128 بين الرمي و التظبيط (ارجو خبراء لافاده)

السلام عليكم
انا اشتريت عربيه 128 موديل 75 و اتنصب عليه اشتريتها غاليه و العربيه طلعت حالتها بيظا خالص
الماتور خفيف اخره 6 اشهر و الفتيس تروسه متكله و بيونطر و ديسك و اسطوانه و بليه و تنك بنزين مخبوط اخره 25 لتر و مروحه الريتدير بطيئه و الكابلن بطءطء في الملفات و عندي مساعد بايظ و كهربه المكانيكا بيظه و تيل فرامل اليد مش موجود غير ان دفيره الكهرباء تعبانه و العربيه و لا فيها اي نوع من انواع الكامليان و لا جريده 20 جنيه حتي
و ختها ب 12 الف و لما تمنتها لقيتها عمله 6 الف
علي فكره انا لسه جديد و معرفش في السيارات اوي
المهم نقول (ان لله و ان اليه راجعون)
نبص علي اللي جي
انا مقدرش اشتري عربيه جديده خالص
بص لقيت ناس بتتكلم فى التظبيط و بيعمله حاجات رهيبه و تعديلات و تسقيط و جنوط و مساعدين اسبور
في ناس تقول كده العربيه احسن من الجديد المستعمل و و ناس تقول اخرك سنه و هتنتحر من هتعمله فيك العربيه من مشاكل و مليون رأي و فكر
انا اتمني رد الخبراء فقط
انا معايا حدود 5000 جنيه اشد العربيه و لا ابعها لحد مربنا يرزق و اشتري عربيه جديده و ده في المستقبل البعيييييييييد
انا مش محتاج اوي العربيه عشان كده مش عايز عربيه كل شويه تبوظ و اقعد جمبها انا شغلي هرم - التجمع الخامس يعني العربيه تبوظ هعد جنبها في الصحراء
انا بدأت اقراه و افهم مكانيكا شويه
فيه ناس عمله موضوعات لشد العربيه

انا ممكن اعرف تمن تكلفه الحاجات و بتتعمل فين و مفيده و لا تكلفه علي الفاضي و تبوظ علي طول ؟

صب الرصاص علي الشاسيه
و البار بار علي شاسيه
مساعدين اسبور
واطي السوست
زجاج كهربائى للاربع ابواب
تابلوه نضيف او تغيير التابوه بتابلوه سيارة حديثه مثل الاونو او الاوبل كورسا
عداد ار بى ام ومعه مجموعه من عدادت الزيت والمياه والحراره
كراسى طياره بالنسبه للكرسيين الى قدام
التكييف
و تسقيط الماتور و تمن كل نوع من الموتيير ديه كام و صحيح الماتور الجديد سنه و بعمره ب 2000جنيه و المكانيكي يقول لا متشتريش انا هعمرهمولك ب 2200 جنيه احسن
بوجيهات رياضية
الاسلاك الى بتوصل بين البوجيهات والاسبراتير
موبينه روسى
كربراتير بابين

و لو حد فاهم اوي في 128 و تظبيطها ياريت يبعتلي نمرته و انا هكلمه

اتمني الافاده و عايز اعرف الحاجت ديه ممكن اعملها فين و بكام اتنمي يكون ناس كويسه لان الناس اللي جبتهم توهوني و خسروني ؟

بيع العربية احسن هتكلف اكتر من خمسة الاف جنيه وهتعطل منك برضه وهتكرهك فى عيشتك

تعرف ان الرد ده ديقني جدا (و انا متشكر لنصحتك برضه)
كان نفسي حد يقولي فيه امل انها تشد و تبقي جامده بس انت خالي بالك من كذا و كذا
او حد يقول ان تشد فيها كذا ب 4000 جنيه فلما تبعا مثلا تجيب 11000 و يبقس انا كسبان لان العربيه تعد
معايا شويه و مخصرش الللي دفعته
هو ممكن حد من اللي شادد عربيته 128 يكلمني لان بحس ان اللي بيسوق العربيات الجديده شايف
ال 128 بايظه حتي لو جبتالها bmw جواها

أنا زيك كده اشتريت عربيه 128 وأنا لسه جديد في السواقه والعربيات .. بس انا لما اشتريت العربيه من 3 شهور خدت معايا ميكانيكي كويس عشان يثمن العربيه , وفعلا اشترتها بنص الثمن اللي كان معروض عليا ..

المهم أنت المشكله بتاعتك انك اشتريت العربيه باعلى من سعرها وعشان تتظبط محتاج تصرف اكتر من ثمنها عشان تكون كويسه.

أنا هقولك على عربيتي لما اشتريتها كانت حالتها متوسطه وكانت ماشيه وسافرت بيها الفيوم وروحت بيها مشاوير زي من الهرم لجسر السويس والحمدلله ماشيه كويسه , بس انا دلوقتي بشدها عشان عايز اكون مطمن اكتر وانا ماشي بيها ومتعطلش مني بالذات لما اكون مسافر , فحاليا انا بشد العربيه من ناحيه العفشه هغيرها بالكامل والماتور هسقط ماتور ريجاتا 1500 ان شاء الله .
أنت ممكن تظبط العربيه من ناحيه الاساسيات لانك لو بعتها مش هتجيب اكتر من 6000 جنيه , لكن لو ظبطها شويه ممكن تجبلك اكتر .ده في حالة لو ظبطتها وتعبتك وعايز تبيعها ..

الاساسيات اللي محتاج تظبطها انك هتعمل عفشه بالكامل وتغير المساعدين والمقص وعلبه الدركسيون وتقويه الشاسيه وبارات تقويه ,وممكن تجنط لو احتجت لكده , وبعدها هتشتري ماتور استيراد وده كله هيكلفك تقريبا 8000 جنيه .بس هتصرف اكتر من كده عشان هتغير الضفيره وديسك واسطوانه وحجات تانيه يعني اعمل حسابك على 10 الاف جنيه.
وانا ممكن اقولك على ميكانيكي كويس وبتاع عفشه تروحله وتشوف هيقولك ايه وهو بيظبطلي عربيتي دلوقتي وانا ناوي اعمل موضوع شامل على تظبيط ال128 ان شاء الله هنزله في المنتدى قريب

بيع العربية احسن وش ... و اخسر يا سيدي 5 أو 6 ألف كمان! هو إنت بتشتري يا زعيم عربية تركبها و تمشي ولا تجيب لنفسك حاجة تفلسك و تطلع روحك و تعد تكع و تجري من مكانيكي لسمكري لبهيجي لكهربائي ؟! إنت عملت إيه وحش في دنيتك عشان تشوف المرار دة؟ معلش أنا بكلمك كاخ لي والله العظيم لان لي واحد قريبي كان عاوز موديل أديم أنا قلتلو إركب مواصلات أكرملك و لما ربنا يكرم يا سيدي انشا له تجيب طيارة.

بص على وصف حالة العربية انت تبعها هتبقى كسبان عشان مهما شديت وصرفت هتحس انك بتدفع فلوس على الفاضى ... استعوض ربنا

بسم الله الرحمن الرحيم
انا فى راى انك تبيع العربية
اولا : وتضح انك قفلت منها نفسيا بسبب عدم الامانة .
ثانيا : انا شايف ان الخصارة القريبة ولاا المكسب البيع لانى وقعت فى المشكلة دى قبلت كدة و خصرت 2500 جنيها فى 10 ايام
المهم و الصح انك مهما صرفت على العربية مش هتجيب الا سعر السوق و محدش بيقدر الشغل الزيادة ولاا الكماليات
يبقى مهما صرفت و تعتبت عليها مش هتجيب غير سعرها و المصاريف هتكون كلها على فيبي حرام انك تصرف عليها
و بالتوفيق بأذن الله
و حسبنا الله و نعمه الوكيل فى كل غشاش .

طب حد يعرف حد مظبط عربيته 128 و موديل جديد و عايز يبعها بسعر كويس

بص هيا هتخش في أكتر من 5 بواكي بشويه إتنين كده
ومع مشوار الهرم التجمع العربيه مش هتستحمل مهما ظبطتها معايا أختها 77 وبالعافيه بستخدمها مصر الجديد ومدينة نصر ويوم لما اتجنن أخري أروح بيها المنيل
وعربيتي حالتها أحسن بكتير من العربيه دي

هى العربيه عطلانه و لا ماشيه و دايره ؟؟؟
لو ماشيه اتحرك بيها و هات اخر كل حاجه فيها و ضبطها و احده واحده الاهم فى المهم بس بحساب و عقل اوى اوى
و شوف الدنيا هتمشى ازاى يعنى بيقول فى مساعد بايض غيره هو بس مش العفشه كلها
ماتور خفيف و فتيس يبقى هات فتيس ماشى بيه الدنيا و سيب الماتور يجيب اخره

بالعربى تعايش مع العربيه فتره من غير متصرف عليها كتير لحد متقرر و فى النص اعرضها للبيع يمكن حد يقتنع بيها و يشدها هوا

و خالى بالك طويل عليها جايز تغنيك عن اى حاجه تانيه
واوعى تسحب الفلوس كلها مره و احده

استاذ yoko
يعني لو انا ظبت الحاجات ليه العربيه برضه مش هتبقي كويسه
يعني من 20 سنه مكنش فيه غيرها في مصر و كانت بتسافر لبيا مش المنيل
انا عارف انها قديمه

أيوه من 20 سنه ممكن لكن دلوقتي لأ خصوصا إن قطع غيارها كلها دلوقتي مفيش حاجة فيهم محترمة بس أنا فترة كنت باخد الي معايا من مصر الجديدة لحلوان
يوم قبل ما أوصل حلوان جابت جوان وش سلندر
قبلها بشويه رجعت من حلوان على فرامل الهاند عشان مستر الفرامل ضرب
يوم نزلت تحت العربيه عشان أعمل قفله على المروحه عشان الثرموستات ضرب وغيرته بعدها بيومين ضرب تاني غيرته بعدها بإسبوع ضرب تالت وغيرته وبقاله سنه سليم وكل مرة من دول بهدل نفسك وإنزل تحت العربيه
يوم الدنمو فصل
يوم التقسيمه خلفت عشان السير أي كلام
وعربيتي كل الي يشوفها عاوز يشتريها عشان حالتها حلوة فتخيل
العربيات القديمه متضمنش إنها تقل بأصلها في أي وقت خصوصا مع المشاوير الكبيره

بص الموضوع ده لسه حاصل مع واحد اعرفه في رمضان مع الفارق ان الموتور كانت سليم لكن صاج العربيه كان مش قوي والعفشه والحوض مفتوح وشوية حاجات كده من اللي بتقول عليها

كان شاريها 8800 ومحتار يبيعها ويخسر ولا يشدها كانت جايباله 5500 ، لحد ما ماشي مره الركبه او الشداد حاجه كده اتكسرت .. وفتح مع السمكري وشال المكنه وظبط الحوض وقعد اسبوع مع الميكانيكي وحاجه اخر قرف وكل حاجه يطلع فيها عفريت

صرفله حوالي 1500 جنيه في سمكره وميكانيكا وقطع غيار وسرفيس موتور والمفروض الأساسيات اتظبطت تمام ومعملش حاجه في العفشه لسه .. بعد ما راح غير الزيوت وكده حاجه ضربت في الكوبلن تقريبا جلب لكن من اللي شافه كان خلاص جاب أخره رماها عند الميكانيكي

وباعها برضو من كام يوم ب5500 بالرغم من المصاريف اللي صرفها بالرغم من انه لو صلحها وعرضها في اي حته كان ممكن تجيب اكتر شويه لكن خلاص كان بيعيط منها

فا مهما تصرف هتتعب وشغلها مش هيخلص وفلوسك مش هترجعلك العربيه دابت أساسا

بالمناسبه .. لما كنت بشتري وباخد رأي الناس هنا كنت بفكر في مازدا 323 ومش فاكر ايه تاني علي قد الفلوس .. بالرغم من انها برقبة ال128

مش ناسي مهندس خالد (سبعاوي) قالي العربيه بيبان عليها العمر ضعف البني أدمين يعني لو بتشتري عربيه عمرها 30 سنه كإنك اتجوزت واحده عندها 60 سنه ..

تفتكر انت اللي هتشيلها ولا هي اللي هتشيلك :))

طب ايه افضل عربيه رخيصه و تشيلني مش انا اللي اشلها

ماروتى

ربنا يعوض عليك
بس انت عايز عربية في حدود كام
ما انت لازم تحط حدود
يعني كان في عربية تويوتا كروسيدا كويسة ومشدودة ونضيفة وموتورها جبار قدامي كانت ب 14 وعالية عن الارض بكتير
بس مشكلتها الوحيدة انها 2000 سي سي مش 1600
ودي صورتها متهيالي شكلها مش وحش ومش معروفة زي ال182
http://www.japanesenostalgiccar.com/...ida1979=01.jpg
http://cache.pakwheels.com/forums/20...heels(com).jpg

حضرتك متزعلش وان شاء الله ربنا هيعوضك اكيد وبشر الصابرين واكبد ربنا مش هيبارك للغشاش بالنسبة للعربية انا لسه شارى عربية تقريبا قريبة من الحالة الى حضرتك قلت عليها وهى موديل 73 لواحد صحبى ب 7 الاف ونص وكان اكتر عيب فيها البرومة كانت كتير اوى فعلا ومحتاجة سمكرة ودوكو وفانوس خلفى هو جاب تبلوه اوبل كورسا ب 500 جنيه غمل السمكرة والبارومة ب 800 جنيه دهان العربية بالكامل بره وجوه 1500 جنيه وعطلت منه فى الطريق مرتين الكوبلن خرج من مكانه

بص...انا حصل معايا موقف كده بالظبط........أشتريت 128 بغشوميه وكنت عامل فيها مفتح وواد مخلص بقي ومش عارف أقولك.....إشتريتها من هنا ولاقيت لك السدر فتح وشرخ والعفشه ضربت ده غير ان مكنش نافع فيها زوايا ولا أي عفريت علشان السدر المفتوح والموتور عملت لك تلات مرات عمرة موتور تغيير صبابات وبساتم وخراطة وش السلندر وبصراحه.....إتروقت منها أخر روقان............إشتريتها وقتها ب 18 وبعتها ب 13 بعد ما صرفت علي العمرات....لان مكنش معايا فلوس أشدها الشده التمام عند السمكري...............بس حقولك علي حاجه

أنت لو معاك فلوس ممكن توقفها علي حيلها وتمشيك تمام أوي....وحقولك أزاي

أولا العربيه كلها تتفك وتبقي علي الصاج وتروح للسمكري عريانه ملط.....حيظبط لك الحوض والعلب ولحامات من أول السدر لحد الإكصدام إلي ورا.....صبات الرصاص علي لحامات السدر ومعاها قضيب حديد يتعمل علشان يمسك البطاحتين ومايفتحوش السدر مع المطبات وينضف لك الحوض تمام بس عايز سمكري صايع .....المهم........حتتمعجن وتتسنفر وتترش وحتلاقيها عروسه يا معلم

.......................................

نيجي بقي للجزء التاني إلي هو الموتور ... إنت حترمي الموتور ده طبعا وتشوف واحد 1300 من بورسعيد جديد بالجير بتاعه والكربراتير....... مع طبعا بوبينه ياباني ودينمو جديد وأسبراتير إلكتروني وبطاريه جديده وإسلاك كهربا إسبور مع بوجيهات 3 شمعه كله جديد في جديد.......وطبعا معاها ضفيرة كهربا كامله من أول وجديد طالما إنت فتحت بقي

........................................

نيجي بقي للعفشه ......... طبعا عفشه كوني إسبور بالمساعدين والمقصات والياي ورا وقدام وجوز كبالن وباقي طقم العفشه وعندك كمان تنك البنزين تبدله بواحد تاني

......................................

نيجي بقي للصالون بتاع العربيه....... حتفرش العربيه كلها عازل وتحط تابلوه كورسا وتنجد الكراسي لو عايز وتحط فرش للأرضيه

......................................

نيجي بقي للعجل والجنوط............لو جنوطها محترمين ركب عليهم فرد تيوبليس لو إلي عندك رايحين أو هات لك جنوط إسبور 13 بالكتير أوي أوي


لو معاك فلوس للفيلم الهندي ده اعملها.............

بضم صوتي لصوت كل الأخوة اللي بينصحوك بالبيع. العربية طالما حالتها تعبانة بالمنظر ده يبقى هترمي فلوسك على الأرض لو شديتها. ولو وريتها للميكانيكي والسمكري هيحسسوك انهم هيعملولك البدع فيها علشان طبعا يعملوا عليك شغل وياخدوا فلوس ومحدش هيكون صريح معاك. نصيحة لوجه الله تعالى ... بيعها واخلص منها وخسارة قريبة ياسيدي ولا مكسب بعيد.

انا منصحكش تصلحها لانها عامله زى الجلابيه المهريه هترفيها من ناحيه هتتقطع من الناحيه التانىه انا كنت واخدها اساسيات سليمه و زى الفل و شديتها وبرضه طلعت عينى متصرفش عليها فلوس تانى بيعها وحط الخمسه فوق تمنها واشترى واحدة نضيفه لو مصر على 128 او اصبر وجمع فلوس حاجه تانيه وهاتها دة كلام عن تجارب مع 3 عربيات 128

دى عربيتى على فكرة

http://www.nilemotors.net/Nile/164439-a.html

انا موقتنع بكلمكم انا بفكر اخليها معايا شهرين اتعلم عليه شويه تمام و بعدين ابيعها
طب فيه حد عنده ترشيحات لعربيات تكون كويسا و قطع غيارها كويسا في حدود 15000 او اعلي شويه

نصيحه من اخ ليك كانت بدايته مع ال128 وكانت موديل 73 واشتريتها غاليه برده وقتها وفوقتها احلا تفويقه وظبطها احلا ظبطه وصرفت احلا مصاريف ومكنش في حاجه ف العفشه قديمه كله جديد ف جديد وبرضه كاره نفسي وحياتي وكنت مغيرلها كربراتير والي كان ناقص اغير مكنه جديده حرام عليك اي مصاريف في العربيه دي لو هتركبها علي كده وتستحمل وتتعلم فيها وتعيش حياتك بيها شويه وتتعلم فيها وتصلح الخفيف الي بيظهر مع الوقت الي هيبقا معدله اكبر من اي عربيه تانيه وهيضايقك وف الاخر اي جنيه هتحطه في العربيه دي الي انت اصلا شاريها اغلا من تمنها مش هيجي تاني وهتبقا فلوس ف الارض فلوس ركوب

اسف لو ردي هيضايقك وانا عارف انك عايز تسمع الرد الي يجي علي مزاجك ظبط واصرف وائنيها وكده بس انا اسف وعن تجربه لازم تبيعها
ده الصح يا تبيعها يا تعمل زي ما قلتلك

تطورات الموضوع هنا
http://www.nilemotors.net/Nile/247096-128.html