مشكلة فتيس بيجو 504 هايجننى

**SPIDER20055** · 18-09-2011 03:49 AM

اعزائى المختصين فى نايل موتورز ....اغيثونى
انا ورثت عربية بيجو 504 مو 79 جى ال عن والدى الله يرحمه والكرة الارضية كلها بتنق على العربية واجمعت على ان العربية جديدة وانا اللى بتدلع
بس والله العظيم العربية مبهدلانى اخر بهدلة وانا زهقت وهابيعها ..بس قبل ما ابيعها نفسى اصلحها عشان مبحبش ابيع حاجة بايظة بستحرم الموضوع ده وبردو عشان محدش يبخس تمنها
الموضوع باختصار فى الفتيس او الدبرياج مش عارف
الفتيس كل فترة بحالات :مرة واحدة الاقى العصاية بتاعة الفتيس مش عاوز تاخد ولا غيار نهائى بتعض خصوصا فى الغيار الاول والثانى
طبعا بعد اللف كعب داير على الميكانيكية اللى للاسف مفيش حد قابلته بيفهم فيهم لغاية النهاردة حتى اللى فاتحين بيجو بس ومبيشتغلوش غير فيها
غيرت مجموعتين دبرياج كاملين وخلونى شيلت المجموعة الاصلية بتاعة العربية بسبب فتى واحد فيهم وغيرت مساتر دبرياج حوالى اربع مرات فوق وتحت واتياش وكل مرة اغير حاجة العيب يختفى مؤقتا ..اقول خلاص الحمد لله ..فجأة يظهر تانى
بيبان اكثر لما العربية بتسخن والطريق يقف
سبحان الله لما امشى على غيار الثالث او الرابع فترة والطريق مفتوح الاقى بعد كده كل الغيارات زى الملبن ..مرة واحدة الطريق يقف ..ترجع العصاية تقفش تانى
حطيت زيت فتيس خفيف وتقيل ..مفيش فايدة
نزلت الزيت خالص وحطيت جديد ..مفيش فايدة
واحد قاللى عصايتك موديل قديم ..عدلتها ..مفيش فايدة
واخر حاجة حصلتلى معاها ..انها بتاخد الغيار ويبات العصاية فى الغيار واسيب رجلى وادوس بنزين ......صوت الموتور يعلى والعربية مبتتحركش كانها متحجرة...ومرة واحدة اسمع من تحت العربية صوت ((((((((طق))))))) تروح ماشية ....هههههههههههه
انا زهقت والمفروض يوم الاتنين رايح لمفتى ميكانيكى جديد وصفهولى واحد ..افتى وقال ان ديل الفتيس ملحوم معووج ومخلى الاتياش مش عدلة فمفيش سوستة كفاية للغيار الاول والثانى
انا تعبت بجد ديه خامس مرة اشيل فيها الموتور وطبعا انتم عارفين شيل الموتور يعنى ايه ..يعنى مفيش حاجة بترجع مطرحها + انى عامل لها تكييف فطبعا بيطيرولى الشحنة غصب عنهم.....ومصنعيات..................
اسف للاطالة ..رجاء افيدونى قبل الذهاب للميكانيكى يوم الاثنين

**mohammedabdallh** · 18-09-2011 12:09 PM

طب ما تنزل الحرفيين تغير فتيس احسن وريح نفسك
انا كان معايا واحده طلعت عين اهلى وفى الاخر بعتها برخص التراب وبعد كدا الى خدها ظبطها ومشية معاه حلاوة متخليش فتى الكانيكيا يبيعوك العربيه علشان ال 504 بجميع انواعه ملوش حل فى اى ظروف وفى اى مكان اسالنى انا
او روح لواحد متخصص فتيس بس يكشف عليه ويقولك هتعمل ايه

**amrelsaqqa** · 18-09-2011 12:56 PM

موضوع صوت الموتور يعلى وتعمل "طق" مرة واحدة وتتحرك
ده بيأكد انه دبرياج وتحديدا الديسك ان شاء الله

بس طبعا لو هتغير هتغير طقم الدبرياج كله وتجيب نوع اسمه luk
هيعمل 500 جنيه او اكتر شوية

**SPIDER20055** · 18-09-2011 02:58 PM

متشكر يا جماعة على ردودكم واهتمامكم ...بس انا قلت فى الموضوع انى غيرت مجموعتين دبرياج بسبب العيب ده بناءا على تشخيص الميكانيكية ، غير المجموعة الفابريقة بتاعتها..دسك+اسطوانة+بلية ..وكل مرة يغيروا فيها المجموعة ..تطلع المجموعة القديمة من العربية جديدة ..يروح الميكانيكى باصص كده ويتأمل ويقول: كانت هتبوظ منك قريب والاسطوانة بدات تتاكل والدسك كان هايحجر معاك....ثم ينهى كلامه قائلا : بس الطقم الجديد احسن لك عشان تبقى ماشى مطمئن
وبعدما اغير يروح العيب ويرجع تانى
اخر مرة لما طلعت الماتور ..قاللى الفتيس ضارب اولسيه بيجيب زيت تقريباً ...فعمله وراح عند الخراط ولحم القاعدة تقريبا بتاعت الفتيس ديه ..اللى الميكانيكى التانى دلوقتى بيقوللى ديه سبب المشكلة وملحومة معووجة
الشاهد فى الموضوع : انه قعد ساعتها يلف الفتيس بايده كده وقاللى انه فابريقة بالقاف والتروس ممتازة وناعم جدا جدا ..وهو فعلا فتيسها محدش فكه قبل كده

معلش نسيت اقول لكم على حاجة تانية ..انا دلوقتى لما بامشى طبعا على عيبها كده باديها الاول -لو جه طبعا -ثم الثالث عشان التانى بيبقى زعلان جدا ومش عاوز ييجى ههههههههه....باسمع صوت من تحت الكرسى بتاعى سبحان الله غريب ...شخشخشخشخشخشخش.....غير صوت كركرة البيجو المعروف بتاع المطالع

يكونش في حاجة فى عمود الكيردان ؟؟؟؟ انا حاسس ان فيه جزء ربط بين الموتور والفتيس وعمود الكيردان ..حلقة الوصل بين الثلاثة حاسس فيها مشكلة ...حد يعرف ايه اللى بيربط بينهم ؟؟؟

يا جماعة انا بتعامل مع محمد ندا فى شارع الاربعين وعزت بتاع البيجو برضو اللى فى سنان فى الزيتون ..والميكانيكى بتاع بكرة واحد قاللى عليه شاطر فى العمرانية فى شارع التلاتينى هرم- انا بلف مصر زى ابن بطوطة وخدت اجازة من شغلى وفلوسى كلها رايحة على العربية ..باصرف عليها والله اكتر من مراتى وبنتى..وياريته بفايدة ..شوية مارش وشوية تكييف وشوية فتيس .....

حد يعرف ميكانيكى امين وشاطر ...؟؟؟ بس بلاش بتوع الاستنتاجات ..على راى الاستاذ السقا حافظين مش فاهمين ...لو بتنتش يبقى بوجيهات...وهكذا
معلش طولت عليكم

**mohammedabdallh** · 18-09-2011 03:06 PM

لو تعرف تيجى المنوفيه عندى هنا ميكانيكى ملوش حل انا ياما دخلتله بالعربيه بايظه بخرج م عنده حاجه تانيه خالص وجنبه واحد بتاع فتيس بس برضه استاذ وجنبه على طول واحد بتاع لحام
يعنى كل الى انت عاوزة فى منطقه واحده وكلم بيشتغلوا مع بعض دى اهم حاجه مش واحد يبعتك فى حته وبعد كدا يقولك اعيب منه
لو فاضى تعالى وانا هظبطلك العربيه هترجع بيها ان شاء الله حاجه تانيه

**lovely_love** · 18-09-2011 05:00 PM

بص حضرتك الموضوع انا مش عارف افسره اوى بصراحة ومش عاوز افتى بس هقولك على حاجة احنا كان عننا اتنين 504 واحدة اتسرقت والتانية موجود ومفيش غير ميكانيكى واحد بس بنتعامل معاه من حوالى 20 سنة ومش بعيد عنك هو يعتبر فى مصر القديمة واسعاره كويسة اوى لو حبيت ممكن اوصلك لية او حتى اجى معاك انا تحت امرك مفيش اى مشاكل

**SPIDER20055** · 19-09-2011 12:22 AM

متشكر يا جماعة على اهتمامكم ومساعدتكم

**Unendlich** · 21-09-2011 07:59 PM

طب إيه رأيك في المكان ده ؟ :)

الموضوع: مشكلة فتيس بيجو 504 هايجننى

LinkBack

أدوات الموضوع

عرض

-

-

-

المواضيع المتشابهه

مشكلة فتيس بيجو 504

مشكلة فى فتيس بيجو

سعر اللوجان الجديدة هايجننى

مشكلة فتيس الكرولا الجديدة مشكلة عالمية على النت

الكلمات الدلالية لهذا الموضوع

المفضلات

المفضلات

ضوابط المشاركة