الموضوع: "فكرة تصميم سيارة مصريه بالكامل حتى لو تحت البيت"

مفيش حتى ردود مشجعة خالص
دا أنا جالى أحباط من قبل مافكر حتى فى الموضوع يا ساتر يا رب

هل من الممكن تصنيع 100 الف عربيه بالطريقه دى؟ طبعا صعب
لازم شركات و مصانع تخش فى الموضوع

الفكرة حلوة بس في مشكلة
ان حضرتك اتكلمتي عن الصاج والسمكرة ونسينا اهم حاجة وهيا العضم والقوايم والكلام ده كله صعب على اي سمكري يعمل الكلام ده يبقى العربية كدة مش هتستحمل
ولو بتتكلمي برده عن العربيات الامريكي القديمة زي ماقولتي بيجيبو المواتير فعلا وبتبقي العربية دي حاجة تانية
بس عندنا في مصر مفيش سوق للكلام ده ولا العربيات وكمان فتي الصنايعية هيودينا في داهيا اساسا

بسم الله الرحمن الرحيم

اولا الفكرة موجودة عند ناس كتير مننا بس محدش قادر يطبق بس لو جمعنا كل المتحمسين للفكرة مكن نطبق بإذن الله

موضوع تصنيع سيارة دة مش موضوع سهل كدة مش مجرد هنجيب شاسيه عليه موتور و خلاص ... في ناس كتير مجمعة عربيات على ايديها هل كدة يكونوا صنعوا طبعا لا

علشان تعمل حاجة زي كدة لازم تقسميه لأجزاء : التحضير - التصميم - التنفيذ

اولا التحصير : لازم قبل ما نعمل العربية لازم نحدد بالضبط الهدف منها ايه ؟ نحدد حجمها ابعادها الفئة المستهدفة من الشعب لأن طبعا مش هنعمل عربية جميع الطبقات في المحتمع تركبها و نحدد لها حدود للسعر من كذا ل كذا

المرحلة التانية و هي التنفيذ : أول خطوات التنفيذ هي التصميم و الربط بين المعطيات من المرحلة الاولى و التصميم

طبعا التصميم الخارجي لبدن السيارة مش لازم يكون معقد و مش لازم يكون شكله غريب او تصميم تخيلي من الحاجات اللي بتضرب في الدماغ دي لازم يكون تصميم عملي واقعي و من خصائص التصميم سهولة تطبيقه و انخفاض تكلفته
بالاضافة لانسيابية الجسم علشان توفير الوقود و الشكل الجمالي

بعد التصميم هندخل في مرحلة دراسة التصميم و التأكد من سلامته و دراسة الايروديناميكية عليه و طبعا علشان احنا مش شركة كبيرة و مفيش امكانيات و مفيش انفاق هواء متخصصة فالدراسة دي هتتم على البرامج المتخصصة و من الممكن ان احنا نصمم نفق هواء مصغر بتكلفة معقولة جدا ندرس فيه التصميم

نيجي لجزئية تصميم الهيكل و الجسم و الهيكل هو زي الهيكل العظمي للإنسان بيكون على الشاسيه من اعلى و بيكون عليه جسم السيارة اللي هو السقف و الكابوت و الرفارف و الأجزاء
طبعا تصميم الاجزاء دي هيتم بناء لمعطيات مسبقة برضه زي اقصى سرعة للسيارة و بالتالي اقصى حمل في حالة التصادم و الاجهادات عامة و الاهتزازات و ايضا بناء على التكلفة و وزن السيارة

بعد دراسة التصميم هنيجي لمرحلة التصميم الميكانيكي و دي فيها اختيارين اما التطبيق بنظم موجودة مسبقا مع دراستها كاملة للدخول في مرحلة التصميم الذاتي او ان احنا نبدأ مشوار تاني صعب شوية مشوار التصميم الذاتي
يعني هنصمم الشاسيه الخاص بالسيارة و المحرك عن طريق مهندسي الميكانيكا و السيارات و التصميم الصناعي و مهندسي و علماء المواد

و التصميم دة بيكون ازاي ؟ بحدد معطيات قبل التصميم زي الوزن اللي هيتحمله التصميم ظروف التشغيل اللي بتحدد قيم ال vibration و ال fatigue و الاجهادات اللي هتأثر على التصميم و توزيع الأوزان و حاجات تانية و بالتالي طبقا للمعلومات دي انا أقدر أبدأ في التصميم

بالنسبة لو اخدنا سكة التصميم الذاتي طبعا هنعتمد بأكبر ما يكون على برامج ال simulation و التجارب منخفضة التكلفة علشان التمويل طبعا و عدم توافر الامكانيات

المرحلة التالتة و الاخيرة : التنفيذ
بعد التصميمات ما تكون جاهزة نروح على المصانع اللي موجودة في مصر و تنفيذ التصميمات بالمواد الموجودة في التصميم نفسه بدون الاختلاف

بعد تصنيع الاجزاء المختلفة نيجي لمرحلة تجميع الاجزاء و تكوين السيارة و كدا بقى عندنا عروسة



المطلوب :

1- التحمس للموضوع
2- إخلاص النية لله أن احنا نعمل حاجة ترفع اسم مصر
3- مهندسين ميكانيكا
4- مهندسين سيارات
5- مهندسين مواد
6- كل من له خبرة في مجال السيارات سواء كصيانة و إصلاح أو تعديل
7- برامج هندسية زي :

برامج تحليل إجهادات - برامج تحليل vibration - برامج محاكاة دة كل اللي على بالي دلوقتي .....

8- كل من عنده فكرة يريد المشاركة بها في الموضوع
9- مصممين

يعني كل دة اللي في بالي دلوقتي :) أكيد هنحتاج حاجات تانية و سهيت عنها


بس كدة انا خلصت
و شكرا :)