فاكرين أول يوم دراسة كننا عاملين ازاي؟؟؟

خد هنا تعالي منك ليها له...كل واحد قاعد يتريق علي ولاده أول يوم دراسة ويشتكي


وناسيين احنا كننا عاملين ازاي...يلا كل واحد يحكيلنا كان ف مدرسة ايه وكان لابس ايه وشكله ايه واحساسه..واهم سؤال...عيطتو ولا لأ؟؟؟

عن نفسي كنت واخدة علي مرمطة المدارس اصلا (ضحية الام العاملة ) فكنت رايحة عادي بيس...لدرجة ان ماما كانت عوزاني اغيب اول اسبوع ونا مرضتش كنت عاوزة اروح الحق اكون عصابتي الخاصة واتفرج علعيال...علي اساس اني مساعد المدير مثلا

ورحت كانت زحمة زحمة...وكانت مريلتي بينك كاروهات...والزمزمية..بمبي بردوا..مكنتش طلعت أونو لسه

بس بصراحة مكنتش طيقة نفسي ملزحمة وعيال صغيرة كتير بتأوأأأأأأأأ وحاجة تقرف

والمدرسات كانوا مقيضنها معانا تعارف بقي...

وفاكرة فلمدرسة المدرسة بتسألنا عن اسماءنا..فبنت جنبي بتقولها اسمي مروة وفاء

فنا استغربت قلت يمكن سلو بلدهم يتندهو باسم الام...

فلما جت تسألني عن اسمي قلتلها ضحي وفاء بردوا

ههههههههههههههههه..قالتلي انتو اخوات؟؟؟ قلتلها لأ...قالتلي بابا اسمه ايه؟؟ قلتلها توفيق...قالتلي طب مين وفاء...ٌلتلها مامتي...قالتلي تبقي ضحي توفيق

رحت برقتلها قلتلها اشمعني مروة بقي؟؟؟؟؟؟؟؟؟؟؟؟؟؟؟؟؟؟؟؟

يلا كل واحد يحكي شكله كان عامل ازاي

ميبقاش جيلي نوم من كتر ما انا مستعجلة على الصبح يجي
كنت بنام حاضنة الشنطة والجزمة لكن اولادي بيقوموا حتى من اول يوم بالجزمة

اقتباس:

---

المشاركة الأصلية كتبت بواسطة icehearted girl

وفاكرة فالمدرسة المدرسة بتسألنا عن اسماءنا..فبنت جنبي بتقولها اسمي مروة وفاء

فنا استغربت قلت يمكن سلو بلدهم يتندهو باسم الام...

فلما جت تسألني عن اسمي قلتلها ضحي وفاء بردوا

ههههههههههههههههه..قالتلي انتو اخوات؟؟؟ قلتلها لأ...قالتلي بابا اسمه ايه؟؟ قلتلها توفيق...قالتلي طب مين وفاء...ٌلتلها مامتي...قالتلي تبقي ضحي توفيق

رحت برقتلها قلتلها اشمعني مروة بقي؟؟؟؟؟؟؟؟؟؟؟؟؟؟؟؟؟؟؟؟

---

ههههههههههه

اقتباس:

---

رحت برقتلها قلتلها اشمعني مروة بقي؟؟؟؟

---

أه صحيح...إيه حكاية مروه وفاء بقى؟؟؟
وكل سنه و إنتي طيبه يا دوك...
أنا حاسس إحساس غريب فعلا لما الدراسه بدأت ..إحساس بالكبر..

هي كان باباها فعلا اسمه وفاء

انا لما كبرت حكولى على لما دخلت اولى حضانة
ماما عشان تبقى مطمنة عليا دخلتنى نفس مدرسة اختى و هى كانت اكبر منى ب 4 سنين
بس انا كنت طفلة قرفانة من المدرسة من اول يوم
كان الفصل بتاعى فى اولى حضانة بيبص على حوش المدرسة
و كان طبعا حضانة ملهمش طابور ، فكنا احنا بنبدأ الحصص و الطابور شغال
كنت انا بكل بساطة اشد كرسى
و اطلع برة فى الممر احط الكرسى و اطلع عليه عشان اتفرج على الطابور
جنس بنى ادم يحاول يدخلنى الفصل !!! نافورة العياط تتفتح فورااا !!
فضلو كل يوم يا اما يكلمو جدتى تيجى تاخدنى ، يا اما كل شوية يندهولى اختى من فصلها تيجى تهدينى ، لما البنت كرهتنى كل شوية الحقى اختك بتصوت :biggrin24:

بعد اول كام اسبوع بقيت عادية يعنى طفلة طبيعية بتروح المدرسة

لما اتنقلت مدرسة تانية بقى لما عزلنا كنت داخلة خامسة ابتدائى
طبعا من قانون الغاب فى المدرسة و قواعد البنات الرخمة ان اى حد جديد لازم يطلع عينيه لحد ما يثبت كرامة
اول يوم رحت فيه المدرسة الجديدة مكنتش طايقة خالص
ملقتش مكان غير جنب واحدة غلسة كده ( هى دلوقتى صاحبتى اصلا و دايما برخم عليها بالموقف ده ) ، انا قعدت جنبها عادى خالص
هى كاى بنت رخمة اصيلة راحت جايبة شنطتها ، حاطاها فى النص بيننا ، و زاقانى على الارض !!
بقية خمسة ابتدائى قعدتها فى دسك لوحدى ، و يمكن ده اللى خلانى لحد دلوقتى معروفة انى شارية دماغى جدا و محبش حد يقرفنى :biggrin24:
بس و الله كانت ايام حلوة ، انا بعتبر احلى سنين حياتى سنين ثانوية عامة :biggrin24:

بسم الله ما شاءا الله لسة فاكرة !
انا مش بحسد انا بقر بس :grin54:

كان يووووم لزج... زي موضوع بقراه; p
مش عايز افتكر يوم من ايام العبوديه ديه هههههه
الواحد دلوقتي ملك نفسه... ماشاء الله هههه

يا ليت الطفولة تعود يوما مش هاقدر اقول غير كده

علي رأيك ياشيري والله...احلي ايام ثانوي

بس فعلا فيكي نفس الاطتي...كنت بحب اقعد ف ديسك لوحدي..والمدرسة ديما تقعدني قدام عشان تجامل ماما

ونا دماغي والف فردة اديداس اني اقعد جنب اي شباك عشان اتفرج

وكان في لقب زمان غريب اوي

كنت صحبة اللعب..هههههههههههههههه اي حد ييجي يلعب معانا لازم يستأذن صحبة اللعب

دا طبعا بعد ميقدم فروض الولاء والطاعة من بون بون وشوكولاتة وشيبسي

كنت بكره المدرسة زي العمى

و الشعور متغيرش ال13 سنة تعليم في المدارس

تسقط العبودية

انا اللي مستغربه لحد دلوقتي
اني في 3 هندسه ولما بقابل مدرس من بتوع ابتدائي صدفه في اي مكان اتفاجئ انه فاكرني بالاسم
يعني لسه من فتره قابلت مدرس العربي اللي اداني في اولي ابتدائي بسلم عليه لقيته بيقولي ازيك يا شادي عامل ايه قولت عادي ذاكره قويه بعدها بفتره قابلت كان بيدرسلي في 5 ابتدائي لقيته بيقولي ازيك يا شادي فينك يا بني !!!!!!!!!
الناس دي بتفتكرني ازااااااااااي مع اني كنت في مدرسه حكومه .. ومدرسه برضو بتاعت الحساااااااب في اولي ابتدائي قابلتها من سنه كدا لقتها فكرانى و بتقولى سلملي ع ماما !!!!!!!!!

انا طفل من محبى الشبابيك لو الديسك مجنبوش شباك اغير الفصل ولسه بروح المدرسه الابتدائى و الاعدادى بتوعى ااقابل مدرسينى و برضه كل مروح بتضرب هههههههههههههههه

ماكنش بيجيلى نوم ليلة اول يوم دراسة :N_no[1]:

أنا كل مشوف الميس بتاعتي ونا فحضانة..اخاف..اه والله اخاف جدا

وكمان الدادا أم محمود الله يمسيها بلخير...دا جوانتانامو كانوا بعتينهالنا انتداب سنتين تقريبا

من اطرف الحاجات اللى كانت بتفكرنى بالمدارس هما:
البلح والجوافة
الجوافة بريحتها المميزة والبلح لما الراجل بتاع البلح يمشى فى الشارع وينادى " ولاتين ولاعنب زيك "

يااااااااه على الذكريات الجميلة

مش ناسى اليوم ده بالذات
كنت مع بابا والمدرسة عندنا كانت كلها معارف من اهل لمدرسين عشان كانت جوة المدينة السكنية الخاصة بالشركة اللى بابا شغال فيها
اول يوم ما عيطتش لحد ما دخلت الفصل واول ما قاللى اقعد كنت حاسس انى عاوز اعيط ( بس على مين دنا صعيدى يعنى ما بنعيطش واصل)
وقبل ما اول دمعة تنزل لقيته بيقعدنى جنب مزة مزة يعنى بنت واحد صاحبة
فجأه الدمعة اللى فى عينى نشفت يا خال وبراءة الاطفال كان اخر يوم ليها :) وقمت قاعد كالذئب وكل شوية اطبطب عليها وهى تعييييييط وانا مبسوط اخر حاجه وعمال اطبطب
عيطت بقى بعدها باسبوع اما قومونى من جنبها
لحد النهارده بشوفها
كانت مزه ومازالت مزه وستظل مزه
وولا هى اتجوزت ولا انا اتجوزت
بس للاسف مش هاينفع اتجوزها عشان علمت عليها وهى صغيره ههههههههههههه

كانت أيام سوداء، الله لا يرجعها.

ياة فكرتنا بالذى مضى بجد كانت ايام جميلة :tumb:

انا ليسة فاكر اول يوم مدرسة لى كونت فى kg2وفجاة فى وسط اليوم نقلونا فى الصف الاول الابتدائى ووالدى لما جاء لكى يستلمنى جلس فترة يدور على لغاية لما ادارة المدرسة بلغتة بالخبر انى اتنقلت الى الصف الاول الابتدائى مكانشى مصدق الخبر

في أول يوم خربشت المدرسة وشرحت اديها وتاني يوم ضربت السكرتيرة بتاعت المديرة حتة شلوت مع انها كانت لبنانية واسمها هيفاء كمان
وكنت لازم اقعد في اول صف مع انهم كانو بيقعدو البنات بس قدام جابو ولد يقعد جنبي لاني كنت بشد شعر البنات
كمية استدعاءات ولي الامر اللي خدتها خصوصاً في معركة اول يوم بتاعت الاماكن كفيلة بانها تحطني في السجن!

اقتباس:

---

المشاركة الأصلية كتبت بواسطة Zika9909

كانت أيام سوداء، الله لا يرجعها.

---

امييييييييييييين

أنا لغاية دلوقتي باحس بالإكتئاب مع بداية دخول الدراسة , عشان بافتكر الايام دي و قد إيه إحساس الواحد ساعتها إنه رايح يقضي فترة حبس مدتها 9 شهور

ومن أول يوم البيت كان بيتحول لمعسكر مذاكرة و نوم بس

بس فى ميزة انه مع دخول المدارس الشوارع والزحمة بتعات باليل بتقل تماما

ياااااااه انا من سكان الهرم وكان مع دخول المدارس فى فترة الثمانينات واوائل التسعينيات كان فى فترة رجوع المدارس تلاقى الشارع زحمة فى اتجاه اللى رايح للهرم وتلاقى الاتجاه التانى اللى رايح للجيزة فاضى تماما

ياااااه على دى ايام

اقتباس:

---

المشاركة الأصلية كتبت بواسطة elbeheri

بس فى ميزة انه مع دخول المدارس الشوارع والزحمة بتعات باليل بتقل تماما

ياااااااه انا من سكان الهرم وكان مع دخول المدارس فى فترة الثمانينات واوائل التسعينيات كان فى فترة رجوع المدارس تلاقى الشارع زحمة فى اتجاه اللى رايح للهرم وتلاقى الاتجاه التانى اللى رايح للجيزة فاضى تماما

ياااااه على دى ايام

---

اما سكان المناطق الي حوالين المدارس بيلعنوا الفترة دي, زحااااااااااااااام لا يطاق و شوارع واقفة ابدا و دائما

اقتباس:

---

المشاركة الأصلية كتبت بواسطة icehearted girl

علي رأيك ياشيري والله...احلي ايام ثانوي

بس فعلا فيكي نفس الاطتي...كنت بحب اقعد ف ديسك لوحدي..والمدرسة ديما تقعدني قدام عشان تجامل ماما

ونا دماغي والف فردة اديداس اني اقعد جنب اي شباك عشان اتفرج

وكان في لقب زمان غريب اوي

كنت صحبة اللعب..هههههههههههههههه اي حد ييجي يلعب معانا لازم يستأذن صحبة اللعب

دا طبعا بعد ميقدم فروض الولاء والطاعة من بون بون وشوكولاتة وشيبسي

---

لا انا مكنش ينفع اقعد قدام خاااالص خااالص و لا كان العيال اغتالونى
لانى طويلة جداا ، و كنت طويلة من و انا صغيرة ( اطول واحدة فى الفصل )
فبما انى طويلة فلو قعدت ورا عادى بالنسبالى شايفة كللل حاجة :angelnot:
انما لو قدام بلاقى الفصل كله بيسب و يلعن فيا ، و كمان كل شوية تعالى يمين تعالى شمال انزلى تحت شوية !! فلازم الواحد يشترى دماغه

اكتشفت بقى انى فعلا معروفة بموضوع انى محبش حد يقرفنى ده !! ، واحدة اعرفها من الكلية لخصت ال 4 سنين فى جملتين بالنسبالى ، قالتلى انتى كنتى بتشترى دماغك و مبتجيش، و لو جيتى بتتخنقى و متحضريش، و لو حضرتى مبتكمليش المحاضرة او السكشن و بتمشى ، و حتى فى الامتحانات بتزهقى و تمشى من نص الوقت و لو تطولى قبل كده كنتى تمشى !! سمعتى هى هى من ايام المدرسة ( محدش يقرفنى !! ) :N_no[1]:
و بعدين مش بذمتك القعدة فى دسك لوحدك اريح !! و لا بقى واحدة تزهقنى ، و تعد تحط حاجتها و تضيق الدنيا زيادة ماهى ضيقة !! هى مكانتش ناقصة اصلا !! :grin21:

لسه شايف نكته علي الفيس تمشي مع الموضوع ده

نمر عدى من قدامه قط بيجري ورا فار .. ضحك وقال ..
.
.
.
.
.
.
.
.
.
.
.
يخربيت أيام إبتدائي .

حلوة النكتة دي.