الموضوع: عمى اتثبت وخدوا العربية !!!!

الموضوع بأختصار ان امبارح بليل على الساعة 9 كدا عمى كان راجع من القليوبية ومعاه مراته وكان بعربية ابنه .. كيا سيراتو 2011 لسه تقريبا معملتش 7000 كيلو .. المهم عربيتين نص نقل وقفوا قدامه ونزل منهم 6 افراد معاهم رشاشات واخدوا منه كل الحاجة اللى معاه والعربية كمان بس الحمد لله معملوش فيهم حاجة وهو اتصرف صح ومقاومش كمان.

كل والدى ورحنا طبعا كلنا لعمى عشان ناخده ونشوف هنعمل ايه ..
المهم قلبنا الدنيا فى المنظقة اللى اتأخدت منهم العربية بيها لحد مقدرنا نوصل للناس اللى اخدوا العربية وطلبوا مبلغ 20 الف جنيه عشان يرجعوهلنا تانى .. المهم كلمنا ناس معرفة فى النيابة والكلام دا كله اللى ملوش اى لازمة طلعوا عرفين العصابات دى لانهم كذا مجموعة وقالوا انهم هيبقى يشوفوا ونسيبهم كام يوم .. طبعا انا قولت لوالدى ادفع دلوقتى لان ممكن بكرا تكون العربية خلاص اتختفت ومش هنعرفلها طريق.

المهم اتفقوا معانا انهم هيخدوا الفلوس ويدولنا مفتاح العربية ونروح ناخدها من الحتة الفلانية وفعلا هو دا اللى حصل وروحنا لقينا العربية واقفة لوحدها كدا فى ارض زراعية وخدناها ومشينا بس طبعا الفلوس بتاعت عمى اللى كانت فى جيبه والموبيل وكل الحاجات اللى كانت معاهم اتاخدت ومرجعتش بس الحمد لله مرات عمى مكنتش لبسه دهب غير حاجة بسيطو اوى فى اليوم دا والا كانت الخساير هتكون اكبر من كدا بكتير.

طبعا كل واحد يخلى باله بقى لان الموضوع بقى وحش والجو مش امان خالص .. والبوليس عارف الناس كويس اوى لكن نايم فى البطيخ وملوش دعوة بحاجة.

على فكرة الحتة اللى اتخدت فيها العربية مكنتش مقطوعة ولا حاجة دى كان فيها ناس قعدة وعايشة وعربيات تانية ماشية وشافوا كل حاجة وهى بتحصل بس انت حط نفسك مكانهم شايف ناس نازلة بـ 6 رشاشات .. اكيد هتخاف على نفسك باردوا خصوصا لو مفيش طريقة نهجم بيها او اى وسيلة دفاعية.