عربيه منتشره لكن مش موجوده !!!!! ( النترا )

**king516** · 19-09-2011 07:10 PM

انا اسف على العنوان اولا لكن فعلا دى حالتى دلوقتى دايخ بفالى اكتر من 10 شهور لغايه مازهقت وصرفت نظر عن الموضوع بالكامل لكن قولت يمكن فى امل

العربيه اللى بدور عليها هيونداى النترا 2007 او 2008 او 2009 او 2010
طبعا اغلبكوا هيقولوا الراجل ده مجنون ولا ايه

لكن قبل ماتحكموا عليا اقلوكوا مواصفات العربيه اللى انا عايزها وانتوا احكموا :

- عداد مش عالى اوى يعنى مابين ال50 الف وال80 الف
- خليجى وده اهم شرط
- مش رشه جوه لكن ممكن بره
- جنوط هيونداى الأصليه
- فتحه سقف
- طاره مالتى ( موجوده وشفتها )
- زر start / stop
- كاسيت هيونداى الأصلى
- اتوماتيك طبعا
- اشاره بالمرايات
- تكييف تاتش وليس بكر
- نازله بوحدات الرفع والريموت الأصلى بتاع بلادها
- اللون اسود او سيلفر او فيرانى

وطبعا ان ركبتها فى السعوديه من توكيل الناغى او الناجى مش فاكر اسمه وكان فيها كل ده واكتر وموجود منها فى مصر على فكره لكن قليل جدا جدا

علما العربيه دى مع واحد جارى وانا اللى اشتريتهاله من سوق مدينه نصر لكنه للأسف عامل بيها اكتر من 200 الف كيلو ومتبهدله ومتهانه جدا جدا جدا لدرجه متتوصفش

دورت فى كل مواقع بيع السيارات ملقتهاش خاااااااااالص بنفس اللى انا عايزه
دورت فى سوق مدينه نصر اكتر من 100 مره انزل لعربيتى او عربيه واحد صاحبى وادور وملاقيش
فمحدش فيكوا يكسب فيا ثواب ويقولى العربيه دى الاقيها فين ؟؟؟؟؟؟؟؟؟؟؟؟؟

**mohammedabdallh** · 19-09-2011 07:43 PM

بص يا فندم فى واحد قدامى اتو كامله من غير فتحة سقف بس مش خليجى كاسيت اصلى تكييف تاتش لون سماوى جنوط هيونداى الاصليه ماشية 100 الف
الطارة مالتى ميديا تحكم طبعا فى التسجيل 2008 شوف لو عاوز تشوفها تحت امرك رشه بره حاجات بسيطه فبريكه جوة عامله 75 الف

**thebeloverguy0000** · 20-09-2011 12:42 PM

وانا كمان بدور

**king516** · 20-09-2011 01:16 PM

والله ياجماعه اتعرض عليا اكتر من 100 عربيه لكن كل اللى اشوفهم لازم يكونوا ناقصين حاجه وده اللى مخلينى استحمل وادور لأن فيا ميزه وعيب فى نفس الوقت انى فى العربيات بالذات احب يكون عندى اقتناع كاااااااااااامل بالعربيه اللى هركبها غير كده يكون لأ والف لأ

**bob12345** · 20-09-2011 01:28 PM

مفيش النترا 2007 - 2010
فيها strat -stop

**king516** · 20-09-2011 05:58 PM

لا يابوب موجوده وانا ركبتها بس كان صاحبها منزلها من السعوديه وقالى ان فى اكتر من واحده فى مصر

**medo500** · 25-09-2011 02:36 PM

ياباشا حضرتك بتدور علي عربية مانزلتش مصر كتير الالنترا بالذات الخليجي منها قليل هنا في مصر ومن الصعب تلاقي كل الي بتدور عليه يتجمع في عربية واحده انا مش باحبطك بس هتلاقي خليجي فيه كل المواصفات الي بتطلبها لكن عامله كيلومتر عالي اوي او راشه دواخل او متهانة ومحتاجه مصاريف ولو لقيت عربيات زي كده نصيحة ماتفرحش بيها علشان هاتتعبك في المصاريف والصيانة حضرتك بتدور علي عربية مستعملة طالما كده يبقي اهم حاجة تدور عليها في المستعمل الحالة بغض النظر عن الخليجي والوكيل واللون علشان دي اهم حاجة في موضوع المستعمل

**king516** · 25-09-2011 08:02 PM

شكرا ليك ياميدو جدا على نصيحتك اللى اقبلها طبعا كأخ ليك لكن ده للأسف لو ملقتش اللى بدور عليه هتجه للزيرو بعد شويه وبرضه هتكون النترا لأنى عاشق للعربيه دى بالذااااااااات بس بعيد عن غبوووور

**i_Am_Legend** · 26-09-2011 02:08 AM

هيونادى النترا!__ياباشا دور على الفا روميو 147_ولا سيتروين سى 4_او ميجان_ابعد عن هيونداى_لأنها ماتتركبش فى مصر_بسب غبور_مش بسب العربية_مع أحترامى لهيونداى_والكلام دة من أخوك_وانا شغال فى شركة عربيات_وموزع معتمد لماركتين مشهورين جدا_ونصيحة ابعععد عن هيونداى