تجربة قيادة لانسر بومة لمسافة 500 كم

**SAMEH_FOUAD** · 17-09-2011 07:58 PM

طبعا ناس كتير هتستغرب اية علاقة اللانسر بالهوندا , بس انا عملت الموضوع دة عشان بجد حسييييييييييييييييييييت بحاجات كتير اوى لازم اقولها واللى هاقولة دة عرفنى فعلا مميزات الهوندا وعيوبها بكل وضوح قصاد سيارة احدث منها ب15 سنة

بسم الله الرحمن الرحيم

الاول انا كنت مسافر امبارح بسيارة لانسر بومة موديل 2007 1600 سى سى اتوماتيك بدون DS السيارة حالتها ممتازة يعنى نظيفة ومعمولها الصيانات اللازمة مافيش اى مشاكل

طبعا انا ركبت عربيات كتير بس انى اركب عربية للمسافة دية محصلش قبل كدة بس اهوة ركبت ودية التجربة

العربية انا ركبتها عادى مالاحظتش فرق بينها وبين الهوندا غير الاختلاف فى وضعية الجلوس لانها اعلى والعربية من جوة اوسع شوية من الهوندا ودة طبعا ناتج عن الارتفاع فى السقف عن الهوندا , كل حاجة زى ماهية الابعاد واحد العرض يمكن الهوندا اعرض

* العربية صوت ماتورها هادىء جدا على السلانسية , تقفيلها كويس

وما ان بدأت فى الانطلاق وبدوس دوسة البنزين الطبيعية فى الهوندا , العربية بطيئة جدا ولازم عشان اجرى يبقى اعمل حاجة من الاتنين يأما اسايس العربية لحد ماتعدى حاجز ال100 يأما اعمل كيك داون عشان العربية تجرى

الفرامل اداءها متوسط غير الهوندا نهائى

العربية على طريق السفر مزعجة جدا وغير مريحة نهائى للمسافات الطويلة بعكس الهوندا لما كنت بسافر بيها بحس انى ملك الطريق بروح شمال ويمين فى اى وقت والعربية اقل دوسة بنزين بطيرها على فكرة انا بتكلم عن الهوندا ال1600 الاتوماتيك مش بتكلم عن ال SiR عشان تكون المقارنة عادلة
كمان العربية غير ثابتة فى المنحنيات بعد ال120 ومطبات الهوندا بعكس الهوندا كنا بنمشى 160 170 غرز وشمال ويمين ومافيش اى حاجة انت بتحس بيها

الحاجة الوحيدة اللى كانت مريحانى فى العربية دية انى ماكنتش شايل هم مطبات او اى حاجة مفاجأة بعكس الهوندا كنا بنشيل هم اى حاجة فى الطريق نظرا لاقتراب السيارة من الارض خصوصا مع التحميل

المشكلة كمان اللى واجهتنى فى اللانسر هية صوت الهواء المزعج جدا والتجميع البطىء قوى بعد سرعة 140 بعكس الهوندا نهائى

وانا راجع كنت بشد مع لانسر بومة ايضا 1600 وهو كان طلع الاول وانا دايس لغاية الاخر العربية حالفة ماتجيبة وبعد كدة وقفنا وانا اللى طلعت الاول المرة دية وبردة عربيتة حالفة ماتجيبنى

فى النهاية انا طلعت من المقارنة دية بنقط مهمة جدا وهية :

عيوب الهوندا : صعب تجرى بيها وانت محملها تحسبا لاى مطب مفاجىء او حتى مطب هوا
التعود على الثبات المفرط وقوة المحرك شىء سىء فعلا
كان نفسى سقف العربية يعلى شوية , ساعتها العربية دية كانت هتبقى اسطورة

مميزات اللانسر : مش هتمشى وانت مقلق طبعا المشى الطبيعى لان فعلا العربية كنت راكبها ومش حاسس بأى خوف من ناحية المطبات وفعلا احساس حلو
- العربية مساحتها معقولة جدا جدا ومناسبة اوى ومن راى اوسع من الهوندا من ناحية الفرق مابين رجل الراكب الخلفى وكرسى السائق بس مش للدرجة بس اوسع وحتى مع الارتفاع دة بردة رأس الراكب الخلفى قريبة جدا من السقف , العربية عرضها صغير يعنى كانوا ثلاثة راكبين ورا اتنين رفيعين وواحد مليان شوية خفيفة والباب اتقفل بالعافية
- العربية عفشتها كويسة لكن ناشفة قليلا

مميزات الهوندا : ثبات تحفة بجد بيخليك تملك الطريق , محركات تحفة وقوية جدا حتى بعد مرور 15 عاما على تشغيلها , مريحة جدا فى السفر ومافيش اى ارهاق يذكر , ناعمة جدا ودة راجع لانك مش بتحتاج تضغط على البنزين عشان العربية تجرى

عيوب اللانسر : غير ثابتة على السرعات العالية , استجابة محرك بطيئة , غير مريحة للقيادة فى المسافات الطويلة لكل الركاب لانهم تعبوا من اول 80 كم بالظبط سواء انا او الراكب اللى جنبى او الخلفيين , العدادت قرائتها فى غير مستوى الرؤية + الطارة متعبة جدا جدا جدا جدا جدا للصبح اربع ازرع مش متوزعين بشكل مناسب نهائى كمان مع السرعة العالية وعايز اشغل النور او ادى رعاش بقيت بروح بأيدى التانية لانى خايف اشيل ايدى من على الطارة
لكن الهوندا فى الموضوع دة بجد 10\10 تمسك الطارة بأيد واحدة تضرب كلكس وتشغل كل حاجة من غير ماتشيل ايدك نهائى وفعلا هية دية سواقة الهوندا الرياضية ماتشغلكش عن الطريق نهائى

من الاخر : الهوندا سيارة رياضية فى المقام الاول وعائلية فى المقام الثانى

اللانسر : عائلية جدا فى المقام الاول , لا اميل لها من الناحية الرياضية نهائى الا بتعديلات كتير

معلش طولت عليكوا ياهونداية بس انتوا معاكوا كنز اسمة هوندا

**al_manara** · 17-09-2011 08:29 PM

اتفق معاك بخصوص الاستجابة للانسر بعد ال 100 . بطئ جدا
انا جربتها في سفر مانيوال واوتوماتيك . المانيوال بتاعها ما شاء الله رائع جدا جدا .
وكمان سوقت الهوندا كتير لانها مع واحد صاحبي si واستجابتها فعلا جميلة ما شاء الله .

اختلف معاك في الراحة . اللانسر اريح في السفر . انعم كتير من الهوندا 92
الطارة في اللانسر غبية فعلا . الهوندا انعم واريح .
الثبات الهوندا بالفعل تتفوق .

**OmaR_FekrY** · 17-09-2011 08:32 PM

ايوه يا سمسم هو ده الكلام المظبووط

بس يا وائل الشارك مختلفه تماما عن البومه ... انا ركبت و جربت الاتنين ... البومه كلام سمسم عليها صح 100 %
و لو ركب الشارك هيغير فكرته عن الميتشوبيشى

و بالنسبه لموضوع السقف الواطى عندنا فى الهوندا ... دى بقى احلى ميزه بالنسبه الى .. بحس العربيه و انا بعدى من جنب الناس انى راكب f1

**SAMEH_FOUAD** · 17-09-2011 09:43 PM

المشاركة الأصلية كتبت بواسطة al_manara

اتفق معاك بخصوص الاستجابة للانسر بعد ال 100 . بطئ جدا
انا جربتها في سفر مانيوال واوتوماتيك . المانيوال بتاعها ما شاء الله رائع جدا جدا .
وكمان سوقت الهوندا كتير لانها مع واحد صاحبي si واستجابتها فعلا جميلة ما شاء الله .

اختلف معاك في الراحة . اللانسر اريح في السفر . انعم كتير من الهوندا 92
الطارة في اللانسر غبية فعلا . الهوندا انعم واريح .
الثبات الهوندا بالفعل تتفوق .

انت اكيد سوقت ال si ال2 كامة بدون vtec لان دة الماتور الوحيد الخشن فى الهوندا لكن لو سوقت ال1 كامة او الوحش ال sir اللى بجد انعم واحد فيهم وقوتة صاروخية كنت غيرت رأيك

على فكرة انا نسيت اقول كمان حاجات

1- الطارة معمولة من مطاط غريب الشكل بيخلى ايدى تعرق بطريقة فظيعة بعكس الهوندا نهائى

2- العربية اضاءة التابلوة بتاعتها وحشة جدا بجد تحس ان الجزء ناحية اليمين دة كلة فاضى , حتى لمض نقلات الفتيس ضعيفة غير الهوندا نهائى اصلا شكل التابلوة + نور جهاز التحكم فى التكييف + نور الانتظار , ونور الساعة اللى فيها خاصية انك ممكن تعرف الساعة كام من غير ماتفتح الكونتاكت بعكس اللانسر اللى لازم تدور

3- درج التابلوة صغير , المرايات رؤيتها وحشة , النور الابيض الخاص بالريفيرس ضعيف يعنى كانت الدنيا ضلمة كحل ومش حاسس ان النور الابيض كاشفلى اى حاجة اقدر اشوفها
بعكس الهوندا لما النور بتاعها بيشتغل بيكشف جزء كبير جدا للعربية وخصوصا المرايات وبجد دية ميزة فى العربيات المنخفضة انك بتشوف كل حاجة فى الارض عن قرب وبتبقى التحكم فيها ممتاز

4- العفشة الخلفية ناشفة

5- عداد الحرارة لازم تكون حافظ مكانة كويس لان اى ارتفاع مفاجىء للحرارة ولو بشرطة بسيطة مش هتعرف لان مافيش علامات تحديد المؤشر مكانة المظبوط فين

6- الباور بتاعها كويس فى الركن بس للاسف بيخف مع السرعات جدا بعكس الهوندا مع انة زيت بس تحس انة بيتقل مع السرعات ودة طبعا ناتج عشان الحساس اللى موجود فى طلمبة الباور وطبعا اغلب الناس ماتعرفوش

عموما اعتقد ان السوبر اكشن ممكن تتفادى بعض العيوب دية وان ماكنتش اغلبها بس بردة التقييم دة مش بيقلل من اللانسر بس المشكلة قد ماحنا عازيين نعرف مين اللى يقدر يتحدى الهوندا لحد سنة 2008 طبعا انا اقصد الجيل الخامس والسادس لان دية اكتر سيارات ممتعة جدا فى القيادة

على فكرة انا سوقت كمان هيونداى ماتريكس اخر 2010 الشكل الجديد بجد كل اللى اقدر اقولة .................. ؟؟ خمنوا بقى

**SAMEH_FOUAD** · 17-09-2011 09:48 PM

المشاركة الأصلية كتبت بواسطة omar_fekry

ايوه يا سمسم هو ده الكلام المظبووط

بس يا وائل الشارك مختلفه تماما عن البومه ... انا ركبت و جربت الاتنين ... البومه كلام سمسم عليها صح 100 %
و لو ركب الشارك هيغير فكرته عن الميتشوبيشى

و بالنسبه لموضوع السقف الواطى عندنا فى الهوندا ... دى بقى احلى ميزه بالنسبه الى .. بحس العربيه و انا بعدى من جنب الناس انى راكب f1

ياباشا انا مش بتكلم ان السقف وحش بالعكس انا بتكلم على نقطة ان السقف دة لو على شوية كانت العربية دية اصبحت اوسع عربية فى فئتها بجد + انها هتاخد شريحة كبيرة جدا شباب وعائلات لان اغلب الناس الكبيرة مش بيحبوا يركبوها عشان انها واطية

فطبيعى لو كان سقفها اعلى كان الكرسى بقى ارتفاعة اعلى

لكن انا عايز اقولك انا بعشق اصلا العربيات اللى بشكلها كدة لانى عارف حاجة واحدة انها بتبقى رياضية جداااااااااا وبيحافظ عليك عن طريق الثبات العالى + الايرودينامك

**SAMEH_FOUAD** · 17-09-2011 11:44 PM

المشاركة الأصلية كتبت بواسطة yones

أولا بجد ياسمسم عجبنى جدا التقرير المفصل عن لانسر بومة ومقارنتها بالهوندا بجد مفيد قوى

معاك حق فعلا الباور في الهوندا بيفصل بعد سرعة 100 عشان زيادة الثبات ودى تقريبا مش موجودة فى عربيات كتير
وانا متوقع رأيك فى الماتريكس 2010

برضه بتفق معاك جدا فى النقطة دى لان الهوندا الطارة فيها كذا زرار للكلاكس متوزع بشكل مريح جدا لليد بحيث سواء بتسوق باليمين او الشمال اوحتى بالاتنين تقدر تتحكم احسن تحكم ممكن ده غير نعومة الباور والكلاكس مش فى نص الطارة زى الغالبية العظمى للعربيات

يونس باشا اخبارك اية ياباشا

اكيد طبعا انت توقعت رأى فى الماتريكس

بالنسبة بقى للطارة بتاعة اللانسر هية المشكلة كمان انك لو ماشى سريع شوية مثلا 120 او 130 وحبيت تدى نور او رعاش محتاج حاجة من الاتنين يأما تبعد ايدك كلها وطبعا خطر جدا على عربية زى اللانسر انك تعمل كدة لانى جربت كدة فعلا وحسيت ان العربية ممكن تحدف منى , والحل التانى انك تروح بأيدك التانية على الرعاش وطبعا حركة غريبة بس أأمن ودة اللى انا فضلت اعملة

كمان اصلا مسكة الطارة نفسها غريبة يعنى الطارة فى الهوندا الصراحة قمة التحكم فى كل شىء واحسن توزيع لاى وضعية . ودة شىء مريح فعلا ليك لان مافيش تشتيت والطريق كلة انت مابتخرجش فكرك عنة , بجد انا سافرت بعربيتى واقسم بالله محسيت بأى حاجة وكنت مشغل التكييف ولا اى حاجة وكان معايا واحد صاحبى لما كان بيسافر فى اى عربية كان على طول بطنة بتقلب ركب معايا وهو عارف ان بطنة هتقلب بس كان مضطر انة يسافر وفضلنا ماشيين مستنين مافيش اية ياعم انت خفيت ولا اية راح قايل طيب استنى كدة اما اجرب اكل وفعلا كل ولا الهوا , وبعد ماوصلنا قالى تصدق انا محستش بأى حاجة ولا كأنى مسافر اصلا وانا كنت نازل عادى جدا ولا كأنى سايق , بعكس اللانسر تعبتنى جدا من اول ساعة سفر

عموما الهوندا هوندا يامان

**mazagngi2010** · 18-09-2011 12:15 AM

5- عداد الحرارة لازم تكون حافظ مكانة كويس لان اى ارتفاع مفاجىء للحرارة ولو بشرطة بسيطة مش هتعرف لان مافيش علامات تحديد المؤشر مكانة المظبوط فين
------------------
دايما كنت بفكر فى النقطه الغبيه دى

-

الموضوع: تجربة قيادة لانسر بومة لمسافة 500 كم

LinkBack

أدوات الموضوع

عرض

-

-

-

المواضيع المتشابهه

تجربة قيادة :: كيا سيراتو ::

[فيديو] تجربة الشد مع لانسر بومة cvt

تجربة قيادة القاشقاى

اختبار قيادة الa113 لمسافة 350 كيلومتر

تجربة قيادة نيسان صني

الكلمات الدلالية لهذا الموضوع

المفضلات

المفضلات

ضوابط المشاركة