أنا مرة ركبت مع واحد كان لسه شاري لادا 2107 و مكملتش 1000 كيلو, فقلت له انت ليه جبت لادا لما فيه عربيات تانية كتير أحسن زي الفيرنا و فارق سعرها مش كبير, فرد عليا:
- لو أنا اشتريت فيرنا و واحد رزع الباب, ممكن مرة في مرة ميستحملش و يحصل له حاجة. انما اللادا ميفرقش معاها.
- لو أنا كسرت الفانوس في الفيرنا هضطر أشتري واحد جديد. انما اللادا أحط عليها ؟؟؟؟ بلدي (مش فاكر اسمها) ب5 جنيه و خلاص.
- الفيرنا محدش عارف هتعمل ايه بعد 10 سنين, انما اللادا متجربة. و اللي نعرفه أحسن من اللي منعرفهوش.
- لو العربية عطلت مني في وسط السكة, أقدر أوديها عند أي ميكانيكي يتصرف فيها.
- لو أنا ماشي بفيرنا محدش هيشاور لي عشان هيفتكروا اني هاخد زيادة عن الأجرة العادية.
اللادا ممكن تتظبط. لو مفيهاش باور تقدر تركبه. لو السماعات مش عاجباك تقدر تغيرها. لو الشكل الخارجي مضايقك ممكن لو غيرت الجنوط و عملت تعديلات بسيطة تانية تبقى كويسة.
دي طبعا وجهة نظره. أنا وجهة نظري اللي احتفظت بيها و مقلتهاش عشان منتخانقش مع بعض و معقدهوش من العربية:
- الراجل بيقول لي انه جابها ب50 ألف جنيه و كسر. لو هو كان في دولة أوروبية كان ممكن يشحتها.
- في برنامج توب جير, العربية من نظر جيريمي كلاركسون مبقتش قابلة للاستعمال الآدمي الا بعد ما اتصرف عليها ما يوازي 100 ألف جنيه استرليني.
- اللادا 2107 هي يمكن أسوأ عربية طلع لها موديل 2009.
- الغفشة ناشفة جدا لدرجة انك تحس انك راكب جرار أو عربية كارو.
- العربية مفيهاش أي ذوق في الصالون الداخلي, و الصالون كمان ضيق جدا. انت رجلك لازقة في التابلوه أو الكنبة اللي قدامك كانك راكب مشروع.
بس الخلاصة ان اللادا هي اللي هتفضل موجودة عندنا في الاسكندرية لفترة طويلة قدام لأسباب اقتصادية, و لأن الزبون معندوش استعداد يصرف أكتر من اللي بيديه لسواق اللادا. لو عنده استعداد فهو قدامه تاكسي العاصمة.
أعتقد ان سبب انتشارها هو نفس انتشار الكلاشينكوف الروسي. رغم انه تصميمه قديم و هو سيء جدا في التصويب بالمقارنة بالأسلحة الحالية, الا ان هو مبيحتجش أي نوع من الصيانة غير الأساسية جدا, و نادر ما بيعطل حتى مع سوء الاستخدام.
المفضلات