حادثه جديد -- افيدونى اغير الفانوس فين

**m_love4me** · 19-09-2011 11:41 PM

السلام عليكم ورحمه الله وبركاته

الاخوه الافاضل الكرام , للاسف تقريبا ما بقتش بعرف اسوق
بعد 4 سنين سواق وسفر ليل نهار
حاسس انى ما بقتش بعرف اسوق ولا اركز وانا سايق

عملت حادثه بالعربيه كنت بفادى واحد الله يسامحه ماشى على رجليه طلعت قدامى فجأه
دخلت ف عربيه تانيه لادا من ظهرها
ببوز العربيه بتاعتى -- تيدا 2011

النتيجه
الفانوس , متكسر كله وداخل لجوا
الاكصدام , اتكسر الكلبسات ال ماسكاه والبوهيه اتشالت
الكابوت , الحته ال فوق الفانوس اطبقت عليه
الرفر الجنب اليمين , اطبق على الفانوس لجوا وخرج من مكانه

الحمدلله رب العالمين على كل حال , كل الحاجات دى سمكرى محترم يعملها

لكن المشكله ف الفانوس
مش عارف اغيره فين ولا اجيب منين
يعنى اشترى من التوكيل ؟؟؟؟؟؟؟؟؟
ب 1200 جنيه الفانوس , دا موديل السنه ال فاتت 2010
ان ماكانش موديل السنه دى اغلى , لان شكله متغير

ولا اشترى من التوفيقيه
طيب اجيب منين لانى من الشرقيه مااعرفش اى حاجه نهائى

كمان ايه الفرق بين الفانوس الاصلى و التايوانى
او الديبى , لانى قريت مواضيع عنه

محتاج مشروتكم , افادكم الله

علشان اغيره بكره بأذن لله

تحياتى لكم

**FBIAhmed** · 19-09-2011 11:51 PM

قدر الله ما شاء فعل و ان شاء الله خبراء التيدا يردوا على حضرتك و معلش خير ان شاء الله

**m_love4me** · 20-09-2011 12:30 AM

المشاركة الأصلية كتبت بواسطة fbiahmed

قدر الله ما شاء فعل و ان شاء الله خبراء التيدا يردوا على حضرتك و معلش خير ان شاء الله

الحمدلله على كل حال

ومستنى رأي الناس حبايبنا

المشاركة الأصلية كتبت بواسطة micho

السلام عليكم ورحمة الله وبركاته

قدر الله وما شاء فعل
والحمدلله انها جت في الصاج مش في حاجه تانيه

ده كارت محل في التوفيقيه لسه جايب من عنده فانوسين ( ديبو تايواني ) لصني

والفرق كان اختلاف بسيط اوي في المقاس من عند الكبوت بتاع 2 مم
بس انا خدت بالي عشان لقيت كاوتش الكابوت
اللي بيقفل على الفانوس مضغوط حاجه بسيطه عن الطبيعي

اتصل بيهم واسئلهم وان شاء الله موجود عندهم الفانوس بتاع التيدا

وهو تاني محل يمين على شارع رمسيس مع ناصيه التوفيقيه

وربنا يعينك

---------------------
تنبيه على العضو

ممنوع وضع اسم محلات وصور على المنتدى
لانها مخالفة للقاعدة رقم 11 من قواعد المنتدى
ويعتبر اعلان بصيغة غير مباشرة فى صالح المحل .. وهذا يضر بصالح المنتدى
ويمكن مراسلة العضو على الخاص للمساعدة

وتفهمت الادارة نيتكم الصافية بغرض المساعدة .. ولذلك اكتفينا بالتنبيه

م15
وربنا يعينك

الف شكر لحضرتك

جزاك الله كل خير يارب ,

هكلمهم بكره الصبح بدرى
لانى اتصلت لقيتهم ما بيردوش ف اكيد قفلوا

بس معلش ايه بقى الفرق بين الفانوس الاصلى و ال مش اصلى
بيفرقوا ف ايه

هل دا اوحش ولا سيىء ولا بيبوظ
ولا ايه بالظبط

تحياتى لك

**omar-saad** · 20-09-2011 02:16 AM

قدر الله وماشاء فعل
انا لسة واخد الموضوع دة بالظبط بس فى الجهة الخلفية
للاسف انتا لازم قدام تجيب الفانوس الاصلى لان الاضاءة فى التقليد بتبقى اضعف
دا غير ان الفانوس بيطوص
ولو انتا مش عايز الاصلى يبقى الديبو كويس
وربنا يعوض عليك

**Ahmed.TV** · 20-09-2011 02:25 AM

قدر الله ماشاء فعل والحمد لله انك بخير .. والحمد لله انها جت على قد كدا

انت لو مامن على العربية التامين حيعمل كل حاجة من الالف الى الياء

ولو مش مامن يبقا اى سمكرى شاطر حيظبطلك الدنيا دى باذن الله

وبخصوص عناوين المحلات انا بعت على الخاص لحضرتك اسماء المحلات اللى حتلاقى عندها كل حاجة باذن الله فى الحرفين .. لان الحرفين ماليانة محلات لنيسان كتير

والفوانيس التايوانى شغالة تمام ومش بترفق كتير عن الاصلى طالما نوعها كويس وديبو ..

متوجعش دماغك وتفكر فى قصة اصلى وشم اصلى .. الكلام ده لو فى قطعة غيار ميكانيكية فى العربية مهمة .. حقولك هات الاصلى على طول

وان شاء الله خير

**m_love4me** · 20-09-2011 11:15 PM

الف شكر ليكم جميعا

ربنا يجزيكم كل خير على النصح و الافاده

لكن احب اقول حاجه بمنتهى الصراحه

ندمااااااااااااان انى جبت تيدا
ندمان فعلا بمعنى الكلمه

لانى لفيت الحرفين ومصر كلها من الساعه 11 الصبح لحد الساعه 5 ونص وانا مروح ف الطريق
بجد ليه علشان فانوس امامى

مش لاقى فانوس 2011 نهائى
الناس كلها بتقولى مش هتلاقيه , وما بينزلش
وبتوع الاستيراد بيقولولى ماحدش لحق يعمل حادثه بتيدا 2011 علشان نجيبلك فانوس

وكل ال موجود عندهم 2008 او 2009
2011 دا مش موجود نهائى

احكيلكم بقى على المغامره الرهيبه

رحت للسمكرى
قالى الكبوت و الرفر هنستعدله
و الاكصدام , كلبسات بس هتتظبط وبعدين نبقى واحد بتاع دوكو يلمع الحته دى ونعمل عليها اى شغل لزق علم مصر و الخرف دا , علشان ما نرشش الحتت دى
المهم اتفقنا قشطه
وهو واحد ايده زي الفل ما شاء الله --- قالى الاول بقى نجيب الفانوس , لان القلب بتاع الفانوس داخل لجوا , علشان نعرف نستعدل عليه ونظبط على اساسه

نزلت بقى الحرفين

طبعا عند عبدالرحمن عزت , ماعندوش فانوس يمين
العالميه -- قالى موجود طبعا و سعره الاصلى 1020 جنيه
والتيوانى 700 جنيه
اكتشفت بعد كدا انه نصاب

سألت كذا محل تانى , كله بيقول عندنا و التيوانى ب 400 جنيه

سالت فى احمد جابر , قالى الاصلى اصلى بتاع نيسان , 1200 جنيه
و التيوانى ب 300 جنيه نوعه tsy
قولت قشطه , المهم من هنا لهنا , قولت والله 1000 من 1200 , طيب اتصل بالتوكيل
الاستاذ الفاضل مسؤل قطع الغيار , ايون يا فندم عاوز كذا كذا , قالى موجود ب 1156 من غير الضريبه
قولت بالضريبه هيوصل 1250
ف مش هتفرق هنزل التوكيل ال هو لسبع ف زهراء المعادى , من الحرفين لهناك
واتوكلت على الله , وصلت هناك
ايون عاوز كذا كذا وانا لسه مكلمك
قالى لا دا طلع ب 1550 من غير الضريبه يعنى يوصل 1600 وشويه كمان
طبعا اتصدمت من الرقم

قولت دا انا اجيب 5 تيوانى و ابدل فيهم وكل شويه اخبط واحد

طبعا رجعت تانى على الحرفيين ,,, ودخلت بقى عند احمد جابر , ورينى الاصلى
طلع الاصلى ال عنده بتاع 2010
قالى هي دى المكسيكي
لا انت بتحلم مش هتلاقيى ابدا , الحل الوحيد انك تاخد فانوسين 2010 علشان الشكل متغير
واحد يمين وواحد شمال علشان ما يتغيرش ف شكل العربيه
يانهار ابيض ليه يا جدعان

المهم روحت للعالميه , صاحب الاسعار الخرافيه
قولتله انا سالت على فكره والاسعار كذا كذا , قالى ايون طيب هديك التيوانى على 450 الديبو و ال تي اس واي على 340
قولتله طيب ورينى ال 2011
قالى اهو
قولتله دا ال 2010 يا محترم قالى ماهو هو :d طبعا مسكت نفسى بالعافيه لانى كنت مخنوق من طول الطريق
قولتله لا
قالى اه هي دى المكسيكى الفانوس ال متغير ,, دا مش هتلاقيه ابدا وانزل على التوكيل هاته هناك زي ما يكون
احسنلك
:d

اكتئبت جدا
اتصلت بواحد صاحبى معاه تيدا 2009 قولتله هو ايه الفروقات بين الفانوسين , قالى كذا وكذا
وقالى تقريبا ان 2008 هو الوحيد ال شبه ال 2011

سالت بقى تانى ف احمد جابر عن 2008 , جابهولى , ولقيته تقريبا شبهه بالظبط عدا فروقات بسيطه جدا جدا ف نقشه القزاز الداخلى
فكرت شويه
ومش عارف اعمل ايه بصراحه , وفعلا ندمان انى ما جبتش تيوتا كرولا ولا لانسر
على الاقل قطع الغيار عن البقال زي ما بيقولوا

بس بقى وبعد استقرار احمد جابر قالى طالما مش هتجيب الاصلى يبقى التقليد كله واحد وهات ارخص حاجه واكتر حاجه مقاربه للشكل

قولت اجيب بقى ال هو tsy 2008 اقربهم شكلا , واحسنهم
وجبته منه على 280 جنيه
قولت اهو يقضى الغرض واسمكر عليه
ولما ربنا يريد ابقى اجيب الاصلى بأذن الله

بس ودى حكايتى ورجعت للسمكرى ف الشرقيه
قالى تعالى بقى الصبح , علشان نشتغل على نور

دعواتكم بقى

**Ahmed.TV** · 21-09-2011 04:24 PM

اخى الكريم

موضوع انك ملقتش للتيدا 2011 فوانيس .. ده ميخلكش تندم على شراء العربية .. لسبب

لان العربية موديل السنة الجديدة .. واى عربية جديدة كدا .. سواء كانت يابانى او كورى او او

مثلا نيسان صنى .. موديل الشكل الجديد ناس كتير داخوا عقبال ما نزل فى السوق .. واخد وقت

وبردوا اى عربية لسه جديدة ولو كانت كورى بردوا بياخد وقت عقبال ما موديل السنة يتطرح فى السوق

والدليل على كلامى .. ان فوانيس التيدا 2010 موجودة يعنى السنة اللى فاتت

والدليل اكتر ان فوانيس كل الموديلات للتيدا من 2006 الى 2010 موجودة بردوا .. وقطع الغيار المهمة موجودة فى السوق اللى قطع الغيار الميكانيكية

وده زى ما قولتلك حال السوق خارج التوكيل

لكن المهم انه موجود فى التوكيل .. لان القلق كله لو مش موجود بره ولا فى التوكيل

وكان ممكن حضرتك تعمل حاجة تانية جميلة بردوا

انك تروح لحد يكون شغله تعديل الفوانيس وصبها وده بقا منتشر فى مصر اكتر من الرز .. بياخد الفوانيس الاصلى وبيصب واحد على نفس شكله وبيعملهولك اخوه بالظبط .. وتقريبا تكلفته مش بتزيد عن 250 جنيه

وده كان حل كويس جدا .. بس قدر الله ماشاء فعل

ومتقلقش باذن الله حتلاقى قطع غيار المرايات والاكصدامات الحاجات المختلفة فى موديلات 2011 عن الموديلات السابقة حتنزل قريب باذن الله

وتحياتى ليك

**أشرف العدوي** · 21-09-2011 04:47 PM

ملحوظة بسيطة
لو الماركة قصدك t y s دي صناعة صيني
الـ t y c هي الي تيواني و مقاربة جداً في الجودة من الديبو الأتنين تقريباً واحد

بس اعتقد انه سعره كويس

-

الموضوع: حادثه جديد -- افيدونى اغير الفانوس فين

LinkBack

أدوات الموضوع

عرض

-

-

-

-

-

المواضيع المتشابهه

سواق جديد ومش عارف اغير زيت كل قد ايه ؟؟

عايز اجيب شادو 400 و لسة جديد فى الكلام ده افيدونى يا رجالة

يا جماعه عاوز اغير كوتش و كل يوم اسمع نوع جديد :(

اخوانى ملوك السزوكى سوفت عايز اغير فلتر التكيف 1993 افيدونى يا معلمين

مشارك جديد ... افيدونى

الكلمات الدلالية لهذا الموضوع

المفضلات

المفضلات

ضوابط المشاركة