عملت صيانة العشرين للكارينز عند السبع
السلام عليكم ... امبارح رحت مركز السبع فى المعادى لعمل صيانة العشرين الف.
الحمد لله تمت على خير ...
المركز نضيف جدا ... الاستقبال ممتاز و بيحددلك ايه اللى هيتعمل بالظبط و اسعاره و بيكتب ملاحظاتك فى ال job order و يتأكد انها مكتوبه بطريقه تشرح مشكلتك ...
الاستراحه نضيفه و بانوراما على الورشه فبتشوف عربيتك و هى بتتعمل
شاى و قهوه و ميه من غير اى حاجه
wifi سرعته كويسه ... كنت بشتغل من هناك عشان الوقت ما يضيعش
الصيانه اخدت ساعه و نص و كنت قايلهم على حاجه بتحصل فالوقت زاد شويه عشان يعملو check على الموضوع ده و بعدين العربيه اتغسلت من بره و من جوه (صالون و موتور و رفارف و جنوط) كجزء من الصيانه (محاسبونيش عليها كبند لوحده)
عند الاستلام مهندس الاستلام بيبص معجبوش غسيل الموتور دخل العربيه تانى اتغسل زى الجديد
صيانة العشرين زيت و فلتر و فلتر هوا و بوجيهات = 850
لما جيت ادفع مكنة الفيزا عملت مشكله مع كل الكروت بتاعتى بس فى مكنه ATM قريبه بعتو معايا عربيه سحبت و رجعت
اللى لاحظته ان الصبح بدرى (هما بيفتحو 9 و انا وصلت 9 و نص) الدنيا فاضيه خالص ... و انا ماشى حوالى 12 30 - 1 كان فى ناس اكتر
النهارده كلمنى مهندس من هناك بيطمن على اخبار الصيانه و سألنى على الاستقبال و الاستراحه و بيشوف لو فى ملاحظات قلتله كله زى الفل بس اتمنى ان مع الوقت و الضغط المستوى ميقلش ...
الصيانه الجايه ان شاء الله عندهم :)