الموضوع: اغتصاب رصيف

المشاركة الأصلية كتبت بواسطة رزق

بص لو حنتكلم عن الموضوع ده فـأنا معاك ومش معاك
يعني نظريا حقك تركن قدام بيتك
لكن عمليا هو ملكية عامة و أي حد من حقه يركن هناك
يعني إنت بتشتري أرض
مابتشترييش رصيف
ولا بتشتري الشارع قدام الرصيف

أنا لو املك بيت في مصر أكيد مش حستخسر و حاعمل جراج أو حتة كده للركن

وقانون المرور اللي فات كان عادل في الحتة دي لما قال لك غرامة و ازالة
الله يرحمه بقى

للأسف غلطة عمرنا لما بنينا البيت ماعملناش جراج ودلوقتي بدفع التمن
بس حتي لو في جراج ما انا لازم هحط حديدة قدامه ولا اتحبس في بيتي او بليل ماعرفش ادخل ؟؟؟

هي هي الحديدة هل الحل

المشاركة الأصلية كتبت بواسطة fepsceasar

بيتك ملكك الشارع مش ملكك علشان تاخد حتة منه
لو عايز تطمن ايقى اعمل تحت بيتك ملكك جراج الناس مالهاش ذنب
واخد شقة تمليك ابقى اشترى مكان فى الجراج
وبعدين لو كل واحد عمل حديتين وقالك دى بتاعتى هنمشى بالعربيات ولا نحطها فين
وايه ذنب الواحد اللى رايح لدكتور فى العمارة اللى حضرتك ساكن فيها او جنبها وحاطط الحديدتين بتوعك يقعد يلف بالشخص اللى تعبان ولا حضرتك تديلوا فرصة يركن ولما يمشى تبقى تركن مكانه
انا ما شوفتش حتة فى العالم ييجي واحد يحط ايده على حتة من الشارع ويقولك بتاعتى
بس للاسف دلوقتى بقى اللى مش عادى هو العادى وييجي واحد يقولك فيه ايه انا راكن تحت بيتي
يلا لنا الله

البيت ملك وساكن فيه الحاج وانا واخويا الكبير
انا وأخويا بفضل الله عندنا عربيتين والبيت عرضه علي قد العربيتين يركنوا ورا بعض ما شاء الله

احيانا يجي واحد رخم ورخامته انه جارنا وعارف ان دة مكان لعربيتين وتلاقيه راح مسنترها في النص وانا واخويا نحتاس والمشكلة ان انا واخويا نكره عمي اننا نركن تحت بيت حد من الجيران

وحضرتك عارف عيب الشوارع الداخلية في مصرنا المحروسة تلاقي عيال الشارع كله قاعدة عليها والي طالع عليها يجيب ورق شجر والي بيفطر والي بيكتب مذكراته علي الكبوت

كمان واحد جارنا بمنطق انه بيركن في اي حتة ومش شرط تحت البيت عربيته مسروقة بقالها دلوقتي شهرين والراجل دايخ عليها

يبقي من وجهة نظرك اركن فين ؟؟؟؟ مش تبقي تحت بيتي وعيني احسن ؟

ثانيا بنفس المنطق بتاع العيادة دة
مرة ركنت عمودي علي الرصيف علي فيصل العمومي وارجع الاقي عربية فان معشقة وراكنة ورايا دورت علي صاحبها محل محل ولما اجيت اشيلها انا وحد من الأخوة اصحاب المحلات الجدعان لقيت الي نازل وبيقولي معلش انا كنت مع المدام عند الدكتورة فلانة
يبقي مين الي بيقفل علي مين ؟؟؟
ماتقلقش محدش النهاردة بيحتاس ويحط صباعه فبقه ويدور علي ركنة كله صف تاني وتالت كمان

الله المستعان
،
،