ارجو الرد على مشكلتى

**marinamaro** · 21-09-2011 08:01 PM

السلام عليكم ورحمة الله وبركاته
ياجماعه مشكلتى بأختصار ان معايا فى الشغل زميلتى مؤدبه ومحترمه ومتدينه وكنت عاوز اتقدملها من سنتين قالتلى كان عندها ظروف ان والدها رفض لان ابن عمها كان اتقدملها ورفضه ووالدها قال مش هيجوزها غير لما ابن عمها يتجوز( هى من الشرقيه من بلد ارياف) والموضوع انتهى على كده
المهم بعدها بسنه كلمتها تانى وكنت محرج وانا بكلمها كان سبب رفض والدها المره دى ان انا من القاهره وهو عاوز يجوزها لحد من بلدهم يعرفه
دلوقتى انا عاوز اتقدملها تانى بس محرج اكلمها لانها زميلتى فى الشغل والعلاقه بينا علاقه شغل ودى هتبقى المره التالته لو كلمتها فى الموضوع ده
هل اكلمها ولا لا
هل هيبقى شكلى وحش او ممكن تقول عليا حاجه لو كلمتها تانى؟
واحد زميلنا عرض عليا انه يسالها من غير مايجيب سرتى فى الموضوع بس انا كان نفسى اكلمها انا مش عاوز حد يتدخل
وانا نفسى ارتبط بيها جدا ومش عارف اعمل ايه؟

**yassin_samir** · 21-09-2011 08:15 PM

كبر منها دى بتقول بس كدة حجج و خلاص وهيا مش عايزة تكسفك و تقول انها مش عايزاك

**hossam20102010** · 21-09-2011 08:21 PM

حضرتك بامانة يعنى.... ردود والدها غير منطقية ... او بمعنى اصح ممكن تكون هيا حبت ترفض بس رمت السبب على غيرها

يعنى رفض بس بلطافة.... معلش اصل ممكن تكون النقطة ديه مش واصلالك

الحل : خلى واحد او واحدة يكون ثقة ... ويقولها انه هوا جايبلها عريس ومن القاهرة ... لو قالت اه اوك.... يبقى كانت بتحور ومش عايزة ترتبط بيك .... لو قالت لا يبقى فعلا هيا صادقة وان والدها مش عايز يجوزها حد من خارج محافظته

**gamela** · 21-09-2011 08:33 PM

والله حضرتك لامشكلة ولا حاجة طالما غرضك شريف وداخل البيت من بابه زى مابيقولوا وغرضك الارتباط بانسانة على كلام حضرتك محترمة وبنت ناس حضرتك افتح معاها الموضوع تالت واى بنت بتحس بالانسان اللى قدامها من طريقة كلامه جدية ولالا وهى اكيد حاتلاحظ انك شاريها ومتمسك بيها وحاتفرح بانك برده مافقدتش الامل مع والدها وانا احسن حاجة عجبتنى فى كلام حضرتك قد ايه حضرتك خايف على الزمالة اللى بينكم لان نادر مايكون فى حد فى الزمان ده كده وربنا يوفق حضرتك وعلى فكرة ساعات بيكون الاب له شوية طلبت علشان يخلى اللى طالب بنته يحس بغلاوة بنته عنده حضرتك ماتخدهاش بمعنى تطفيش والاحسن حضرتك انت اللى تكلمها

**MOUSTAFA_SAAD** · 21-09-2011 08:43 PM

هى غالبا مش عاوزاك بس محرجه تقولك وبتتحجج بحجج واهيه

فكك منها وربنا يكرمك بغيرها ان شاء الله والموضوع ده عمره مايقلل من شانك

**stoon** · 21-09-2011 09:19 PM

جرب ياباشا مش حاتخسر حاجة ......حتى حاتكون فى نظرها راجل محترم مش اى حاجة تانية ومش حاتقلل شانك فى حاجة .... وبعدين ليه لا ابوها بيعمل كده فعلا عادات الفلاحين بيتجوزوا منهم والقريب بالخصوص ومن بلدهم
جرب يمكن الوقت غير الفكر والبنت مفيش فى حياتها حد تانى دخل يعنى مش تطفيش خالص

**marinamaro** · 21-09-2011 09:20 PM

شكرا ياجماعه على الردود بس انا عرفت قبل ما اكلمها المره التانيه ان فى واحد زميلى برضه كلمها قبلى وراحلهم البيت كمان ووالدها قاله نفس السبب انه مش من بلدهم
ولما انا كلمتها اول مره كان والدها مسافر وقالتلى هرد عليك لما يجى (يعنى على ما اعتقد لو مش موافقه كانت قالتلى السبب علطول لا هى قالتلى بعدها باسبوع )
ارجوكوا انصحونى اعمل ايه لانى بصراحه مش عارف اعمل ايه؟

**MOUSTAFA_SAAD** · 21-09-2011 09:30 PM

المشاركة الأصلية كتبت بواسطة marinamaro

شكرا ياجماعه على الردود بس انا عرفت قبل ما اكلمها المره التانيه ان فى واحد زميلى برضه كلمها قبلى وراحلهم البيت كمان ووالدها قاله نفس السبب انه مش من بلدهم
ولما انا كلمتها اول مره كان والدها مسافر وقالتلى هرد عليك لما يجى (يعنى على ما اعتقد لو مش موافقه كانت قالتلى السبب علطول لا هى قالتلى بعدها باسبوع )
ارجوكوا انصحونى اعمل ايه لانى بصراحه مش عارف اعمل ايه؟

ياعم سيبك
ابوها باين عليه خايف يطلعها من البلد
بس انت بتقول زميلتك فى الشغل يعنى هى ساكنه فى القاهره ولا فين

**gamela** · 21-09-2011 09:33 PM

المشاركة الأصلية كتبت بواسطة marinamaro

شكرا ياجماعه على الردود بس انا عرفت قبل ما اكلمها المره التانيه ان فى واحد زميلى برضه كلمها قبلى وراحلهم البيت كمان ووالدها قاله نفس السبب انه مش من بلدهم
ولما انا كلمتها اول مره كان والدها مسافر وقالتلى هرد عليك لما يجى (يعنى على ما اعتقد لو مش موافقه كانت قالتلى السبب علطول لا هى قالتلى بعدها باسبوع )
ارجوكوا انصحونى اعمل ايه لانى بصراحه مش عارف اعمل ايه؟

حضرتك اتوكل على الله وكلمها تانى وشوف الرد يمكن باباها يكون غير رايه ولو لسة عند رايه وزميلتك موافقة عليك ومقتنعة بيك اول حاجة صلى صلاة قضاء الحاجة شوفوا حد من اقارب زميلتك يكون كبير فى السن يقدر يقنع باباها وروح له انت بنفسك وخد معاك اهلك واشرح له قد ايه انت شارى بنته وحاتسعدها وبالتاكيد حايقتنع لما يشوف ان فى راجل محترم دخل البيت من بابه وشارى بنته

**stoon** · 21-09-2011 09:38 PM

المشاركة الأصلية كتبت بواسطة moustafa_saad

ياعم سيبك
ابوها باين عليه خايف يطلعها من البلد
بس انت بتقول زميلتك فى الشغل يعنى هى ساكنه فى القاهره ولا فين

ياباشا هو الشغل بتاعك فى البلد عندهم ولا فى القاهرة ؟؟؟؟ ..... اقولك على حاجة
لو عندهم فى البلد محلولة اقعد فى بلدهم اهى جنب شغلك......
ولو فى القاهرة يبق زميلتك متعودة على جوا القاهرة وابوها حايقتنع بسرعة لانه متعود على غيابها
وربنا يوفقك بس ابقه اعزمنا