[justify]السلام عليكم
كلنا عارفين طبعا احمد ووووو منى ..... وعارفين إنهم مقتنعين ببعض جدا ونفسهم يتجوزوا في الحلال
البداية لما أحمد كان في سنة ثالثة كلية عندما شاهد منى تلك الفتاة ( المستجدة ) في كليته وهي تبحث عن مكتب شئون الطلاب
بمجرد أن وقعت عينه عليها حدثت له صدمة كهربائية نفسية قلبية وحس إن البنت دي هي اللي طول عمره بيبحث عنها - طبعا استغل الفرصة وراح عارض خدماته وفضل يلف معاها يوريها مكان شئون الموظفين ويحاول ياخد ويدي معاها في الكلام بأي طريقة علشان نفسه يعرفها عن قرب وخايف للفرصة تضيع منه
مرت الأيام وهو يراقبها عن بعد حتى تأكد له إنها مش مرتبطة وإنها فتاة مؤدبة ومحترمة وبنت ناس
في نهاية السنة كان أحمد قد أخذ قراره بأن يرسل لها ما يعبر عن رغبته بالإرتباط بها
أما منى فكان أحمد بالنسبة لها هو أول فتى تراه بعد مرحلة كفاح الثانوية المسلح وبدأت تشعر نحوه بالرجولة والجدعنه
وكما يقولون بأن الإنطباع الأول يدوم لذلك فإنطابعها الذي تولد لديها من مجرد إهتمامه بها أشعرها أن هذا الشخص من أكثر الناس جدعنه وأنها قد يكون الفتى الذي تحلم به والذي يفضلها عن الجميع ويؤثرها على نفسه
دق ناقوص الحب بين الطرفين عن بعد وبكل أفلاطونية وإحترام وعفة وطهارة، فهما لم يتحدثا مع بعض وكل الذي بينهم هو مجرد إعجاب شديد ورغبة في الإرتباط أعلنها أحمد دون تردد وانتظرتها منى من غير أن تعلن عنها
بعد ما إتأكد أحمد إن منى مقتنعه به وما عندهاش مانع من إنه يتقدم لها
اخد عنوانها من إحدى زميلاته بالدفعة وراح متوكل على الله رايح عشان يكلم أبوها !!!!!
ذهب للراجل محل عمله وفاتحة في الموضوع وقاله إنه يشرفه إنه يخطب إيد بنته الآنسة منى
الراجل في الأول فرح وبعدين لما عرف إن صاحبنا مخلص ثالثة كلية وقدامه لسه سنتين وعرف إنه على باب الله وما عندهوش لا شقة ولا عفش ولا غيره راح وشه قلب ألوان وخد أحمد من إيده بره المكتب علشان ما حدش يسمع الحوار وقاله ( يا ابني هي بنات الناس لعبة - انت يا ابني لما انت لسه بتدرس وبتاخد مصروفك من أبوك ولا مؤاخذة جاي تتجوز بنتي إزاي - هتعيشها ولا مؤاخذة فييييين - هتصرف عليها منيييييين - انت يا ابني فيه حاجة ولا مؤاخذة بينك وبين بنتي - لو فيه قول أنا زي والدك واللي اتكسر يتصلح ----- طيب لما انت بتقول إنك عمرك ما كلمتها غير مرة واحدة بس وإنها بنت محترمة وأخلاق وبنت ناس - انت بقى جاي دلوقتي تقل احترامها ولا إيه - يا ابني انت شكلك ابن ناس وعلشان كده أنا هأعتبر نفسي ما سمعتش حاجة منك - أيوة والله أصل أنا لو اعتبرت اني سمعت منك حاجة يبقى ممكن يكون لي معاك تصرف تني - روح يا ابني واعتبرني زي والدك ولو محتاج حاجة في أي وقت ما تتكسفش خالص - يلا يا ابني مع السلامة ربنا يعينك وتخلص كليتك وجيشك ومصالحك دا انت وراك هم ما يتلم - انا عارف انت مستعجل على إيه - روح يا ابني اتوكل على الله ولو لك نصيب في واحدة هتتجوزها ولو بعد حين - مع السلامة يا ابني ...... )
طب وبعدين يا ردالة إيه الحل دلواكيت يا بوي
أحمد ينسى منى ويروح يقعدله على النت ولما يخلص الكام سنة الباقيين يبقى يروح يدور على عروسة ولا يعمل إيه ؟؟؟؟
على رغم إن أحمد ومنى هو عنوان لكل حب بين شاب وفتاة لكن مصير قصة الحب بين كل شخصين اسمهم أحمد ومنى مش دايما بتكون لها نفس النهاية
تعالوا نشوف مصير العلاقة بين أحمد ومنى ونشوف هتختاروا إيه
أحمد1 ومنى1
[justify]أحمد1 فكر في كلام أبو منى1 وقال والله الراجل عنده حق وبعدين انا لو مكانه هأعمل أكتر من كده، وراح باعت زميلته في الدفعة تعرف منى1 إنه معجب جدا بيها وإنه مش هيقدر ينساها وهي لو بتحبه يبقى تستناه لغاية ما يخلص ويقدر يتقدم لأبوها - وفعلا منى1 وافقت وقالت لأبوها الكلام ده والراجل قال والله يا بنتي لو دي رغبتك ما عنديش مانع - فضل أحمد1 عايش سنتين في الكلية وهو بيحلم بمنى1 وقضى ثلاث سنوات جيش وهو حاطط صورتها اللي نزلها من على الفيس بوك في جيبه وبعد ما خلص الجيش راح مشتغل شغلانه أي كلام علشان يقدر يحوش تمن الشبكة وراح متقدم لمنى1 رسمي وخطبها لمدة سنتين وبعدها كتب كتابه عليها وبعد سنة من كتب الكتاب قدر يأجر شقة صغيره كده ع القد وبمساعدة الأهل والأصدقاء جاب عفش كويس وأمه باعتله حتة الصيغة اللي حيلتها وراح جايب الستاير وعمل الفرح واتجوز منى1
[/justify]
يعني الكلام ما أخدش منه كتير بتاع عشرة سنوات وشوية شهور فكة وبعدها حلمه اتحقق
لولولوللللللللللللللللللل للللللللللللللللي
ألف مبروك لكل من أحمد1 ومنى1 وربنا يعدي أيامهم على خير
أصل أنا سمعت إنه بعد خمس شهور من الجواز أحمد1 أعصابه تعبت من منى1 ومن طلباتها اللي ما بتخلصش وزنها اللي مالهوش حل وبقى مدمن الدخول على نايل موتورز وهي بتشتكي منه ويظهر كده والله أعلم إن الخلافات بدأت تدب بينهم - لكن الحب اللي نمى بينهم خلال حداشر سنة قادر إنه يتخطى كل العقبات
أحمد2 ومنى2
أما أحمد2 فطلع ولد ابن ناس ما يختلفش عن أحمد1
عمل نفس الخطوات السابقة
لكن بعد ما خلص الجيش راح يسأل على منى2 لقيها اتخطبت وفرحها بعد قيمة شهرين
قال ما بدهاش بقى الواحد يقعد زي اصحابه في البيت لغاية ما يجيله تعيين في وظيفة كويسه
احنا ورانا إيه
أمه حاولت إنه يشتغل بعقد مؤقت بخمسة وأربعين جنيه في الشهر بوزارة الزراعة والراجل الواسطة أكدله إنه هيتثبت بعد خمس سنوات لكن هو رفض
حاول يدور على عقد لغاية ما ربنا كرمه بعقد في السعودية وحتة الصيغة اللي كانت حيلة أمه هو كمان باعتها علشان يدفع تمن العقد
قالتله انا كنت مخليهالك علشان يوم فرحك لكن هنعمل إيه بقى قسمته ونصيبه
راح أحمد2 السعودية واشتغل ليل نهار وحط الهللة على الريال لغاية ما اشتراله حتة أرض زراعية وبعد خمس سنين طلعت مباني راح بدأ يبنيها برج عشر أدوار وعرض الشقق للبيع ونزل يدور على عروسة
كانت منى2 خلفت بقى وعيالها كبروا عقبال عندكم وأول ما قرأت الإعلان اتصلت عليه علشان جوزها كان بيدور على شقة وقالتله طبعا الشقة في البرج اللي انت عامله بسم الله ما شاء الله بيقولوا حلوة قوي يا أحمد2 وانت مش هتلاقي ناس أحسن مننا يشتروا منك
بعد ما قعدت هي وجوزها قدامه في المكتب يكتبوا عقد الشقة واحمج2 عملها تخفيض مخصوص إحتراما للزمالة، ساعتها عرف أحمد2 إن سنوات عمره اللي قضاها بيحلم بيها لغاية ما شافها قدامه النهاردة إنها ضاعت هباء وإن الحب اللي كان في دماغه كان ضرب من الأوهام
حتى هو قاعد قدامها هي وجوزها وحاسس إن ما كانش بينها وبينه أي مشاعر قبل كده
ربنا كرم أحمد2 وعلى الأربعين كده اتجوز وعمل فرح ما حصلش
لولوللللللللللللللي
ألف ألف مبرووووووك وعقبال البكاري
أحمد3 ومنى3
احمد3 ده بقى ما نفعش معاه الكلام ده كله
قعد مع جماعة اصحابه وحاولوا يهدوا فيه
قالهم يا عم انت وهو فيه إيه، هو أبوها عاملي فيها ابن بارم ديله
يعني هو لما اتجوز كان حيلته حاجة ده تلاقيه كان شحات، بعدين هو ناسي أنا مين، انا صحيح مش معايا دلوقتي لكن بكره ربنا يكرمني وأبقى أغنى من العالم ده كله
طب وإيه الحل يا أحمد3 - استني يا عم ع الأقل لما تخلص الكلية والجيش وهي هتروح فين يعني ما هي قاعدالك هو فيه بنات لاقيين جواز اليومين دول
أحمد3 رفض تماما الفكرة دي وقال أنا وإيه اللي يضمنلي - بص يا عم انت وهو البت دي دخلت قلبي خلاص وأنا مش هأكسر بقلبي علشان خاطر أبوها - مدعوك أبوها على .... - أنا بقى هأخليه هو اللي ييجي عندي المرة دي ويبوس رجلي علشان أتجوز بنته ومن غير لا شبكة ولا مهر ويمكن هو اللي يدفعلي المهر والشبكة كمان هههههههه
راح احمد3 حط خطة ورسم على منى3 الحب والهيام وأحمد منى والكلام ده وشويتين اهتمام على كام مرة عزومة في المطعم الشيك الفلاني وفسحة في مكان فلاني واستخفاف على استظراف هلى شوية سحوكة وسهتنه
اليوم عربية إيجار بكره عربية واحد صاحبه
حتة خاتم على دبلة
جزمة هدية
رحلة على الأقصر واسوان مع اصحابها ويقنعها إنها تسيبهم ويفرجها هو على المعابد على رواقة
وفي النهاية قدر يلف دماغها ويقنعها إنهم يتجوزوا عرفي وجابلها مائة واحد من أصحابه الولاد والبنات يقسمولها إنه جواز حلال مئة بالمائة وكام واحد من أصحابه السيس شهدوا على الورقة
وكل سنة وانت طيب يا معلم
اشرب بقى يا ابو سوسو، ما انت لو مربي معزاية ولا مؤاخذة كنت خفت عليها وطليت عليها كل شوية لحسن يكون حصلها حاجة
كل سنة وانت طيب يا أحمد3 ويجعله عامر
طبعا ما فيش لولللللليييي لحسن حد يعرف بالموضوع
أحمد 4 ومنى4
دول بقى عملوا حاجة تاني خالص
أحمد4 دخل النت وأثناء متابعته مواضيع النايل موتورز لقى واحد ذاكر نوع من الجواز اسمه ( زواج الفرند )
العنوان استفزه وخلاه يدور عليه في النت
لقي إن الجواز ده بيكون مكتمل من قبول وإيجاب وموافقة وحضور الولي وفرح ومعازيم وهيصة وزغاريد ومأذون ما فيش مانع ياخد ألفين جنيه حتى بس الميزة اللي فيه إنه ما يشترطش فيه تجهيز مسكن زوجية
أحمد4 فكر وقعد يحلم مع نفسه وقال يا ترى ممكن أبو منى4 يوافق على حاجة زي كده حتى لو وفرتله كل الضمانات
الولد ما كدبش خبر
راح مكلم واحد شيخ عندهم في المنطقة من الجماعة السنيين أمات دقون
فتح معاه الموضوع
الشيخ السني في الأول استغرب وقاله يعني يا احمد4 انت عاوزنا نقول للراجل جوزني بنتك مقابل إيه فهمني ؟؟
أحمد4 قاله يا عم الشيخ هو الموضوع مش مادي علشان نقول مقابل إيه، زي ما انا هأبقى سعيد لما أتجوز منها هي بردو هتبقى سعيدة ولا إيه
بعدين أنا بطلب الحلال وانت عارفني ومربيني على إيدك، انت مش واثق إني هأصونها
قاله يا ابني انا عارفك لكن أبوها ما يعرفكش
رد عليه أحمد4 وقال: ما علشان كده انا جاييلك تشوفلي صرفة، ولو عليهم أنا مستعد أكتبلهم كل الضمانات اللي تخليهم يطمنوا
طب وهتعيشها فين ؟؟؟؟
قاله يا عم الشيخ يعني أديك شايف البنات والأولاد عندنا بيتجوزوا عرفي ومش عرفي وعايشين حياتهم في الحرام وبيتصرفوا، أنا كل اللي أنا طالبه أعيش حياتي بالحلال وفي النور - تعيش معايا في بيت أبويا في بيت أبوها نأجر شقة مفروشة كام شهر نسافر بره نسيح زي ما العام بيسيح، يعني هم أجدع مننا يعني ولا انا مش هأقدر ألاقي مكان أقابل فيه مراتي في الحلال
قاله يا ابني ما أنت لازم تحددلي أنا لما أقول للراجل إبننا هيتجوز بنتك وهيعيش معاها فين ؟؟؟
في الشارع ولا هم الولاد الصايعين بيعملوا إيه انا ما عنديش فكره ؟؟
قاله يا عم الشيخ شارع إيه بس ، أنا أكتبلها المهر بتاعها زي أي واحدة في عيلتها وأكتر كمان والمؤخر والقايمة وأتعهدلهم بتوفير سكن أول ما أقدر، لكن كل اللي أنا طالبه فترة خطوبة نقدر نعرف بعضينا فيها وإن شاء الله في آخرها أقدم الشبكة ونعمل فرح ونتجوز على سنة الله ورسوله، وبعدين نعيش حياتنا إحنا بقى براحتنا دي هتبقى مراتي ومش هأقبل لها الإهانة
والله يا ابني مش عارف أقولك إيه، إحنا نعرض رأينا ونشوف، بس ما تآخذنيش انت هتصرف عليها منين؟
يا مولانا ما انا طول عمري بأشتغل وبأصرف على نفسي وربنا ساترها معايا وأديك شايفني أهو متفوق والحمد لله، وبعدين ربنا موجود ولا احنا بنقول الأرزاق على الله كده وخلاص ؟!
مش ربنا رازقني ورازقها يبقى بكره هيرزقنا ويوسعها علينا
طب ويا ابني لو ربنا رزقكم بعيال ما تآخذنيش يعني هتتصرف إزاي ؟
الحتة دي هنحاول نأجلها شوية لغاية ما ربنا يدينا سكن دائم ، أما لو ربنا اراد فإن شاء الله كل مولود بييجي برزقه ويمكن يكون فتحة خير والسكن يفرج على إيديه
والله يا أحمد4 الكلام اللي انت بتقوله سليم مية في المية بس صعب أبوها يقبله
أصله كلام جديد يا ابني واحنا مش متعودين عليه، هتقولي شرع ربنا أقولك صحيح هتقولي حلال أقولك مااختلفناش - لكن هنقول إيه بقى ما احنا بقينا بنسهل الحرام ونصعب الحلال!!
يعني دلوقتي إنت حضرتك شايف إن الصح إني أستنالي عشر ولا خمستاشر سنة تاني علشان أمشي في الحلال، هو إما أعيش محروم أحلى سنين عمري أو أمشي في الحرام
ما ينفعش أقضيها حلال
الشيخ السني قعد يفكر ويجيبها يمين يجيبها شمال وبعدين لما عرف عنوان البنت منى4 راح اتبسط وقال لأحمد4: اسمع انا أعرف واحد هناك في المسجد القريب منهم من إخوانا السنيين أمات دقون
أنا هأكلمهولك وأوضحله الموضوع كله وأقوله أحمد4 ده زي إبني تمااااام وهو هيعمل اللي يقدر عليه
إيه رأيكم
لو انت عندك بنت أو أخت وانت ولي أمرها واتعرض عليك الكلام ده تتمنى بنتك تكون منى رقم كام
وممكن توافق على عرض أحمد4
وانتوا رأيكم إيه اللي حياته هتكون أفضل
أحمد ومني رقم 1 ، 2 ، 3 ، 4
[/justify]