سخونة فى السريع

**ahmed_rgina** · 21-09-2011 12:28 PM

انا عندى ريجاتا موديل 85 العربية لما اسافر بيها وادى الغيار الخامس واجيب سرعة 120 الاقى مؤشر الحرارة ارتفع الى 90 درجة مؤية ومروحة الرداتير اشتغلت ودرجة الحرارة ماتنزل ابدا والمروحة مستمرة فى التشغيل انزل للسرعة 100 كيلو متر / ساعة تنزل الحرارة الى 80 درجة
والمروحة تفصل مع العلم ان دورة التبريد تمام والرداتير كذلك ودرجة حرارة الجو مناسبة والماتور صوتة هادىء والسحب تمام ماعدا اننا عندى طقم شنبر تفتكروا اية حل المشكلة دية؟

**mrastra** · 21-09-2011 12:39 PM

طب هل تم عمل اى صيانة قبل المشكلة وتحديدا تغيير سير كاتينة ؟

**ahmed_rgina** · 21-09-2011 12:42 PM

للاسف لم يتم عمل اى جديد قبل هذة المشكلة

**ahmed_rgina** · 21-09-2011 12:46 PM

تفتكر المشكلة دية نتيجة طقم الشنبر وعمرة الموتور على فكرة انا لسة ماعملتش حاجة من دول خالص

**mrastra** · 22-09-2011 01:15 PM

لا حتى لو العربية عاوزة عمرة متسخنش العربية
طب اؤلك على حاجة
اطمن على سير طلمبة المياة كدة يمكن مش مشدود كويس او يعنى رخى شوية ......لو مكنش هانفكر فى طلمبة المياه نفسها

**ahmed_rgina** · 28-09-2011 12:25 PM

انا تاكدت من سير الدينامو وكان مشدود كويس وحالتة جيدة وكمان طرمبة المية جديدة متغيرة من حوالى 6 شهور. بس على فكرة المشكلة دية بدات ظهورها انى كنت ماشى بالعربية وعداد الحرارة وصل للعلامة اللى بعد الاحمر ومنغير ماخد بالى لاقيت العربية بطلت فجاة استنيت لحين ماالعربية بردت تماما وابديت ازود مية ولكن كانت طرمبة المية فيها تسريب المهم غيرتها بواحدة جديدة ومن وقتها العربية مش كويسة بتاكل زيت وبتسخن على السريع دة غير الدخنة الكتيرة من خرطوم الفايص .وانا والله عاجز عن الشكر واسف على الاطالة

**gazzar91** · 28-09-2011 01:18 PM

المشاركة الأصلية كتبت بواسطة ahmed_rgina

انا تاكدت من سير الدينامو وكان مشدود كويس وحالتة جيدة وكمان طرمبة المية جديدة متغيرة من حوالى 6 شهور. بس على فكرة المشكلة دية بدات ظهورها انى كنت ماشى بالعربية وعداد الحرارة وصل للعلامة اللى بعد الاحمر ومنغير ماخد بالى لاقيت العربية بطلت فجاة استنيت لحين ماالعربية بردت تماما وابديت ازود مية ولكن كانت طرمبة المية فيها تسريب المهم غيرتها بواحدة جديدة ومن وقتها العربية مش كويسة بتاكل زيت وبتسخن على السريع دة غير الدخنة الكتيرة من خرطوم الفايص .وانا والله عاجز عن الشكر واسف على الاطالة

المكنة دي لازم تتفتح و مقدرش أفتي أكتر من كده

و الله أعلم
في رعاية الله

**ahmed_rgina** · 28-09-2011 05:35 PM

انا فعلا هاعمل كدة والله المستعان وانا متشكر جداااااااا على اهتمامك ياباشا

**ahmed_rgina** · 17-11-2011 12:00 PM

الحمد لله انا عملت طقم شنبر اليومين دول ولسة مستلم العربية النهاردة بس كنت واقف مع الميكانيكى فى كل حاجة وتقريبا كنت شغال معاة فى الفك والتركيب والنظافة الخ
المهم انا لقيت فى وش السلندر المية كانت بتهرب على صباب العادم نتيجة الجوان كان ضارب فى نفس المكان ودة كان تفسير لنقص المية باستمرار رغم انى متاكد ان مفيش تسريب تماما من دورة المية بالكامل
ايضا اكيد دة كان السبب الرئيسى فى سخونة العربية فى السريع . المهم كانت فتحات المية اللى فى وش السلندر كانت مسدودة من الصدا بنسبة 80% على كل الفتحات . المهم وديت الوش للخراط قالى ماينفعش علشان عاوز يتقشط المهم استبعد الفكرة دية وجبت واحد استيراد نضيف كامل بالهد بتاعة بس للاسف الحاجة ولعت نار جبتة بالعفية 650 جنية وسالت عند الدنيا كلها لقيت اغلى من كدة كمان والحمد الله العربية دارت ولسة الموضوع تحت التجربة بس احساسى ان الموضع احسن من الاول . ومتشكر جدا على اهتمامك وردودكم عليا وانشاء ساوفيكم بالاخبار اول باول