انا فى مشكلة و محتاج رأيكم

**sherif_84** · 20-09-2011 12:26 AM

انا حجزت شقة فى مدينة العبور تبع الشركة الوطنية المهم الكلام ده كان فى 11 - 2009 ومضيت العقد و كل حاجة و دفعت المقدم و دفعت الاقساط لمدة سنة و كان المفروض استلم شقتى فى 11 -2010 بس طبعا ما استلمتهاش و احنا دلوقتى فى 9 -2011 داخل على سنتين و لسه العمارة كل اللى اتعمل فيها الدور الأرضى و البدروم بس و ياعالم هتكمل امتى و بالذات انى مربط مع بنت معرفة عشان الخطوبة و مش عارف اتقدملها و لا اتكلم مع اهلها الا لما اشوف موضوع الشقة ..
المهم انا دلوقتى روحت الشركة يوم الجمعة اللى فاتت وطلبت منهم المبلغ المقدم اللى دفعته و السنة اقساط اللى دفعتها .. المهم كل المبلغ 57500 ج وطبعا لما رحت الشركة كان البيه صاحب الشركة فى اسكندرية وقافل تليفوناته كلها و حضرت المساعد بتاعه اللى قابلنى قالى انا هاكتبله الطلب فى ورقة و أبعتها مع السواق بتاعه لان دى الوسيلة الوحيدة اللى بنقدر نتصل بيه من خلالها ..
المهم انا اديتلهم مهلة اسبوع لغاية ما استلم الفلوس بس انا حاسس انهم هيذلونى لغاية ما يرجعلى المقدم تانى .. بالله عليكم حد يفيدنى فى الموضوع ده لان انا والله خلاص زهقت و صبرى نفد مع الشركة دى و عايز اخد المبلغ منهم عشان الحق ادور على فرصة شقة تانية عشان اقدر اتجوز . وجزاكم الله خيرا و أسف على الاطالة ..