السلام عليكم جميعا
فاكرين موضوع أخونا الجرئ حسام حسن لما تتبع سيارة نقل تسير عكس الطريق حتى تم عمل محضر للمخالف؟ هذا الفعل أسعدنى جدا وتمنيت أن أكون مكانه فعلا ، وظللت متحفزا لأى سيارة تسير عكس الإتجاه حتى جائتنى الفرصة...
على مدخل قها وأنت قادم من القاهرة وقبل كوبرى قها القديم تدخل سيارات الأجرة والنقل فى الطريق المعاكس -ولا أدرى لماذا- رغم سلامة وجودة الطريق الصحيح (على يمينه) ، وأدمنوا بلا سبب السير عكس طريق الخارج من قها.. مثلى من يومين...
من يومين قابلت سيارة نصف نقل قادمة عكس الإتجاه أمامى ليلا وقعد يبربش لى علشان آخد يمين وأعديه فأخذت شمال فى وجهه ووقفت ، رجع وحاول يعدينى فوقفت فى الطريق بالعرض وفتحت الزجاج وأخبرته أن يعود ويسلك الطريق الصحيح ، وجاءت وراءه سيارتان ووقفوا مثله وعلا صوت السائق فعلا صوتى لدقيقة واحدة استسلموا بعدها جميعا وأخذوا الطريق الصحيح ، تركتهم وسرت مائة متر لأجد سائق تويوتا محملة بشر وأيضا عكس الاتجاه ، وعملت معه مثلما عملت مع من قبله ، لكن اللى غاظنى مرور اتنين "مواطنين" حياديين وقت المشاحنة وطلبهم منى أن أترك التويوتا تمر!!! .. دى كانت أكتر حاجة تنقط .. إن بدل ما يقولو للغلطان خد التحويدة اللى قدامك وامشى سليم بييجوا على اللى بيأمر بالمعروف ويطلبوا منه ترك الأمر المنكر !!
المهم السواق دلدل ودانه واحترم نفسه ومشى فى السليم ولو كان صمم كان زماننا فى القسم ، والفضل لحسام حسن (الفضل لله أولا وأخيرا)
بصراحة فرحت إنى خليت حاجة تمشى صح حتى لو لمدة خمس دقايق
وتأكدت إن إحنا لو صممنا على الصح ممكن يمشى ، وإن إستمرار الغلط دا من صنع أيدينا...
شكرا حسام