الموضوع: حكايتى مع مودرن موتورز الحضرة من الالف الى الياء

دى كانت مشكلتى فى عربيتى نيسان صنى 2011 شاريها من شهر 8/2010 سوبر صالون ويمكن بعض الاعضاء كان معاصر للمشكلة بس محدش عرف باقى الموضوع .

بداية المشكلة

المشكلة للى ما يعرفشى بدأت بصوت زى تكة صغيرة كده كنت بسمعها على فترات متباعدة داخل صالون العربية تقريبا اشبة بصوت حاجة بتخبط فى فيبرات العربية الموجودة داخل الصالون

الغريب ان الصوت على الرغم من انه واضح ( على الاقل بالنسبة لى ) وخصوصا انى بركز فى الحاجات دى قوى ولازم اعرف مصدرها ايه , بس ما كنشى ليه سبب معين فى ظهورة
ممكن يظهر فى مطب خفيف , وممكن ما يظهرشى اصلا
ممكن ما يظرشى فى مطب جامد , وممكن يظهر فى مطبات الهواء اللى على الطريق
ممكن يظهر فى مشوار قصير , ووممكن امشى مشوار سفر ويظهر فيه مرة او مرتين

وطبعا هنا ظهرت المشكلة
انا متأكد من حدوث الصوت ,
وفى نفس الوقت مش عارف اروح اقول ايه للتوكيل
لان اكيد حيقولولى نطلع نجرب ووممكن ما يحصلشى الصوت وبالتالى حيبقى شكلى وحش .
وفضلت ساكت بس من جوايا متضايق جدا لانى مش عارف امسك المشكلة بايدي .
وخصوصا انى عندى شعور داخلى ان سبب الصوت مش طبيعى .

اول زيارة لمودرن موتورز الحضرة

المهم فى مرة من المرات حسيت ان العربية بتحدف معايا ومش مظبوطة والمفروض ان مضبط هواء الكاوتش كويس .
فقولت ممكن تكون الزوايا فحجزت ميعاد فى التوكيل وروحت اضبط زوايا .

فضلت العربية حوالى ساعتين والفنى المسئول ( كان على فكرة متعاون جدا ) قالى العربية ما كانشى فيها حاجة وغير مكان الكاوتش وضبط الهواء ( ودا طلع سبب الحدفة الحقيقة وانا كنت مستبعدة بس العداد كان باين عليه غلط )
المهم طلعنا نجرب العربية ولقيت كلة تمام
وظهر الصوت اللى منغص على حياتى .
قولت للفنى انت سمعت الصوت ده
قال ايوة
وغالبا دى لازم السمكرى اللى يبص عليها .

روحنا للسمكرى بعد ما جربنا العربية قالى دى لازم تيجى من اول اليوم علشان ابص عليها

ثانى زيارة لمودرن موتورز الحضرة

روحتله بعدها وجرب وطلع مع نفس الفنى اللى كان ظبط الزوايا قبل كده وانا ما كنتش معاهم
المهم الراجل حاول بقدر معرفته وفى حدود امكانياته وقالى نمر العربية كانت مهزوزة وانا ثبتها لك, طبعا كلام لم يقنعنى وقالى تعالى نجرب روحت نجرب وبردة مش مقتنع لان ممكن اصلا الصوت ما يطلعشى لانه مش مستمر ومالوش قاعدة معينة .

وعدى اليوم على كده وانا حاسس ان الصوت برده حيطلع وانا مروح , ودا اللى حصل فعلا

ثالث زيارة لمودرن موتورز الحضرة

حجزت يوم تانى وكان بالصدفة فيه حملة صيانة مجانية قولت اعمل الاتنين
المرة دى الراجل فك الكنبة الخلفية , وفرش الشنطة بالكامل وقعد ورا وجربنا لمدة طويلة
وكل مرة يثبت كابل مثلا او جهاز الباركينج سينسور وبرده ما فيش نتيجة ,
والراجل ماهوش عارف يعمل حاجة والمركز عليه ضغط رهيب بسبب حملة الصيانة المجانية .
وللاسف الاهتمام كان سئ جدا, والراجل عمال يخوفنى ان هما يفكوا الفيبرات اللى فى الصالون او السقف علشان ممكن تبوظ

حسيت ان اليوم مش حيرسى على حاجة ومافيش حد فاضيلى , وان هما حاسين ان المشكلة بسيطة , طبعا ممكن يكون مر عليهم حاجات زى كده كتير وطلع فى الآخر حاجات هايفة , او واحد ناسى حاجة فى درج فى التابولة او كده ودا اللى انا حسيته
مشيت على اساس اجرب تانى واشوف لعل وعسى تكون حاجة من اللى ثبتوها
طبعا برده الصوت ظهر وموجود زى ما هوه

تجربة مركز شكاوى نيسان

قولت ما بدهاش .
اتصلت ب 16244 ¸مركز شكاوى نيسان وحكتلهم على الموضوع كلمة كلمة وهما سجله كلامى بحذافيرة
قالى الموظف فى خلال 72 ساعة حنرد عليك
وفعلا اللى رد على فى نفس الفترة اللى حددوها كانت مودرن موتورز الحضرة
وحددوا لى ميعاد علشان يفحصوا العربية تانى
وقد كان

موقف صعب

رحت لقيت مدير المركز شخصيا موجود وهو اللى طلع معايا
وعلشان الصوت يطلع
ابدا!!!!!!!
وعلى الرغم من انى كنت مشغل التكييف الا انى فعلا كنت اتصبب عرقا من الموقف
وطبعا مدير المركز عايز يرجع ,
وبدا فى التهكم بطريق غير مباشر بالطبع وانا من جوايا بدعى ربنا انه يطلعنى من الموقف ده
وفجأه ظهر الصوت .
قولتله هوا دا الصوت يا باشمهندس
وطبعا اعقب ظهور الصوت فترة صمت منه
بعدها ظهر تانى
قولتله ظهر تانى
رد قال لا خلاص انا عارف دا ايه

وطبعا كان تشخيصة ان دى بنطة لحام مش ملحومة فى الصاج فى القايم اليمين
حاجة كده زى الصاج الموجود فى شنطة العربية لما تشيل الفرش
المهندس طبعا قالى المسكلة مش حتتصلح عندنا لازم العربية تروح المصنع تانى تتعمل هناك
انا فعلا كنت مستغرب على قد ما كنت مستريح
مستريح لانى اخيرا مسكت المشكلة بايديا , وكمان لانها حتتعمل فى المصنع ودى تخلى اى تصليح فى العربية زى اى عربية جديدة ولا كأنها اتصلحت .
الاستغراب بقى انهم ايه ما صلحوش العيب عندهم والمفروض انهم عندهم امكانيات كبيرة .
عموما طبعا اخدوا نمرة تليفونى علشان حيجيبوا كساحة تاخد العربية لحد المصنع لانى رفضت نهائيا ان حد يسوق العربية غيرى , وانا عموما ما فيش حد بيسوق عربيتى غيرى
كمان ما قدرشى انى اروح بالعربية المصنع وعموما ههما كانوا متعاونين جدا معايا واسلوب راقى جدا فى التعامل ,حتى قبل ما يوصلوا لحل المشكلة بصراحة كانوا قمة فى الرقى فى التعامل بغض النظر عن اى حاجة تانية .
المهم
انا كنت متوقع يتصلوا بى على طول والكلام دا كان قبل رمضان باسبوع تقريبا
طبعا ولا حد اتصل ولا غيره واتركنت حوالى 25 يوم وكنت على اتصال مستمر معاهم وحسيت ان المواضيع وقفت واتصلت كذا مرة تانى بنيسان علشان يضطوا والموضع يتحل .
طبعا الواضح ان المصنع كان اجازة الفترة دى وكا بيضبط المكن بعد الاجازة ودى نقطة مافيش يد لمودرن موتورز فيها بالامانة بس انا ما كنش عندى صبر ودى طبيعة اى حد عندة مشكلة فى عربيته .

الحمد لله بدأت تتحل

كلمت اخويا احمد مصطفى ودى تقريبا اول تعامل مباشر بينى وبين احمد مصطفى وحسستنى قد ايه الانسان دا جوا خير وبيحب يساعد الناس لمجرد المساعدة بدون مقابل مادى او معنوى .
وطبعا احمد باتصلاته مع مودرن فى فرع ابو رواش حرك المياه الراكده مرة تانية وبدأت اخد ميعاد محدد بعد اجازة العيد .

وقد كان بعد متابعة مستمرة من احمد فى ابو رواش , ومتابعة منى فى اسكندرية اتصلوا بى بعد تحديد المصنع لميعاد واتنقلت العربية على كساحة للمصنع الاسبوع اللى فات والحمد لله العربية جت يوم الخميس وزى الفل والواضح انهم عملولها تفتيش شامل وعدت على مراحل كوالتى كنترول كامل ودى كانت باينة من وضع الدركسيون ووضعية الكراسى وحالة العربية عموما .
طبعا انا حبيت اسرد تجربتى بالتفصيل الممل اكيد ممكن حد يستفيد من تجربتى .
التجربة فيها من السلبيات والايجابيات وانا عموما حبتدى بالايجابيات قبل السلبيات

ايجابيات

اولا : اتعرفت على شخصية زى احمد مصطفى ودى اكبر ميزة فى الموضوع , لان كمان اتشجعت انى احضر مقابلة نيسان يوم الجمعة واتعرفت على شخصيات محترمة جدا يندر انك تلاقيها فى تجمع واحد

ثانيا : تعامل التوكيل راقى حتى آخر لحظة وان كان يبدو ان فى بعض الاحيان انهم بيطنشوا العميل لكن احنا كاصحاب سيارات عموما ما عندناش صبر او تحمل للانتظار ولاز طبعا التوكيل يراعى النقطة دى فى حدود المتاح .

ثالثا : شركة نيسان ايجيبت هى السبب الرئيسى فى تقديم افضل خدمة للعميل ( برده فى حدود المتاح مقارنة بباقى التوكيلات ) بسبب رقابتها المستمرة على مراكز الخدمة سواء مودرن او السبع او اى مركز آخر وفعلا مش بيهملوا اى شكوى .

نيجى للسلبيات

سلبيات

اولا : حملة الصيانة المجانية اضرت مودرن موتورز اكتر ما نفعته لان الضغط كان جامد جدا وفوق طاقة المركز وعدم الاهتمام كان واضح بسبب الضغط واعطت انطباع غير جيد للعملاء .

ثانيا : بعض الخبرات فى مودرن موتورز ليست على المستوى المطلوب , والمفروض ان تلقائيا لما العميل يرجع مرة تانية بنفس العيب يطلع معاه مهندس مش نفس الصنايعى اللى طل معاه اول مرة او حتى يطلع صنايعى اكثر مهارة .

الحمد لله انتهت مشكلتى وجربت العربية يومين وكله تمام
والف شكر للخلوق احمد مصطفى وربنا جازيه خير باذن الله ويرزقه من حيث لا يحتسب

سؤال لاخذ الاراء ليه مودرن موتورز ودوا العربية المصنع ومعملوهاش عندهم على الرغم من تكلفة النقل اللى هى طبعا على المصنع , وهل هناك فرق بين تصليح المصنع وتصليح مركز خدمة معتمد ؟؟؟؟ .


----------------
ممنوع الكتابة باللون الاحمر .. لانه مخصص للمداخلات الادارية
يرجى مراجعة قوانين وقواعد المنتدى
م15ب
----------------
تنبيه :

تحية وتقدير من ادارة الموقع للعضو على طرحه لمشكلته باسلوب راقى ونقد بناء
ويعتبر طرحه لمشكلته نموذج يحتذى به لانه قائم على الموضوعية بعيدا عن التهكمات
والتجريح بالغير والخروج عن اداب الحوار