الموضوع: فتي الميكانيكا بوظلي العربية ! حسبي الله ونعم الوكيل

السلام عليكم ورحمة الله وبركاته

قبل اي حاجة هقول حسبي الله ونعم الوكيل في اي مكانيكي او صنايعي يشتغل في حاجة هو مش فاهمه ويفتي ويدفعك مبالغ ويخليك تغيير حجات سليمة وهو ماعندوش اي خلفية عن اي حاجة

وياريت على التغيير وبس لا للاسف فيه بتبقى حاجة بسيطة وعشان حضرته ماينفعش يقولك مش عارف او مش بشتغل في العربية دي لازم يفتي وبدل ماكان عيب بسيط هيكلفك مبلغ بسيط تلاقي نفسك اتكلفت مبالغ كبيرة !

هو ليه فاكرين ان عيب ان الواحد يقول مش عارف ؟ او ان عيب ان الواحد يقول ده مش تخصصي ؟ ؟

لا حول ولا قوة الا بالله

------

عشان ماطولش عليكم الموضوع بإختصار في اواخر شهر رمضان اشتريت شاشة GPS للعربية

ركبتها واتبسطت منها جدا ,, الشحن بتاعها من خلال الولاعة

فكنت دايما اشحنها من الولاعة واول ماتخلص شحن اشيل الشاحن عشان بحسه نار وهيرفقع من الحرارة

فجاءة وبدون اي مقدمات الولاعة باظت والشاحن مابقاش يشحن (اتاكدت من ده بعد ماجربت اكتر من شاحن والولاعة نفسها)

سألت زمايلي قالو حاجة بسيطة وروح لاي كهربائي هيعملهالك وانت واقف

رحت لكهربائي في المنطقة عندي قالي الفيوز بتاع الولاعة ضرب انا معنديش الفيوز الاصلي بتاع تويوتا بس عندي واحد هيشتغل ممكن اشغلهولك لحد مانت تجيب الفيوز الاصلي

قلتله مافيش مشكلة وفعلا ظبط الدنيا وكل حاجة بقت تمام الكلام ده كان من يومين تقريبا

النهارده كنت في مدينة نصر ومروح على الساعة 1 تقريبا لقيت الشاشة البطارية هتفصل قلت احطها في الشاحن

بمجرد حطيت الشاحن في الولاعة لقيت العربية طفت وبطلت ! استغربت

دورت تاني العربية بدور بشكل عادي بس الكاسيت مش شغال ,, الفتيس مش بيتحرك (اتوماتيك) ,,, الدركسيون تقيل جدا جدا جدا اكنك فاصل الباور وبتحاول تحركه والعربية مطفية ,,, العداد مش شغال

الى غير ان فيه لمض حمراء منورة في التبلو (لمبة فرامل الايد مع اني منزلها ,, لمبة ال ABS ودي صفراء ,, لمبة حمراء مكتوب عليها P\S)

اول حاجة جت في دماغي ان الفيوز اللى هو حطه عشان يشغل الولاعة هو اللى عمل المشكلة لانه مش الاصلي ومش نفس اللى كان موجود

رحت فاتح علبة الفيوزات وشلته

دورت تاني نفس المشكلة

مابقتش عارف اعمل ايه ,,, العربية بتدور بس مافيش كهرباء اي حاجة جوة العربية ليها علاقة بالكهرباء مش شغالة

معدا الانوار هي بس اللى كانت شغالة

حاولت يمين شمال مافيش فايدة حطيت الفيوز الاصلي اللى الراجل كان شاله (كنت مخليه معايا عشان اجيب زيه) برضوا مافيش فايدة

الساعة كانت داخلة على 1.30 مافيش اي كهربائي فاتح وانا مش من مدينة نصر فمش عارف حاجة

وقفت تاكسي كان سايقه راجل كبير باين عليه خبرة وسألته

الراجل بصراحة ماقصرتش وفضل يحاول معايا في الفيوزات اكتر من ساعة ونص

اللى اكتشفته ان الباشا الكهربائي شال فيوز 15 وحاطط مكانه فيوز 30 مش عارف اذا كانت فرقت وهي اللى عملت المشكلة ولا لاء

واللى اكتشفته تاني ان كان فيه فيوزات احتياطية كان ممكن يستخدم منها الكهربائي بدل مايحط واحد من عنده او يقولي اشتري جديد ! ! برضوا مش متاكد من مدى صحة المعلومة دي

الساعة دخلت في 2.30 ومعرفناش نوصل لحاجة وحسيت اني ارهقت سواق التاكسي معايا

وسعتها ماكنش قدامي الا اربع حلول

1- اركن العربية عند اي حد معرفة في مدينة نصر وبكرة الصبح اجيب كهربائي يشوفها

وده كان حل مرفوض بالنسبة لي لان اكيد مش هعرف انام والعربية مركونة في منطقة تانية خاصا في ظل الظروف اللى احنا فيها دي

2- اقطر العربية على ونش ينقلها من مدينة نصر لحد الجراش عندي (شارع فيصل)

وده كان هيكلف كتير الى غير الوقت اللى هستناه علما يوصلني الونش واضرار رفع العربية وغيره

3- اركن العربية في اي حتة في مدينة نصر وابات فيها لحد الصبح

4- العربية بتدور وكل حاجة طبيعي بس مافيش كهرباء فالفتيس مش بيتحرك والدركسيون مافيش باور بس لو حركت الفتيس من خلال زرار ال Lock وجبته على ال D العربية كانت بتمشي بشكل طبيعي (مع اعتبار ان فيه لمض حمراء منورة والعدادات اللى مش شغالة وبقيت المشاكل)

ففكرت اني امشي براحة بالطريقة دي لحد ماوصل البيت بس كانت خايف يكون فيه ضرر على العربية اولا وثانيا الوقت متاخر والطريق صواريخ والدركسيون ثقيل جدا فاي غلطة صعب اتفاداها

ثالثا لو العربية عملتها معايا على كبري اكتوبر ووقفت هيبقى موقفي وحش جدا

كنت محتار مابين الحل التالت والرابع لحد مافي الاخر قلت همشي بالعربية على كدة براحة لحد ماوصل البيت وربنا يسترها

اتحركت وطبعا ماشي قمة في الرعب وعلى سرعة 20 تقريبا ! مش عايز ازود عشان مايحصلش حاجة واساسا العداد ماكنش شغال بس اتوقع اني ماكنتش ماشي اسرع من كدة

العربيات من جمبي طايرة

خايف اي حاجة تحصل او اي مضاعفات او العربية تقف خاصا وانا على كبري اكتوبر

الحمد لله وصلت بعد مشوار من العناء ولسه داخل البيت من اقل من نص ساعة

لكن مش عارف ايه اللى حصل للعربية ومش عارف هل كدة الكهرباء بتاعة العربية كلها باظت والموضوع هيكلف كتير

هل اودي العربية التوكيل ؟ ولا اوديها لكهربائي نضيف ؟ ولو وديتها التوكيل هوديها ازاي ؟ امشي بنفس الطريقة ولا ده فيه غلط ؟ ولا اقطرها على ونش احسن ؟

هل اروح للكهربائي اللى بوظلي الدنيا ده واعمل معاه مشكلة وابهدله ؟

هل اللى حصل ده مشكلة جامدة ومعناه ان الكهرباء ضربت والدنيا باظت ؟

حجات كتير اوي بفكر فيها حاليا لدرجة اني حاسس اني بقيت ماشي في البيت بكلم نفسي

ياريت يا جماعة اللى يقدر يفيدني باي حاجة هكون شاكر ليكم