انا هعجز وانا قاعد ف البيت

**mazher_m** · 26-09-2011 03:42 AM

لو عايز كلام جد انت اللي مش عايز تشتغل.
اولا انت من الاسكندريه يعني من المحافظات اللي فيها انشطه متنوعه وحركه اموال مستمره وتجاره و و و.
ثانيا انت خريج حقوق علي اسواء الاحوال لو كنت اشتغلت في مكتب محامي من اول متخرجت كنت عملت علاقات مع موكلين وعملتلهم شغل لحسابك بعيد عن المكتب وده كان يجبلك دخل محترم ...وتقدر بعد كده يبقالك مكتب خاص...انا عارف ان صاحب المكتب مبيديش مرتب بس الفكره انك كده كده بتاخد فلوس من البيت كنت استغليت المكتب في انك تعمل علاقات.
ثالثا علي فرض انك مبتحبش المحاماه اشتغل في اي مجال اعمل اي مشروع يا اخي انت ممكن تاجر مكان وتعمله سيبر لو انت غاوي نت ومش هيكلفك حاجه اجر محل واعمله اكسسوار عربيات لو انت غاوي عربيات ولو قلت انا مليش في التجاره يا اخي تعالي علي نفسك واشتغل في اي محل لغيت ما تتعلم وبعد كده اعمل مشروعك خدبالك الايام بتجري ومحدش بيبكي علي حد .
ولو عايز نصيحه فكك من السفر بره ليسانس حقوق يعني اخرك مندوب مبيعات واللي هتاخده يادوبك يعيشك هناك.
اسمع كلامي شوف انت ميال لاي مجال وروح اشتغل فيه حتي ولو عامل لحد متتعلم وبعد كده اعمل مشروعك .
انا بقلك نصيحه لوجه الله كل يوم بيعدي عليك هتتسال عليه.

**akramlail** · 26-09-2011 07:10 AM

المشاركة الأصلية كتبت بواسطة mazher_m

لو عايز كلام جد انت اللي مش عايز تشتغل.
اولا انت من الاسكندريه يعني من المحافظات اللي فيها انشطه متنوعه وحركه اموال مستمره وتجاره و و و.
ثانيا انت خريج حقوق علي اسواء الاحوال لو كنت اشتغلت في مكتب محامي من اول متخرجت كنت عملت علاقات مع موكلين وعملتلهم شغل لحسابك بعيد عن المكتب وده كان يجبلك دخل محترم ...وتقدر بعد كده يبقالك مكتب خاص...انا عارف ان صاحب المكتب مبيديش مرتب بس الفكره انك كده كده بتاخد فلوس من البيت كنت استغليت المكتب في انك تعمل علاقات.
ثالثا علي فرض انك مبتحبش المحاماه اشتغل في اي مجال اعمل اي مشروع يا اخي انت ممكن تاجر مكان وتعمله سيبر لو انت غاوي نت ومش هيكلفك حاجه اجر محل واعمله اكسسوار عربيات لو انت غاوي عربيات ولو قلت انا مليش في التجاره يا اخي تعالي علي نفسك واشتغل في اي محل لغيت ما تتعلم وبعد كده اعمل مشروعك خدبالك الايام بتجري ومحدش بيبكي علي حد .
ولو عايز نصيحه فكك من السفر بره ليسانس حقوق يعني اخرك مندوب مبيعات واللي هتاخده يادوبك يعيشك هناك.
اسمع كلامي شوف انت ميال لاي مجال وروح اشتغل فيه حتي ولو عامل لحد متتعلم وبعد كده اعمل مشروعك .
انا بقلك نصيحه لوجه الله كل يوم بيعدي عليك هتتسال عليه.

طبعا بشكرك على النصيحة الغالية ومقدرها جدا
بس الواقع مش سهل اوى كدة
اولا اسكندرية محافظة زى اى محافظة من الاقاليم دة ممكن يكون فى محافظات فرص العمل فيها اكتر لان اغلب المجالات فيها لو استثنينا الشركات الكبرى والبنوك والميناء ودى اماكن اغلبها منعرفش ندخلها دة بالنسبالى ومش هقولك محولتش لا حاولت وفشلت
فى عندك بعد كدة شفل فى كافيهات وقهاوى ومطاعم وشماسى عالبحر
كافيهات ومطاعم وقهاوى لو انت اصلا معاك دكتوراة ودة الواقع ورحت قلتلة عاوز اشتغل مش هيشغلك لانة عاوز مستوى معين وعاوز واحد خبرة وفى المجال ودة حقيقى
اما العلاقات انا اشتغلت فمكتب خالى وفترة طويلة بس انا قلت انا مش اجتماعى يعنى بعمل المطلوب منى وبروح لا بقعد على قهوة ولا بلوك مع حد ممكن دة عيب منى
تانى حاجة اسلوب الناس والشغل فى المحكمة حضرتك متعرفش عامل ازاى لو انت انسان سوى عمرك ماهتقدر تتعامل كل يوم مع بشر بالمنظر دة وتدفع رشوة لكل واحد وواحد يبتزك كل يوم وزحام وحاجة مقلكش وفى الاخر باخد مصروفى ولا خبرة ولا زفت
عوزنى افتح مكتب هشتغل نصاب ودة بردة من الواقع وجايز كل اللى اعرفهم دفعتى من المحامين شايفنى فاشل وانا شايفهم نصابين ومحورجى وبتاع كلام واهبش اى قرش وبيحاربو بعض على 5جنية واجرى
الواقع صعب
انا رحت لمحل ملابس قدمت فية وكان عامل اعلان بصلى من غير اى اسئلة وقال متنفعش
هو لية نظرة وعاوز واحد معين

**yahyanaabil** · 26-09-2011 12:38 PM

فعلا اسكندريه الشغل فيها قليل فحت رغم ان فيها 55 % من الصناعات البتروليه بس شركات البترول ديه لناس معينه او على الاقل محتاج واحد ليك جوه الشركه يدخل الcv بتاعك جوه عشان يتبص فيه
انا شايف مشاركه بتقول ان الشركات الكبيره مش بتقبل القرايب الكلام ده فعلا موجود بس حبر على ورق و الوسايط بتكسر اى قانون فى الدنيا بس الواحد لازم يكون ايجابى ويحاول فى كل حته
يا جدعان الشركات اللى موجوده فى مدينه نصر بس قد اللى موجوده فى اسكندريه اربع مرات

**phantom0xx0** · 26-09-2011 03:04 PM

معظم إن مكنش كل الشركات multinational بتبعت emails بالوظائف الجديدة داخل الشركة الأول ،، علشان لو فيه حد عاوز يعمل rotation لوظيفة أخري حتي لو فيه حد في نفس الأدارة ممكن ياخد الوظيفة الفاضية عن طريق ترقية .... في حاله أن مفيش حد مناسب ، بيعملوا out sourcing عن طريق مكاتب التوظيف أو الأعلانات

**akramlail** · 26-09-2011 07:17 PM

سهل قوى ان اى حد ينتقد اللى قدامة ويقول انت اللى مش عايز تشتغل لو عايز هتشتغل لو حتى عامل
انما الواقع مش كدة هوة نفسة لو اتحط مكانى مش هيعرف يعمل حاجة م اللى بيقول عليها
اكبر مشكلة للخرجين فمصر دلوقتى بيعانوا منها عشان يشتغل هى الخبرة
لانة بيتخرج بيفضل يدور على شغل ويضيع ممن عمرة وقت وبعدها يقبل يشتغل اى شغلانة حتى لو حرفى
لحد ما يظهرلة حاجة احسن بس الواقع ان اى شركة محترمة من الكبار لو شافت انك كنت شغال شغلانة مستواها مش قد كدة مش هتقبلك
وبردة هتعانى ان بعد كل المرمطة دى ومخدتش خبرة تفيدك فى اى حاجة
مفيش مكان يساعد الخريجين ويديهم خبرة تأهلهم انهم يشتغلوا حتى لو ببلاش
انا واحد بعد ما خدت كورس التجارة البحرية حاولت اشتغل فى اى شركة ملاحة وما اكثرهم فى اسكندرية ودة كان سبب اختيارى للمجال دة
الكورس بيعلم الاساسيات بعد كدة الشغل هو اللى هيعرفك الباقى
طبعا مفيش حد عبرنى عشان عاوزين خبرة عاوزين حد يشتغل على طول ودة اللى اتقالى فى مقابلات
طب حتى اشتغل ببلاش مش عاوز مرتب لحد متعلم واخد خبرة حتى دى ملقتهاش
والشغل زى الجواز سنك يعدى 28 سنة خلاص فرصك بتنعدم لان اغلبهم بيطلب السن لايزيد عن 28 بالكتير 30
واحنا لسة بندور على خبرة
حد عندة خبرة سلف ؟

**MOUSTAFA_SAAD** · 26-09-2011 07:39 PM

هو فعلا فيه ناس كتير بتقول الكلمتين دول
انت مش عاوز تشتغل وانتا كذا وكذا

المهم انا شوفت ناس كتير فى شركات ومناصب مش عارف وصلوا فيها ازاى واؤكدلك انها ممكن بالحظ او الوسطه او فى الغالب طبعا ده رزقهم وربنا كتبلهم كده

يعنى مش شرط النجاح يكون نتيجة شطاره

افيه ناس رزقهم واسع زى مابنسمع
وناس بتحاول كتير وبتسعى ومفيش فايده رزقهم ضيق
مش عارف الكلمه دى حرام اقولها ولا لا

بس عموما كله مكتوب بامر الله اعمل اللى عليك واجتهد لاخر لحظه وان شاء الله ربنا يكرمك

**ahmadmidop** · 02-10-2011 12:42 AM

انا معاااااك يامعلم .. بدور بردوووووو .... انا خريج تجارة السنة دي والحمد لله اشتغلت محاسب في مصنع بس طلبت في دماغي فجأة اسيب الشغل معجبنيش المرتب ونفسيا مكنتش مرتااح ... بس بصراحة ندمت لان القعدة في البيت وحشة وادينا بندوووووووووووووور

**akramlail** · 10-10-2011 05:41 AM

المشاركة الأصلية كتبت بواسطة ahmadmidop

انا معاااااك يامعلم .. بدور بردوووووو .... انا خريج تجارة السنة دي والحمد لله اشتغلت محاسب في مصنع بس طلبت في دماغي فجأة اسيب الشغل معجبنيش المرتب ونفسيا مكنتش مرتااح ... بس بصراحة ندمت لان القعدة في البيت وحشة وادينا بندوووووووووووووور

ربنا يرزقك باحسن منها انشاء الله
بس نصيحة متسيبش شغل بعد كدة الا وانت رايح شغل تانى

**akramlail** · 10-10-2011 05:44 AM

المشكلة يا جماعة ان حال البلد بقى زى الزفت وبعد مكان الواحد قبل الثورة عندة امل 40% انة يلاقى حاجة كويسة
جت الثورة قلنا الحال هيتعدل ونفسنا تتفتح عالحياة من تانى
اسودت وطينت اكتر واكتر وكل يوم بتطين اكتر من اللى قبلة
واذ فوجئت ان كل الناس بعد الثورة بتتكلم فى كل حاجة ماعدا البطالة
زى ميكون مفيش اى مشكلة اصلا