بنـجاح منقطع النظير .. شـاهد فيديو وصور مقـابلة صـقور نيـسان السـادسة بالتجمع الخامس

**Ahmed.TV** · 20-09-2011 01:23 AM

تقرير عن مقابلة نيسان السادسة فى مطعم وكافية ينى فى التجمع الخامس

انا مش حقول اللى مجاش فاته كتير جدا
وحسيب الاعضاء اللى حضروا المقابلة هما اللى يقولوا الكلام ده وحتحسوا ده من انطباعتهم

اللقاء كان ممتع .. بالصحبة الطيبة... مع ناس ااقل حاجة ممكن توصفهم انهم اخوة بكل ما تحمل الكلمة من معنى

وكانت حوراتنا في كل امور الحياة واهمها طبعا واللي شاغلة بالنا ومجمعانا هي السيارات... وبيبقى لها مذاق وطعم اخر عن صفحات النت... لانك بتشوف روح العضو وهو بيتكلم بتلقائية وتبدا تناقشه وتستفيد من خبراته..

وبنتفرج كمان على عربيات بعض ونجربها بالذات لما يبقى في حد ضايف كماليات او حاجة جديدة لعربيته...
من الاخر بتحس انك بجلسة مع افراد عيلتك من غير حواجز ولا رسميات....

بجد كانت مقابلة ولا اروع من كدا
كل مقابلة بقول انها الاحلى .. ولكن بكتشف ان كل ما بتحلق مع الصقور فى جولة جديدة
بنكتشف فيها حاجات احلى واحلى

والموقف الظريف واحنا واقفين في الباركنج سالنا شخص قالنا حضرتكم مين .. انا معايا صنى سوبر صالون .. وانا شايف كلكم نيسان .. ايه حكاية التجمع الجميل ده ؟؟؟
وفهمته الحكاية والراجل انبسط اكثر بالناس لما شافهم مع بعض بيتناقشوا بكل حب وروح
وقالى انه حيشترك معانا فى نايل موتورز عشان روحنا الجميلة دى

ربنا يجمعنا دايما على الخير..

فيديو رائع للصقور
جمد قلبك واتفرج على الصقور

MEETING 6 - YouTube

بداية لقاءنا....

التجمع

اتجمعنا فى شارع التسعين عند بنيزنة شل

واتصورنا وانتطلقنا الى مكان المقابلة فى سفن ستار
ووصلنا الى البركنج

الوصول

وقبل ما ندخل نتغدى اتفرجنا على عربيات بعض واتكلمنا فى حاجات كتير جدا واحنا واقفين عند العربيات
حسينا اننا قلبنا الباركنج الى سوق جمعة مصغر هههههههههه

وده كان جهاز لكشف الاعطال الخاص بكومندا كابتن سامى

وبعد سوق الجمعة الجميل ده ابتدينا نتوجه الى المول ثم الى المطعم

**Ahmed.TV** · 20-09-2011 01:24 AM

صورة فى المول

وقت الغداء

وبعد ما اتفرجنا واتناقشنا فى العربيات فطبعا اكيد نيسان صنى بالذات ومناقشتها جوعتنا
وجه معاد الغدا

بالرغم من انى اشرفت على اختيارى للمنيو قبل المقابلة بيومين بس متوقعتش انه يكون الاكل بالكمية دى
واول مرة فعلا الاقى الناس مش قادرة تكمل الغدا والكل حول الاكل تيك واى
بصراحة كان اكل مشهى وجميل وكان وليمة بجد

وده صورة الوليمة التانية .. لان الوليمة الاولى ملحقتش اصورها

بالف هنا يا رجالة
فعلا صقور صقور على حق

**Ahmed.TV** · 20-09-2011 01:26 AM

وبعد الغدا

دخلنا كملنا القعدة فى الكافية برة..
وواصلنا الاحاديث بينا .. والتعارف .. والنقاشات فى السيارات وفى الحياة بشكل عام

**Ahmed.TV** · 20-09-2011 01:26 AM

تكريم الاعضاء

ثم جاء معاد التكريم للاعضاء الناشطين فى قسم نيسان وكانت هدايا رمزية بسيطة مقارنة بمجهوداتهم الملموسة داخل القسم وفي المنتدى بشكل عام...

كرمنا الاستاذ حسين جمال كافضل عضو اجتماعى ف قسم نيسان
بهدية بسيطة عبارة عن هواية باب نيسان صنى
وهو طبعا يستاهل اكبر واكثر من كدا بكتير على روحه وعلى نقاء قلبه .. وتفانيه باعتباره همزة وصل بين الاعضاء.. ودايما بيتفقد الغايب قبل الحاضر...

ثم كرمنا الدكتور ايهاب .. كافضل عضو حقق اعلى مشاهدة فى موضوعه التيدا ومسلسل الموامرة الذى حقق اكبر مشاهدة فى قسم نيسان ..وعلى سرده الشيق للاحداث رحلته مع التيدا .. والدكتور ايهاب من الشخصيات اللي قدرت بفترة زمنية بسيطة انها تترك بصمتها داخل القسم باسلوبه اللي نال اعجاب الجميع.... وعايزين مسلسلاتك مع التيدا تبقى زي التركي 300 حلقة هههههههه

وكانت الهدية عبارة عن كوبون خصم 50 ج لصيانته القادمة بالتيدا فى السبع ومنظف سيارات... وتستااهل اكترررر من كدة يا دكتور..

وكرمنا ايضا الاستاذ وليد عادل .. على دوره الفعال وخبرته الميكانيكية مع الاعضاء وتقديم حلول عملية من واقع تجربته مع الصنى لمدة 160 الف كيلو وبجد وليد من الاعضاء اللي ما بيتاخرش على حد اذا طلب مشورة ومساعدة .. من الاخر كدة ابن بلد جداااااا

وكانت الهدية عبارة منظف انجكشن من ليكوى مولى للسيارة ودي حاجة بسيطة يا ويل....

في نهاية التكريم اتفاجئت بلفتة اكتر من رائعة من الدكتور ايهاب باسم اسرة قسم نيسان.. عبارة عن برواز لشهادة تقدير..... كانت بالنسبالي شهادة اعتزاز بمعرفتي بأخوة مش حقدر اعوضهم. ... ..وبجد يا دكتور ايهاب حضرتك انسان خلوق وشهم وابن ناس وانا اتشرفت بمعرفتك ...... ربنا يجمعنا دايما على الخير

واسدل الستار بعد تكريم الاعضاء
واكيد هناك تكريمات اخرى فى مقابلات اخرى لكل عضو يدخل وسطينا ويكون له دور فعال مع الاعضاء.... احنا مش بنكرم عشان نكافئ.. احنا بنكرم عشان نسلط الضوء ونبرز الدور ومجهود العضو في تفانيه للمنتدى.....

تحياتى لكل الاعضاء اللى شرفونا من اول اليوم .. والاعضاء اللى شرفونا فى نهاية اليوم
واخص ضيوفنا اعضاء قسم الصينى byd اخوانى واصدقائى باسم .. ومحمد جاد اللى طبعا هما مش ضيوف خلاص واصبحوا صحاب مكان

واخص بالشكر حضور مؤسس قسم نيسان مهندس سبعاوى حبيب الملايين
اللى بوجوده وروحه معانا بتعطى رونق وجمال للمقابلة
ومنتحرمنش من وجودك معانا دايما

واخص بالشكر كل الاعضاء اللى نورونا من المحافظات سواء من طنطا او اسكندرية او من شبين
على حبهم وتواجدهم معانا وتقديرهم لينا

وهكذا كان يومنا حافل
بالقوة .. والود .. والاخاء .. والتقدير .. والحماس .. والتشويق .. والفرحة فى تجمعنا .. والحزن فى الوداع
ولكن نوعدكم .. بلقاء قريب يجمعنا من جديد نلحق سويا فى سماء قلوبكم
وعلى ارضنا نايل موتورز

تقبلوا تحياتى
اخوكم فى الله
احمد مصطفى

**Elshennawy** · 20-09-2011 02:14 AM

السلام عليكم ورحمة الله وبركاته

ولا اروع فعلا .....
بس بعد ما صورت الوليمه ....مش عايز اقولك انا جعت قد ايه..

بارك الله فيك يا ستاذ احمد وفي كل شخص روحه طيبه
خلى المقابله ليها طعم و بعد اكبر بكتيير من مجرد معرفه اشخاص على الانترنت

بصراحه الاعضاء اللي تم تكريمهم يستاهلوا اكتر من كده بكتير
واللي متكرموش برده اخوه افاضل وربنا يديم الود و المعروف

استاذ احمد :: ربنا يخليك لينا و مش عارفين نودي جمايلك فين

وعقبال المقابله الجايه لما تبقى احلى من كده كمان وكمان

هدانا الله واياكم لصالح الاعمال

**Bishoy.Girgis** · 20-09-2011 02:28 AM

برافو عليك يا احمد علي سرعة تحضير التقرير بالجمال ده .. متشكر يا جميل
و انا بصراحة مهما قلت و اتكلمت علي المقابلة الجميلة ديه و مدي المحبة و الاخاء و الرقي في التعامل بين الاعضاء لبعضهم للبعض كانت غير عاديه و الكل حابب يتعرف علي الاعضاء الجديدة و الكل حابب يتكلم في موضوع معين .. محدش بيقاطع حد .. كله بينصت للاخر
كانت مقابلة رائعة و طبعا اتشرفنا بكل الضيوف اللي جاءوا مع الاعضاء و الضيوف اللي جاءوا من الاقسام الاخري من المنتدي من قسم هوندا و ميتسوبيشي و الbyd و هيونداي و رينو
صراحة كانت مقابلة ممتعة و بخص بالشكر اخويا الحبيب احمد مصطفي علي تعبه و مجهوده عشان يعد المقابلة و تكون في اجمل صورها
و طبعا مش هنسي اقول مبروك لكل الاعضاء اللي اتكرموا اللي فعلا يستحقوا التكريم الجميل ده بجدارة .. الف مبروك