الموضوع: التنتيش من الكاربراتير و لا الاسبراتير ..

لا حول ولا قوة الا بالله
مبدئيا ياعزيزي ممكن متديش ودنك لاي حد يقولك اي حاجه ويعملها وانت واقف تتفرج عليه وخلاص
العربية 2009
يتفك كربيراتيرها ليه ان شاء الله؟؟؟؟؟؟؟

حضرتك عامل كام ألف كيلو لحد دلوقتي؟؟؟ واخبار الصيانه الدوريه ايه؟؟

وهما اخترعو مواد تنظيف الكربيراتير وهوا راكب ليه؟؟؟؟

عموما
لنأمل ان الكربيراتير ركب سليم ان شاء الله
حضرتك لازم تغير الميكانيكي ده فورا واسأل على حد كويس
يظبطلك الكهربا بتاعة العربية وينظف الكربيراتير بالاسبراي من غير مايفكه
بالمناسبه الكربيراتير والاسبراتير الاتنين يعملو تنتيش

وفي حاجه ممكن تكون هي السبب
ممكن لما البنزين فضي بعض الاوساخ اللي بتبقى متراكمه في قعر التنك تكون سدت فلتر البنزين
فممكن تغيره وتتحل المشكله

اما السنتر والانذار فملهمش علاقه لا من قريب ولا من بعيد باللي بيحصل في العربية

وياريت تبقى تسأل في منتدى السوزوكي على اي مشكله تمر بيها في العربية قبل متروح تصلحها عند حد بيفتي ويقول اي كلام وخلاص....

ومتقلقش من مفتاح ال12 ده كان عشان يهوي صامولة الاسبراتير ويحركه مش اكتر

ملخص اللي هتعمله بالترتيب:
غير فلتر البنزين (ولو انه بيتغير كل 40 ألف ولكن قد يكون هو اللي عامل المشكله دي)
متظبططتش
هتروح لميكانيكي تاني ينظفلك الكربيراتير بالاسبراي او تعملها انت بنفسك وهي حاجه سهله ومتقلقش يعني
وطبعا يظبط الكهربا بعد اما ينظف (ظبط الكهربا يتمثل في ظبط الاسبراتير وظبط مسمار الهوا والبنزين)

يفضل بعد تنظيف الكربيراتير تغيير البوجيهات(لان الرواسب الموجوده في الكربيراتير بتنزل تتراكم عليها وتقلل كفاءتها

بس كده وان شاء الله هتلاقيها رجعت زي مكانت ان شاء الله


تحياتي

المشاركة الأصلية كتبت بواسطة amr_bekhit

شكرا لك اخى الكريم على التواصل
الحق يقال العربية عاملة حوالى 22700 كيلو فقط
غيرت انا بوجيهات و كوندنسر و ابلاتين من شهر تقريبا
هضطر اغيرها تاني ؟ بعد ما البنزين خلص و حطيناه بالجيركن ؟
اللى مجننى انه لعب فى الاسبراتير ليه ما كانت العربية ماشية
كمية الأغبيا اللى فى البلد رهيبة
و زى ما انتا بتقول يفكوا ليه من الأساس
المشكلة ان العربية وقفت فى المشوار بعيد خالص عن منطقتنا و جبت الميكانيكى ده من اول حتة عديت عليها علشان يقوم العربية
المهم قدر الله و ما شاء فعل
و شكرا

طيب
مبدئيا واضح انك مش ماشي على جدول الصيانه لان جدول الصيانه مفهوش تغيير كوندنسر وابلاتين على 20 ألف
فقط البوجيهات بتتغير على 20 ألف وطالما العربية بتدور علطول يبقى مكنش في داعي للابلاتين والكوندنسر
مع العلم ان اغلب اللي بيتباع في السوق مضروب وممكن يكونو هما سبب المشكله بالذات الكوندنسر يعمل التنتيش ده
بيتباع عند واحد في التوفيقيه اسمه سوزوكي سنتر كوندينسر ماركة دينسو ياباني ب 35 جنيه لكنه الافضل على الاطلاق
اللعب في الاسبراتير يعلي استهلاك البنزين او يخلي العربية تكركر شويه وممكن تدي مدافع او تنتش تنتيشات بسيطه لكن مش اكتر من كده فمتقلقش منه وسهل ظبطه وهوا فعلا بيتظبط بالتجريب وبيتظبط حسب حضرتك بتحط بنزين كام؟

انا فعلا بتكلم لما البنزين خلص وحطيته بالجيركن غالبا كل الزباله اللي كانت في التانك حضرتك دخلتها على الفلتر وممكن يكون اتسد وبرضو ده يخلي العربية مخنوقه وبتنتش

يعني تعددت الاسباب عندك وده في حد ذاته مشكله
ولذلك من رأيي تبدأ بالحلول الابسط فالاصعب
عشان كده بقولك غير فلتر البنزين هو تمنه الياباني ب 25 والتايواني ب 15 والصيني ب10 والروسي ب 7 والمصري ب3 جنيه
هههههههههههههههه
يعني عندك اوبشنز كتيره وانا برشحلك التايواني (واتأكد ان اللي بيركبه بيحط الخرطوم ال in كان الان والout مكان الآوت عشان منرجعش لنفس الدوامه)

بعدها لقيت العربية بتنتش تاني او زي مهيا يبقى توجه للكوندنسر الدينسو فورا وبدون نقاش وبعدها ابقى يظبط كهربة العربية (مش تغير طقم الكهربا انما بتتظبط زاوية الاسبيراتير وبيتظبط مسمار الهوا والبنزين فقط من الكربيراتير وان شاء الله هتتحل مشاكلها كلها تماما باذن الله


لو عايز تستشير ناس اكتر ممكن بعد كده تسأل في منتدى السوزوكي لاننا هناك كتير والكل هيديك تجربته



تحياتي

المشاركة الأصلية كتبت بواسطة amr_bekhit

متشكر جدا للتواصل
و الله انا جديد نوفي فى العربيات
لسه مشتري العربية من شهرين تقريبا و صاحبة العربية مكانتش عملت اى شغل فيها خالص
لظروف عائلية كان استخدمها خفيف
انا افتكرت روحنا جبنا طقم الكهربا ده فرنساوي
الراجل الميكانيكي قالنا كنتوا جبتوه يابانى احسن بس ده شغال
يمكن فعلا رواسب البنزين هى اللى رقدت العربية
علشان قريبى ده لما حطلها بنزين بالجركن مرضيتش تشتغل معاه اللى بعد محاولات مستميتة
انا اجبلها فلتر بنزين ان شاء الله يوم الخميس و اجربها و هبعتلك ايه اللى حصل بعدها
ان شاء الله شكرا اخى الكريم
انتا اسمك ايه ؟
متشكر على كل حال

ولا يهمك ياباشا
الطقم الفرنساوي ده اكيد مش بتاعها لسبب ان العربية ملهاش اي قطع فرنساوي
القطع الموجوده بترتيب الاولويه
هندي
ياباني
تايواني
ماليزي
صيني
مصري
غير كده ملهاش
والياباني اللي بقولك عليه مش هتلاقيه غير عند سوزوكي سنتر اللي في التوفيقيه وتحديدا ده الكوندنسر والماركه اسمها دينسو..
بالنسبه لرواسب البنزين المفروض ميتسابش التنك ينزل عن الربع الاخير تفاديا للموضوع ده فغالبا ده اللي حصل مع حضرتك..
العفو انا بعمل الواجب زي كل الاعضاء هنا مش اكتر...
اخوك حازم


تحياتي

المشاركة الأصلية كتبت بواسطة dado_256

على ما اظن ان التنتيش ده سببه سلك بوجيهات

سلك البوجيهات في عربية 2009 وعامله 22 ألف يبقى جريمه
سلوك البوجيهات مبتتغيرش الا لو فيها تلف ظاهري فقط لا غير

تحياتي