهائيا )

عارف لما تكون واقف طابور و أنت التالت مثلا و يجي واحد حيوان من الحيوانات اللي مش بتحب تقف طابور و يقف جنب أول واحد في الطابور و أنت بتحافظ على حقك في الطابور و تقوله فيه حاجة أسمها طابور

المهم أن الناس من الآخر أصبحت سلوكياتها أزبل من قبل الثورة و بتتدهور خصوصا في حالة غياب القانون نهائيا عن الشارع .

والله الكلام ده قولته وصوتي اتنبح وانا بقوله ، انا كنت متحمس جدا بعد الثورة وكنت متفائل اوي وبعدين شفت ان الثورة خرجت اسوأ ما في الناس. حاجة تقرف

نحمد الله على سلامتك و رجوعك

و ليه لما تعدي واحد مثلا أو تقفله ما يقولكش شكرا




علشان دا واجبى