تجربتى فى فك الطرمبة وتنظيف فلتر البنزين بالصور (وليه فلتر البنزين شكله كدا)

**wesam_salom** · 18-09-2011 03:36 PM

يوم الجمعه وبما انى فاضى
والعربيه ظهر فيها كتمه او تنتيشه
فكرت ان المشكله ممكن يكون ليها سبب من الاسباب
فلتر الهوا
البوجيهات
طقم الموبينه (وده اساسا انا عندى مشكله فيه هشرحها بعدين)
طرمبه البنزين او شوائب فى البنزين او انسداد الفلتر
نظفت فلتر الهوا (بسه حالته معقوله) ورشيت اسبراى تنظيف على كل الفيش القريبه من الفلتر والموتور (اى فيشه ايدى تطولها) وفيشه الفتيس بالمره والبوابه بالمره
طلعت فى دماغى انى اشوف مشكله عوامه البنزين اللى مش شغاله
فكيت الكنبه اللى ورا واكتشفت الشنيعه
سلوك الطرمبه هى اللى مقطوعه والفيشه مش موجوده (واضح ان فيه كهربائى كان بيحاول يعمل حاجه فيها مع المالك السابق)
المهم طبعا انا مش فارقه معايا وعارف انى محتاج طرمبه جديده بالعوامه زى ما اللى انا شاريها منه قالى (بس ما قالش انها ب 1500 جنيه هههههههه)
قلت لازم افكها اشوف اللى فيها من جوه وانضف الفلتر اللى محدش بيجيب سيرته
وكانت الفجيعه
فلتر بنزين صغير جدا شبه باكت الشاى بس اكبر شويه
طبعا الطرمبه كانت مليانه شوائب جواها رميتها
بس الحمد لله التنك نضيف من جوه (حطيت ايدى وشوفت) ونضفت الفلتر شويه من حاجات عامله زى الخيط عليه بس بكميه بسيطه
وركبت كل حاجه تانى ودورت العربيه والحمد لله اشتغلت كويس جدا رغم انى مش عارف المشكله كانت فين
بس اللى مجننى ان كل العربيه دى شغاله على فلتر بسيط وصغير جدا سهل انه يتسد وساعتها تغيير الطرمبه بالكامل
طبعا منسيتش انى اصور لكم شكل الفلتر
ولو كنت اعرف انى هوصل للمرحله دى كنت صورت لكم العمليه كلها بس طبعا كنت متبهدل وايديا عليها شحم وزيت وبنزين وكل ما تشتهى الانفس
ده شكل الطرمبه بالفلتر بعد ما خلعتهم من الكفر الخارجى (كنت عاوز افك الجزء ده واشوف الموتور بس للاسف الطرمبه راكبه كبس زى اللحام فصعب فكها وخفت ابوظها)

وده شكل الفلتر

السؤال بقى الفلتر ده صغير كده ليه وليه مصمم انه مينفعش يتفك زى بقيه العربيات ويبقى ممكن نغيره لوحده او نغير الموتور لوحده لو باظ

**MOUSTAFA_SAAD** · 18-09-2011 05:50 PM

على فكره اللوجان نفس الحكايه
مش عارف ليه

**mohamedbook** · 18-09-2011 05:51 PM

الموديلات الحديثة كلها نفس النظام
لكن هل ينفع تشتري الطلمبة بتاعة الموديل القديم الي ممكن تغير فية الفلتر ولا ليس لها وجود
كمان فية موضوع معملول من احد الاعضاء انه عرف يغير الفلتر بتاع الطلمبة من غير ميغير الطلمبة كلها
دور علية في قسم نيسان وياريت توافينا بأخر الاخبار
وربنا يصلحلك الحال ويعينك ان شاء الله

**wesam_salom** · 18-09-2011 06:01 PM

المشاركة الأصلية كتبت بواسطة moustafa_saad

على فكره اللوجان نفس الحكايه
مش عارف ليه

واضح ان الناس دى بتحاول تعمل حاجه صعبه علشان محدش يقدر يصلح
لازم يشترى قطع غيار جديده ويفيد التوكيل

المشاركة الأصلية كتبت بواسطة mohamedbook

الموديلات الحديثة كلها نفس النظام
لكن هل ينفع تشتري الطلمبة بتاعة الموديل القديم الي ممكن تغير فية الفلتر ولا ليس لها وجود
كمان فية موضوع معملول من احد الاعضاء انه عرف يغير الفلتر بتاع الطلمبة من غير ميغير الطلمبة كلها
دور علية في قسم نيسان وياريت توافينا بأخر الاخبار
وربنا يصلحلك الحال ويعينك ان شاء الله

الحمد لله انا مطلعش عندى مشكله فى الفلتر لقيته لسه كويس
بس انا متضايق ان تصميمها معمول علشان محدش يعمل اى حاجه فيها
يعنى الفلتر مينفعش يتفك (ملقيتش مكان افكه منه)
وموتور الطلمبه داخل الجزء اللى انا مصوره ومقفوله بطريقه زى ما تكون ملحومه بالتسخين يعنى مش هنقدر نوصل لها بدون كسرها او على الاقل مش هترجع زى الاول

مشكلتى حاليا فى العوامه ودى انا بس محتاج اشوف شكل الفيشه فى عربيه تانيه وتوصيلات الاسلاك وانا هشغلها عادى لانى قست العوامه على الافوميتر لقيتها شغاله بس هما 5 اطراف مش عارف طريقه توصيلهم وخفت احرق الموتور

هعملها قريب ان شاء الله بمجرد ما تقع اى صنى تحت ايدى وصاحبها يرضى يفك الكنبه ويسيبنى اصورها

**Bishoy.Girgis** · 19-09-2011 03:09 AM

**szaalouk** · 19-09-2011 10:16 AM

الله ينور عليك يا باشا و ربنا يحفظ لك العربيه و يستر طريقك و طريقنا كلنا دايما يا رب

**Abdm** · 19-09-2011 11:20 AM

المشاركة الأصلية كتبت بواسطة mohamedbook

الموديلات الحديثة كلها نفس النظام
لكن هل ينفع تشتري الطلمبة بتاعة الموديل القديم الي ممكن تغير فية الفلتر ولا ليس لها وجود
كمان فية موضوع معملول من احد الاعضاء انه عرف يغير الفلتر بتاع الطلمبة من غير ميغير الطلمبة كلها
دور علية في قسم نيسان وياريت توافينا بأخر الاخبار
وربنا يصلحلك الحال ويعينك ان شاء الله

طيب اللى يلاقى الينك بتاعت الموضوع بتاع تغيير الفلتر بتاع الطلمبة من غير ما يغير الطلمبة كلها يا ريت يوافينا بية ولكم جزيل الشكر