الإنتقااااااااااااااااااا م!!!!!!!!

**ZALABANY** · 14-05-2008 10:40 AM

إزيكم يا جماعة عاملين إيه ياترى هل انتو بتقدرو تمسكو نفسكم وانتو في الطريق لو حد اتغابى عليكم ومشي وسابكم او حدف عليك وتمادى وبلطج ولا كأنه عمل حاجه ولا حتى إعتذر هل هاتسيبه ولا مش هاتسيبه
مش عارف بصراحه يعني أنا مثلا النهارده الصبح نازل نازلة الزمالك من كوبري 15 مايو وواخد اقصى اليمين تروح جاية واحده ست محترمه راكبه بيجو 504 من على شمالي كاسرة عليا لحقت نفسي في آخر لحظة وفرملت والا كانت جابتلي جنب العربية ومشيت عادي خالص طلعت وراها راحت حادفه عليا تاني وزنقاني لما الطريق داق وتقريبا والله اعلم حست انها عملت كده طلعت تجري بالعربية
المهم حاولت احصلها حصلتها عند الأوبرا وطلعت منها وزنقت عليها مرتين في الخفيف يعني بس عشان ما ابقاش سيبت حقي وبعدين سيبتها ومشيت
أنا عارف ان ده مش صح بس فعلا في ناس بتنرفزك وتضطرك تعمل حاجات انت ما تحبش تعملها ياترى انتوا لو مكاني هاتعملوا ايه
فعلا بلدنا دي بقت كلها بلطجة والناس بأو يسوقو بطريق غريبه انا بس نفسي ربنا يكرمني ويديني عربية كبيره شويه اقصد موتور يعني 1600 او 1500 عشان الواحد كده هايكلوه في الشارع

**zalpany2000** · 14-05-2008 10:51 AM

اخي الحبيب
حاسب علي اعصابك
السواقة عايزة دكتور انجليزي اعصابه في تلاجه -و عشان احنا في مصر دييب فريزر- وبعدين بصراحة انا رأيي انك ما تقابلش الغلط بغلط زيه . انا مش موافقك انك تقفل عليها بالرغم من اني عارفك عصبي وان ده اقل رد فعل ممكن تعمله في حالة زي دي وعارف انك منعت نفسك بالعافية من انك تجيبلها شنطة العربية او تطلعها فوق رصيف، و ممكن كنت تكمل لحد ما تعدي علي كوبري قصر النيل و تنزلها النيل من الاتجاه المعاكس.
بس معلش روق دمك
اشرب عصير "علي رأي محمود سعد"

تحياتي
و محبتي

**ZALABANY** · 14-05-2008 10:54 AM

حلوه دكتور إنجليزي دي عجبتني
ماشي ياعم حسام ربنا يسترها

**Ghamrawy** · 14-05-2008 10:57 AM

مش دايما
انا فاكر زمان لما كانت بتحصل معايا حاجة زى دى كان ممكن اغير اتجاهى و الغى المشوار اللى رايحه علشان اخد بتارى بس دلوقتى زهقت و تعبت من القرف ده الا بقى لو حاجة زى دى عملت اى خسارة فى العربية حكة خبطة فانوس مراية غير كده باشتم و باطلع ايدى من الشباك و ..............

**mamdouh** · 14-05-2008 11:02 AM

انا بعتبر ان فيه شريحه من الي معاهم رخصه مرضي نفسين معاهم عربيات و حاول تبص علي وش اي واحد سايق غلط حتلقيه سرحان بطريقه غريبه . والناس مش عارفه من لايرحم لا يرحم

**memo_hefnawy** · 14-05-2008 11:04 AM

أنا للأسف باكتشف إنى مع كل يوم بتحول ل Monester أكثر من اليوم إللى قبله فى الشارع

بس مش monester و خلاص لأ

أنا بكون فى حالى ماليش دعوة بحد لحد ما حد يفكر يقرب من العرين بتاعى و يفتكر إنه عرين قط يطلع الأسد و ياخد حقه بالذات أوى مع الميكروباص دوول بقه لو حد منهم حدف عليا و فاكر إنه كده هاخاف و أكش و أضرب لخمه مش بسيبه إلا لما يعرف إنه لعب مع الشخص الغلط خالص

بس لما بعمل كده بعمله من جانب الأمر بالمعروف و النهى عن المنكر :)
يعنى لما يحدف و أسيبه و لما يدخل عكسى و أسيبه يبقى أنا مشارك له فى الجريمه بتاعته

لكن لما بأقل تقدير و أضعف إيمان أديله كلمتين أو أوقفه لو معاكس و أرجعه أو يعرف إنه لما يحدف على حد هايحدف عليه و يقرفه فى عيشته و يوقفه

يعرف إن الله حق لما يلاقى الناس كلها بتعمل كده فيه هايبطل يمشى غلط و يتعدل

دى وجهة نظرى - فى ناس بتقول لأ مش هاتفرق بس أنا ضميرى مش هايرتاح لو سيبته صراحه أحس إنى مقصر فى حق نفسى على الأقل

**Islam_galal** · 14-05-2008 11:12 AM

كتير بانزل الصبح و اقول امشي في حالي
بس مين ده اللي يسيبك في حالك
بامسك نفسي كتير بس بيتحرق دمي

مرة كنت راكب عربية سيميكا (حد فاكرها) و كام ميكروباص و تاكسي استضعفوني
كان جواها موتور 131 و انتقمت اشد انتقام
الخلاصة ماحدش عداني خاالص بعدها :)

**wisambasha** · 14-05-2008 11:18 AM

يا زلاباني للاسف الحاجات اللي زي دي دايما بتحصلي من ناس كبيرة في السن (رجال و سيدات)
عندك اخر مثال الاسبوع الماضي علي المحور (طريق الموت حاليا) وطبعا انت عارف ظروف القيادة عليه حاليا كان امامي لانسر وكان الطريق مفتوح تقريبا السرعة 80 وفوجئت بالتوقف الفجائي بدون اي مقدمات للانسر. كنت هالبس فيه لكن ربنا ستر عليه وعليا ومحدش لبس فيا انا كمان

المهم هو ان سواق اللانسر بعد ما وقف راح رافع ايده من الزجاج وتأسف لي!!! وراح ماشي (غريبة) الاغرب هو اني لقيت ان اللي وقفه فجأة أييييييييييه؟؟؟؟؟؟؟؟؟؟؟

سيدة كبيرة في السن معاها إكسيل قررت تعمل u turn فجأة للاتجاه العكسي اول ما لقت الاقماع اللي بيفصلوا بين الاتجاهين كام واحد واقعين!!! وطبعا عملت نفس الدربكة دي للاتجاه المعاكس علشان تلف وترجع (علي المحور تخيل!!!)

المهم لقيت نفسي بدون شعور بازعق لها باعلي صوتي (يييا ...............!!!!)
كان نفسي انتقم منها بأي شكل لكن ظروف الطريق ماساعدتنيش للاسف لكن انا غالبا ما باسيبش حقي في المواقف اللي زي دي مطلقا وبدون شعور
وللاسف ان اللي بيعمل كده في الغالب كبير في السن وفاكر ان الدنيا لسه في الخمسينيات والدنيا فاضية وهو ماشي لوحده ولو غلطت فيه تبقي انت غلطان علشان هو الكبير وفي مقام والدك او والدتك

**amr_elrashidy** · 14-05-2008 11:21 AM

المشكلة ان الواحد بيستنى حتى اعتذار لكن للاسف معظمنا اتعود على انه مش غلطان وهو ده العادى و ان كله ماشى بالدراع مش حتيجى عليا

**Ahmed Selim** · 14-05-2008 11:32 AM

مع المكروباظات والنقل الخفيف

لا مومكن أبداً أنى أطنش

مع الملاكى مش على طول بس لما الباشمهندس يكون تنح ولا موأخذة و مش هامه حاجة و مستعبط فيها
بحاول بس بصراحة لما ألقى واحدة ست أو بنت اللى سايقة كبيرى نور أو كلاكسات

التكسى يعامل معاملة المكروباظات برضه