الموضوع: ثانى يوم اسود في مودرن ابورواش و ال ايه ضمان علي الاكسسوارات

طبعا الموضوع باين من عنوانه :
النهارده انا كنت في مودرن ابورواش و للمرة التانية علي التوالي يتضح بوضوح الشمس التقصير الغير عادي معايا و ال ايه بيعملوا توسع داخل التوكيل عشان موديلات جديدة و هما مقصرين مع العملاء.
الموضوع كالآتي :
من فترة كبيرة كنت ركبت مرايات ضم تايواني في مودرن ابورواش بـ 1850 جنيه و عليها ال ايه ضمان سنة و طبعا انا مش بشتري حاجه الا لما اتأكد ان ليها قطع غيار و فعلا اكدوا لي في التوكيل ان المرايا ليها قطع غيار للميكانيكا الداخلية للمرايا
المهم
حصل ان لاقيت المرايا اليمين بقت بتقفل بزيادة ناحية زاوية الغلق و قولت لهم ممكن تكون اتخبطت و العربية واقفة في الشارع و متقولش يا عم ما صدقوا مسكوا في الكلمة ديه و فلاشر المرايا لاقيتها فصلت في يوم منها لوحدها كده
المهم
روحت النهارده ابورواش عشان نصلح المرايا و انتوا عارفين اني ساكن في اخر الدنيا في شبين الكوم و انا طبيعي لما بنزل القاهرة بجمع كمية مشاويير و بعمل حسباتي اني لازم اخلصها دي غير لو ربنا رتب اي ظرف طارق طبعا
طلعت من شبين الساعة 7:30 الصبح و روحت علي التحرير عملت مشاوير مهمة جدا و بعدين طلعت علي مودرن ابورواش و كنت هناك الساعة 11 صباحا و سلمت العربية و اذ بمفاجأة العامل بيقول الموتور بتاع المرايا مش هينفع
اه نسيت اقول لكم ان لما لاقيت المرايا بتحصل فيها المشكلة ديه من كام اسبوع روحت مودرن شبين الكوم و فصلت كابل المرايا عشان المشكلة متزيدش و علي فكرة هما ميعرفوش حاجه عن المرايا ديه
لاقيت العامل طالع و بيقول الموتور بتاع المرايا ده مش هينفع و يا دوب هيرفع برده المرايا و تنزل بمفتاح الخاص بيهم .. طيب يا عم ايه بقي لازمة وحدة الغلق اللي مركبها من ساعتها بـ 130 جنيه
و طبعا جاءوا يسلموا لي العربية لاقيت مصلحوش الفلاشر .. روحت للمهندس و دخل العربية تاني الورشة عشان يصلحوا الفلاشر و طبعا متصلحش
اخدت العربية بهدوء و مشيت من التوكيل و المهندس المحترم "ع" قلتله انا مش هعتب مودرن ابورواش الي الابد
المهم
روحت اخد تصريح الخروج لاقيت الحسابات بيقولي 54 جنيه .. ليه عشان مفتاح طلوع و نزول الزجاج اليمين قدام كان معلق و اتصلح .. طبعا قولتله مش دافع عشان ده في الضمان .. لاقيته بيقولي ارجع للمهندس اللي معاك
طبعا لاقيت نفسي زي ما يكون في جهه حكومية و روحت لمهندس و لافيت في الورشة بطولها و المهندس بعتني لمهندس تاني و كان معايا راجل محترم في التوكيل و كان بيتأسف عن كل المصايب ديه طول الوقت و طبعا اللي خانئني ان العالم دول معندهومش اي احساس بالمسئولية اني جايلهم بعد مشاويير خنئتني و بعد ما هسيبهم هلف علي مشاويير تانية .. مفيش اي احساس بالعميل
راح المهندس المحترم اداني تصريح الخروج و روحت اطلع لاقيت السكيورتي بيقولي التصريح مش مختوم . رجعت و ختمته

تحبوا تعرفوا ايه المصيبة اللي حصلت لي بقي و انا راجع و بركن عربيتي ....
الحلقة السودا جاية بعد قليل