العفشه ومذلل الصعاب

**mazgangy** · 14-05-2008 07:40 PM

انا بربط عفشه كل فتره لحد ما سمعت ان وانا بربط العفشه احط مذلل الصعاب ال wd40

فكنت عايز اعرف منكم هو فايداته ايه بالنسبه للعفشه وهل بيوضع بكميات معينه والا ايه وليه اضرار على العفشه والا لا

وهو بيفرق فى اداء العفشه وممكن يمنع الاصوات اللى بتصدر من العفشه اثناء المطبات والا ايه ومشكور جداا ليكم ومستنى ردودكم وارائكم وخبراتكم وتجاربكم ومشكورين جميعا يا اجمل اعضاء منتدى وهو منتدى نايل موتورز

**Ahmad Allawy** · 14-05-2008 08:24 PM

شوف يا باشا..
الاسبراي ده ليه اكتر من فايده..
اولها انه ملين زي الشخم بالظبط.. بمعني انه بينزل في الاماكن الدقيقة اللي بيبقي فيها احتكاكات و بيزيت و يشحم الاماكن دي.. و بالتالي بيقلل من صوت احتكاك الاجزاء ببعضها..
و كمان هو مضاد للصدأ لو في صدا بين اي اجزاء فيها حركة ده بيشيله
كمان هو زيت.... يعني لو العربية مشيت بيها في المية او الطين براحتك. لأن المية مش هتوصل لأي جزء بسهولة.. عشان الزيت هيوقعها.. و المية مش هتثبت عليه..
هو ليه اصرار بس علي الاجزاء اللي مش معدن..يعني لو في اي حاجة كاوتش او فيبر.. يفضل انه ميترشش عليها..

اما الكميات.. لهو اسبراي.. يعني ترش منه لحد قبل ما يسيل.. عشان طالما سيل جامد يبقي كده كفاية.. الزيادة هتقع علي الارض خلاص.. طبقة خفيفة كفاية..
هو هيفرق شوية في الاصوات بس مش الفرق الرهيب اللي هترحظه قوي يعني.. مش هيمنع صوت خبطات او كده.. لكن لو في حاجة بتزيق ولا بتحك ممكن صوتها يقل او يروح.. لكن اكتر من كده صعب..

وعلي فكرة الناس اللي بترفع عربياتها بترش العربية من تجت كلها بيه بعد الغسيل و بترش المفصلات كلها و الموتور كله.. للحفاظ علي العربية مع الركنة..

عيبه بقي انه بيلم تراب شوية في العربية من تحت,, بس مع رشة مية في المحطة هينزل التراب و يفضل بقاياه موجودة عادي..

اتمني اني كاون افدتك..

**eslamspirit** · 15-05-2008 08:11 AM

'طيب انا عاوز اعرف اسعاره اية و العبوات اد اية؟

===========
يرجى تصغير حجم التوقيع
لأنه مخالف للقوانين
ويرجى مراجعة قوانين المنتدى
وشكرا

الأدارة 3

**banboty** · 15-05-2008 08:19 AM

اصغر عبوة فيه تقريبا 100 ملي بحوالي 8 جنيه على ما اتذكر

**eslamspirit** · 15-05-2008 08:23 AM

شكرا لردك السريع

**Ahmad Allawy** · 15-05-2008 08:53 AM

هو موجود بكترة في فروع كارفور..
و في عبوة كبيرة شوية حوالي 400 مل بحوالي 18 او 20 جنيه..
انا عندي واحدة بس لسة ماستعملتهاش كتير.. بس جامد ..
يعني مش العربية بس..
يعني لو مفصلة باب اوضه عندك في البيت بتزيق..
لوكالون باب بيستهبل..
ترش منه علي العتبة الصغيرة اللي في التلاجة او الغسالة من تحت عشان الرطوبة متعملش بارومة فيها لو في المطبخ او الحمام..
مسمار بصامولة قافش و مصدي مش عارف تفكه..
ليه اسنخدامات تانية كتير جدا..