الموضوع: سحبوا مني سيارتي الزيرو بعد نصف ساعة من استلامها

كان في مرة ملك كان عنده وزير ملازمه في كل مكان وكل لما تحصل حاجة كان الوزير يقول عساه خيرا انشاء الله
وخرج الملك في رحلة من رحلاته للصيد ومعه الوزير وصباعه اتقطع وهو بيصطاد والوزير كان معاه وقال عساه خيرا انشاء الله
غضب الملك وأمر بسجن هذا الوزير
ولما دخل السجن سأل الملك عن حاله فعلم انه قال حين دخل السجن قولته الشهيرة عساه خيرا انشاء الله
وفي رحلة اخري من رحلاته للصيد خارج حدود مملكته وقع اسير في يد جماعة من عباد الشمس وقرروا اخذ الملك قرباناً للاله بالكشف عليه وجدوه مشوه ولا يصلح قربانا لقطع اصبعه وحينها تذكر قولة وزيره "عساه خيراً انشاء الله"

عاد الملك علي الفور لمملكته وامر بالأفراج عن الوزير وسأله لماذا قولت عساه خيرا انشاء الله حين دخولك السجن
فرد الوزير ضاحكا لأني لو كنت معك لكنت قربانا للاله بدلا منك

تمت ،،

عساه خيراً أنشاء الله

انا ليا بصراحة كام تعليق اتمني تتقبلهم بصدر رحب

رقم 1 انا كمان عملت زيك (استلمت عربيتي بدون لوحات ولما سألت علي لوحات مؤقتة قالولي مالهاش اي لازمة يا باشا انت معاك الجواب بتاع الأستلام) وبالتالي احنا حطينا نفسنا في موقف طين بس هي بتبقي حظوظ

رقم 2 انت كان لازم يتعمل معاك الصح لأن لما مسؤول كبير يكتشف غلطة بنفسه لازم ياخد اجراء والا هيبقي شكله وحش جدا زي بالظبط لو اي اب عرف ان ابنه عمل غلطة لو سابه يبقي مؤيد فلازم ياخد اكشن يا اما يعمل نفسه مش واخد باله وكأن شيئا لم يكن لكن طالما خد باله يبقي كان لازم ياخد أكشن

رقم 3 اعتقد حقك مش هيجي بالقانون لأن عمر القانون ماهيجي فصفك لأنك من الأساس غلطان ولا يجوز العذر بالجهل وخصوصا ان واضح ان حضرتك بتعرف تسوق ومعاك رخصة قيادة وبالتالي لا مكان للعذر بالجهل وبالتالي اكفي علي الخبر ماجور لأنك ماينفعش تروح تغلط حد انه ماقالكش علي الصح (عقلك في راسك تعرف خلاصك) الصح بيبقي معروف وانت سألت علي النمر أذن انت شاكك في خطأ المشي بدون نمر ومع ذلك فرحتك بالعربية وحسن نيتك خلوك استعجلت ومشيت بدون نمر (مع أن الساعة كانت 8 ونص صباحا يعني معاك وقت كافي تروح اي وحدة مرور وتأجر نمر)

رقم 4 حالتك النفسية : انا معاك قلباً وقالباً لأني اتحطيت في موقف مشابه ليك، عملت حادثة بالعربية تسببت في كسر سور كوبري واتعملي محضر وكنت بليل في رمضان وقالولي مفيش نيابة مسائية ودخلت الحجز وبييت ليلة هناك وكانت اسود ليلة في حياتي مش قادر انساها لحد دلوقتي (واسود لحظة في حياتي لما أخويا سابني في القسم وروح ، حسيت باحساس الميت الي أهله سابوه بعد الدفن) وركبت عربية الترحيلات واتناديت بلقب "مذنب" واتعرضت علي النيابة
تجربة من أسوء ما يكون وفوق كل دة انا متضرر من الحادث بس اعتقد دة تكفير عن ذنب او قرصة ودن وربنا بيفكرك بنعمة الحرية الي من وجهة نظري من اغلي النعم زي البصر والأسلام ونعم ربنا التي لا تعد ولا تحصي

لكن هناك دروس مستفادة من تجربتي زي اني بييت ليلة كاملة بقرأ قرآن وتذكرت سيدنا يوسف عليه وعلي نبينا الصلاة والسلام لما دخل السجن

انت كمان في دروس مستفادة انشاء الله زي انك حظرت ناس كتير وعملت توعية للمطالبة بحقوقنا لما نشتري عربية جديدة
العربية دي هتبقي اغلي عربية عندك لأنك حصلت عليها بعد مشقة واوعي تتشائم منها بل بالعكس بصلها علي انها حسد من الجيران او المعارف الي الواحد مش هيتقدم خطوة طول ما في ناس كدة

رقم 5 استعوض ربنا في الفلوس والوقت والمجهود وتذكر دائما انك اشتريت عربية بتحبها وكنت منتظرها من فترة طويلة وربنا من عليك بكرمه وفضله انه رزقك عربية زيرو في وقت في ناس مش لاقية اتوبيس النقل العام لأنهم عاملين اضراب بقالهم يومين

واخيرا..
تذكر دائما الحكاية بتاعة "عساه خيراً ان شاء الله"

"وعسي ان تكرهوا شيئا وهو خيرا لكم" صدق الله العظيم

والله المستعان
،
،