الموضوع: سؤال في حج القرعه 2011

المشاركة الأصلية كتبت بواسطة mohamed_selim

انا رجعت للنت :)
بص يا سيدى ...لو فى رجاله مع بعض و ستاتهم مع بعض بيحطوهم فى نفس الدور بس حاول و انت بتسكن تكون فى الدور الاول او الارضى عشان زحمة الاسانسيرات لو هتطلع على رجلك
خليك مع البعثه عشان متبهدلش الوالده ... هيطلعوكو عرفات من يوم 8 (مش هتباتو فى منى) و دى واخدين فتوى بيها و فى حالتك الفتوى هتكون اقوى عشان انت معاك والدتك و ده سبب كافى عشان تساعدها ...
متمشيش من عرفات غير بعد ما المغرب يأذن ب 10 دقايق (ممكن تبدأ تتحرك بس العربيات بتركن خارج حدود عرفات فخلى بالك من الموضوع ده)
فى اى حته اتفق معاها على مكان تتقابلو فيه لو تهتو من بعض و خلى معاها ورقه فيها كل البينات بتاعة الفندق و المخيم فى منى و عرفات
افضل شيء تجيب خطين سعودى من هناك واحد معاها وواحد معاك عشان تلاقو بعض
خد معاك ادويتك و ادويتها بزياده و كمان مضاد حيوى لاحتقان الزور و البرد عشان الادويه هناك غاليه موت
بالنسبه للفلوس انا كنت مغير من هنا و هناك بيقبلو مصرى برضه فى الصرافه ... ساعات التغيير من هناك بيكون افضل و ساعات لأ ...

مش عارف اقوزلك ايه تانى؟ لو عندك انت اسئله قولها و انا احاول اجاوبك ... متنساناش فى الدعاء و ربنا يتقبل ان شاء الله

جزاك الله خيرا بس حكايه عدم البيات في مني دي في حج القرعه بس و لا الجمعيات كمان اللي تبع التضامن الاجتماعي ؟
و لو عندك معلومات عن حج الجمعيات فلا تبخل عليه بيها كمواقف الواحد ياخد باله منها لما الوالده تسافر

السلام عليكم و رحمة الله و بركاته
الاخ ezzeldin و فقك الله و والدتك فى رحلة الحج
نصيحة خالصة لوجه الله تعالى رافق والدتك فى كل خطواتها لا تتركها لوحدها اثناء السير الى المسجد الحرام او الى المسجد النبوى و اثناء رمى جمرة العقبة الكبرى تولى انت الرمى عنها حتى لا تقع فى وسط ازدحام الناس للرمى و اذا كانت والدتك مسنة لا تستطيع السير اشترى لها كرسى معدنى قابل للطى من هناك تجلس عليه اثناء الصلاة و خذه معاك ضرورى فى عرفات و منى و كما قال لك اخونا فى الله ستقابل من الاشياء المستفزة و الناس كثيرا فتذكر دائما ان تعويض هذا الفرض صعب جدااااااااااااااااااااااا و استعن بالله و داوم على الاستغفار و التعوذ بالله من كل شئ يضايقك ..........الاهم من هذا و ذاك انك تقرأ عن الاخطاء التى يقع فيها الحجاج من الان و تدونها كى لا تنسى و تقع فيها و اهمها التمسح و التبرك بقبر النبى صلى الله عليه و سلم و نية الزيارة الى المدينة المنورة هى الصلاة فى المسجد النبوى لما فيه من ثواب عظيم و ليس زيارة القبر ........اذهب الى المزارات فى المدينة و ده بيكون على حسابك للرؤية فقط و الصلاة فى تلك الاماكن و ليس للتبرك بها ..على فكرة المزارات بتكون على حسابك و ليس لحج القرعة دخل بها
اذا اصبت باي شئ لا قدر الله توجه الى البعثة الطبية المرافقة لكم و سوف يقوموا بالكشف فورا و صرف علاج مجانى ...........اى مشكلة تحدث توجه الى رئيس البعثة المرافقة لكم و هو هيحلها باذن الله
لا تحاول الدخول فى اى مشكلة مع الطرف السعودى (المطوف و اتباعه ايا كان السبب عليك و رئيس البعثة هو يتفاهم معاهم )...........حاول تختار لوالدتك صحبة من سيدات من نفس البعثة عندهم طاقة و جدعنة و يفضل لو كان ازواجهم او ابنائهم المرافقين لهم يكونوا فى نفس غرفتك و يكون فى تواصل بينكم علشان تبقى مطمئن عليها ..............احرص على ان تصطحبها اكبر قدر من الصلوات داخل الحرمين و طبعا فى الطواف و السعى لا تتركها (فما اجمل و لا احلى من مصاحبة الام تلك اللحظات و رؤية الابتسامة على وجهها عند الانتهاء من كل مرحلة )
حاول تاخذ اكل جاف معاك فى ايام عرفات و منى لان الاكل اللى بتوزعه البعثة المصرية لا يغنى و لا يسمن من جوع و ده مش معناه انك تكتر فى الاكل علشان تقدر تواصل المناسك بسهوله ان شاء الله .......حج مبرور و ذنب مغفور باذن الله

الاخوه الافاضلgogeوmohamed_selim جزاكم الله خيرا وتقبل الله منا ومنكم صالح الاعمال واعاننا علي ذكره وشكره وحسن عبادته