تجربتى الثانية مع جهاز حماية المستهلك

**nicegypt** · 20-09-2011 03:34 PM

جهاز حماية المستهلك ما زال يعمل بكل كد وكفاءة

الامر بأختصار
كان فية مشكلة ف التكييف عندي والضمان حرقة وقصص كدة
المهم كنت عامل شكوي مع حقوق المستهلك .. عن طريق الفاكس وموقعهم
بعد مرور شهرين حسيت ان مفيش غير حقي بدراعي ورحت الفرع الرئيسى وقليت ادبي
واخدت فلوسى ومشيت .. انهاردة حقوق المستهلك اتصلو بيا وقالو انهم جايين
لي قلت ومالو .. جم وجابو معاهم المدير التنفيذى لشركة التكييف والمدير المالى
وطبعا اللى حصل معروف .. لكن عفا الله عما سلف .. لقيت نفسى بلغي الشكوي
رغم انهم حرقو الجهاز قدام عينى وطلع شياط والبوردة طارت .. لكن معرفش
لغيت الشكوي وقلت على الله بقا .. والموظف بتاع الجهاز قالى قدامهم مفيش اختراع
اسمة رشاوي عندنا واكبر دليل انى جبت لك المدير التنفيذى والمالى لحد عندك
.. لانك دفعت مبلغ ومستفدتش بية ... عمار يا مصر .. دة تانى تعامل ليا مع جهاز حماية
المستهلك .. انصح الجميع بعدم السلبية وان تراسلهم فوراَ بدون اي تردد ف حالة وجود اي مشكلة
مع اي سلعة

كان ليا مشكلة سابقة في كربراتير جديد صيني لعربيتي بـ 800 ج
واخدت حقى عن طريقهم وكتبت التفاصيل ف مشاركة سابقة
جهاز اشهد لة بالكفاءة وادعوا الله ان يزيدهم ايماناَ ورقياَ

**hobiko** · 21-09-2011 11:20 AM

شكرا على نقل التجربة ...... يا ريت كل الناس تبقى ايجابية زيك كده

**medociv** · 21-09-2011 01:38 PM

التكييف ده نوعه ايه بعد اذنك

**nicegypt** · 21-09-2011 04:35 PM

المشاركة الأصلية كتبت بواسطة medociv

التكييف ده نوعه ايه بعد اذنك

نوع مصري معروف ... مش عايز اذكر الاسم ليكون ممنوع ويبقى اشهار .. نوع بنشهد لة بعدم الكفاءة
عندى للاسف 2 من نفس النوع كرهوني ف عشتى وصرفت تمن جديد ع الاتنين
لدرجة انى حلفت انى ارمى واحد منهم ف الزبالة رغم انة سليم وف الضمان
لكن المصاريف اللى بيطلعوها ف كل زيارة تخليك تجيب غيرة
لو المشرفين يسمحو هقول النوع