نيساان ... وقصتي مع ابو رواش وصيانه 50 الف

**Dr.M.Mowafy** · 24-09-2011 12:53 AM

سلام عليكم
طبعا موضوعي هيبقي طويل حبتين واعزروني ملياش في السرد والحديث وتنسيق الكلام
بس اهو الواحد هيفضفض معاكم
بس الاول حابب اقدم شكر لناس وقفت معايا وبجد انا مكسبتش من العربيه حاجه غير انها سبب في معرفتي بناس بجد انا عمري ما اقدر اوفيهم حقهم
بشمهندس احمد مصطفي ( احمد تي في ) : الاول احب اقوله شكرا بجد انك سمحتي اني اتعرف عليك وانك بتعتبرني زي اخوك الصغير
ثانيا : الانسان ده لو كتبت بجد فيه سطور وسطور مش هيكفيه ولو قولت عليه كلام وجمل ونصوص مش هوفيه حقه ولو حتي اجزت الكلام وقولت كلمه واحده عمري ما هعرف اختار كلمه تديله حقه الانسان ده وكلمه حق اتحاسب عليها يوم القيامه انسان خلوق جدا ومهزب لابعد الحدود وطيب لدرجه تخجل الي يتعامل معاه يكفي اني كنت بجد في قمه غضبي وقمه غيظي الشديد واكلمه بجد اسمع منه سلام عليكم ازيك يا ابو حميد والله بحس بهدوء فظيع زي نار ونزل عليها مايه يكفي انه كان بيتحملني وانا بكلمه هو شخصيا بنوع من الغضب او الضيق وهو كان مستحملني ومقدر الظروف وبل بالعكس كان بيواسيني وهادي معايا جدا وكان بيتصل يتطمن عليا ويتطمن انا عملت ايه ويتابع معايا متابعه كامله علي مدار شهر متواصل من المعاناه وماذال المتابعه مستمره لنفس السبب وللمعرفه الاكثر بهذا الشخص الاكثر من الرائع الذي يفوق الخيال ( حلو الكلام الي بالغه العربيه ده )
مهندس اسماعيل : ده مهندس في ابو رواش وفي جزء تدريب المهندسين الجدد تقريبا وهو الي استلم العربيه تالت مره دخلتها التوكيل ... انسان غايه في الادب والاخلاق وخلوق جدا وسلسل ومحترم جدا الصراحه ويكفي ان خطه حلو ( اصلي بحب الانسان الي خطه حلو ومنظم في الكتابه ) وانا سعيد جدا اني اتعرفت عليه واتمني انه يفضل ديما زي اخويا الكبير الي اتشرف بمعرفه والله وبقوله مهما حصل في العربيه بدعيلك وربنا يجزيك خير ويتمنالك التوفيق من كل قلبي
مهندس عبد الجواد : انسان بجد غايه في الادب والاحترام وبجد مدرسه في الاخوه في الله بجد انا سعيد جدا اني اعرف شخص زي ده وكان ديما بيطمن عليا وكان متساهل جدا في اي تعامل وخدوم لابعد الحدود
مهندس طارق : هو مهندس استقبال وبجد انا بحبه في الله وكان ديما يشوفي ويقولي هخش اشوفلك عربيتك مع انه مش الي مستلم العربيه وكان يتصل بيا يقولك عربيتك فيها كذا وبيتعمل دلوقتي
مهندسه هبه : انا بجد مش عارف اقولها شكرا علي ايه ولا ايه بس هي انسانه بجد غايه في الادب وخلوقه جدا ونشيطه وكتير استحملتني وبتستحملني وقت غيظي وضيقي ويكف انها بترد في اي وقت في اليوم وانا سعيد بجد اني اتعرفت بيها وانها اعتبرتني زي اخوها الصغير وبجد يعني ربنا يجزيها خير علي تعاملها وادبها
مهندس محمد حمزاوي ومهندس هاني مبارك : جزاهم الله خيرا علي تعاونهم
سرد الحكايه :
العربيه نيسان صني سوبر صالون 2010
العداد : 47.700
دخلت العربيه توكيل بسبب مشكله في الفرامل سابت مني علي طريق المحور وقررت اني ادخل العربيه تاني يوم لسبب المشكله دي وبالمره اعمل صيانه الخمسين واقول علي كم مشكله في العربيه وهي كالتالي
1.الفرامل غريب طبيعيه حاسسها مش طبيعيه مش الفرامل الي في عربيتي واخرها سابت مني علي الطريق
2.صوت الماتور عالي جدا والار بي ام والعربيه واقفه علي 2 او 2.5
3.التكيف بيفصل
4.العربيه بتحدف نحيه شمال والدركسيون معوج نحيه اليمين
5.طلبت تركيب انذار للعربيه والصراحه المهندس عبد الجواد جابلي سعر كويس في الانذار جزاه الله خيرا

دخلت العربيه الساعه 9 والي استلمها مهندس نجيب وقالي العربيه تطلع علي 2 ونصف ان شاء الله
فضلت قاعد مستني لحد الساعه واحده وزهقت من القاعده قولت اقوم اتمشي واساله علي العربيه راح قالي انا قولتلك الساعه 2 ونصف روح اقعد مكانك بكل هدوء خت نفسي ومشيت اتمشي في التوكيل لاقيت العربيه مركونه عند المغسله وقولت اشوفها كده لانها وحشتني اول ما فتحت الباب لاقيت علبه لونها اسود وطالع منها سلكتين وطالعين من الطبلوه من ورا ومرمين علي الارض ده او مدلدله علي الارض بتاعت العربيه المهم سالت المهندس قولتله هي العربيه خلصت قالي اه قولتله يعني هي خلصت قالي اه وقالي هتتغسل دلوقتي قولتله يعني ممكن استلمها قالي اها تفضل لو عايزها قولتله طيب ثانيه بقي ايه ده وشاروتله علي جهاز الانذار قالي ده جهاز الانذار قولتله عارف بس ايه ده فيه حاجه بتتركب كده وبتدلدل علي العربيه كده امال هسوق ازاي بقي قالي ممم طيب نادي المهندس عبد الجواد وراح مدخلها تاني التوكيل المهم بعد ربع ساعه طلعت واتلاقيته مركب الانذار جمب الباب يعني لو رجليا ركبي بالتحديد مديتها شويه كانت خبطت الجهاز ده ومره في مره يتكسر وكمان لاقيت منظر السلوك وهي طالعه من الجهاز معجبنيش الوضع المهم ناديت المهندس عبد الجواد وقتلتله بعد اذنك شيل الجهاز خالص واي مصاريف انا هدفعها بهدوء بس شيله ارجوك منظر الجهاز كده مقذذ المهم الراجل الحقيقه بكل هدوء راح شايله وقالي مفيش حاجه انا مش عارف ايه المنظر الغريب ده
بعد خمس دقائق والعربيه لسه في التوكيل لاقيت واحد كده جي من ورايا وبيقولي دكتور لو سمحت ممكن اعرف عايز تشيل الانذار ليه قولتله وانت مالك قالي اصل انا الي مركبه وكده هيتكتب فيا شكوي وجزي فيعني قولي وانا اصلح المشكله قولتله يعني كل ده وهو لسه متشلشي امال العربيه مرميه عندكم ليه بقالها عشر دقائق وبعدين انا قولت شيله خلاص وانا مبحبش اكرر كلامي اكتر من مره ولو عايز تعرف السبب فعلشان انتم ناس مستهتره وناس غير مهتمه بشغلكم عرفت ياسيدي السبب شيله خليني امشي
المهم شد شويه في الكلام فعليت صوتي شويه وراح الفني ده قالي انت جي تتخاق خلاص هيتشال المهم جه المهندس عبد الجواد تاني ولم الموقف واتشال الانذار وطلعت العربيه جيت ادورها اقيت مفيش اي حاجه اتصلحت من الي قولته يعني
التكيف مبيشتلشي اساسا
الصوت بتاع الماتور عالي جدا والار بي ام علي 3
في رجه في العربيه علي السلانسيه
المهم قولت لمهندس نجيب ايه ده قالي طيب نصف ساعه هدخلها ونشوف ايه ده
فضلت مستني وبعدين طلع بيقولي ادفع تمن الصيانه في الحسابات وبعدين خد عربيتك هي خلصت وبرا اهو
فالمهم دفعت وكانوا 445 وخت وصل وطلعت اشوف العربيه ملقتهاش فقولتله العربيه فين قالي دخلناها تاني صيانه شويه وطالعه المهم اخر المطاف قالي العربيه فيها مشاكل كتيره ومش هينفع تطلع النهارده قولتله نعم ..... وهنا وصلت لقمه غيظي
وقتها كانت الساعه 4 والكل مشي ماعدا هو و3 فنيين
شديت معاه الحقيقه جامد جدا وبعدين هو قالي خد رقمي اهو وان شاء الله تطلع بليل او بكره ان شاء الله وبعدين يادكتور انا قولتلك العربيه هتبات ( وخدين بالكم اعتقد لو الي بيقرا قرا بتركيز هيعرف انه مقلشي كده ) قولتله لا محصلشي وانت كده بتالف كلام
المهم بشكل مستفذ جدا قالي لا قولتلك انت الي ناسي وابتدي يتكلم باسلوب مستفذ معايا
خت الرقم ورحت قعدت في كارفور علشان افطر ( انا من المنصوره ولا املك وقتها محل اقامه في 6 اكتوبر )

متابعه .........

**Dr.M.Mowafy** · 24-09-2011 01:02 AM

المهم فطرت وكان الفطار كالاتي مايه وباتيه وشكولاته
لان الي كان معايا وقتها 500 جنيه ودفعت الفلوس بتاعت الصيانه ولم يتبقي معي الا 55 جنيه
المهم استنيتهم لحد الساعه 9
وبقيت اتصل علي الرقم الي ادهولي نجيب محدش بيرد اتصلت يمكن كل دقيقه اتصل اكتر من مرتين ومحدش يرد
المهم ختها مشي من كرفور للتوكيل وطبعا كان مليني خوف من الشارع لانه ضلمه بقي وماشاء الله كل حاجه شفتها في وقت الثوره اكنها بتتعاد قدام عيني واكنها هتحصلي تاني
المهم
دخلت لاقيت مهندس محمد حسن ومهندس تاني معرفهوش الحقيقه المهم قولتله علي العربيه وقالي ثواني اشوفها واجيلك وطلع معاه مهندس اسمهم حلمي ده اعرفه من الصبحيه بس معلشي مذكرتش اسمه مكنشي ليه دور يعني فعال
المهم قالي العربيه فيها مشاكل كتيره منها بوابه الماتور والضفيره بتاعت العربيه بايظه وكمان الكمبيوتر بتاع العربيه فيه مشكله والحساسات والرشاشات بتاعت الماتور فيها مشكله
المهم صعقت بما سمعت وانتابني زي حاله اذبهلال كده لمده دقيقتين وبعدين ضحك خفيف كده ومسكت محمد حلمي قولتله وبعدين بقي انا عايز اروح بيتي وده في المنصوره وادي الي في جيبي ميكملشي 50 جنيه قالي طيب ده رقمي وتابع معايا خته وكلمني علي الساعه اتنين بليل وقالي العربيه مش عارفين ايه مشكلتها هي مش راضيه تدور اساسا احنا اسفين كده لازم العربيه تبات معانا بتاع كم يوم المهم كنت وصلت بقي لاخري خاصه لاني وانا خارج من التوكيل طلع عليا اتنين حرميه وكانوا عايزين يخدوا الي معايا وحتي قطعولي القميص نتيجه الخناقه بقي
المهم قعدت في فندق في اكتوبر وهنا بقي كان اول اتصال بيني وبين المهندس احمد تي في

**Dr.M.Mowafy** · 24-09-2011 01:14 AM

كلمت المهندس احمد وحكتله كل حاجه وقالي طيب اهدي وقالي يوم الاحد روح للمهندسه هبه ونشوف ايه المشكله دي
المهم فضلت طبعا قاعد خميس وجمعه في الفندق وموقف كل شغلي بقي وكان المفترض اني انزل الخميس بسبب وفاه قريبه لي كان المفترض اني انا الي هعملها عمليه ونتيجه لموضوع العربيه خليت حد تاني يخش معايا وربنا يتولاها برحمته ويخفف عنها يارب ويسامحني لاني حاسس اني انا الي شايل ذنبها
المهم يوم السبت الصبحيه بتصل علي محمد نجيب ابدا لا حياه لمن تنادي
المهم كلمت الرقم السريع بتاع نيسان
رد عليا واحد اسمه محمود وحكتله المشكله وبعد حديث طويل قالي هو انت عندك كم سنه قولتله22 خير فيه حاجه راح قالي وبتشتكي كمان وراح قافل السماعه
قولت يمكن فيه حاجه غلط
كلمت تاني وردت عليا واحده اسمها اميره وقالتلي هو انت محمد موافي اه الدكتور محمد موافي الي 22 سنه وراحت قفله
استغربت اكتر اتصلت تالت رد عليا واحد اسمه اسعد حكتله المشكله بنفاذ صبر وقالي طيب خمس دقائق وهتصل علي موبايل حضرتك وفعلا جزاه الله خيرا كلمني وقالي انا كلمت الاداره وخلال نصف ساعه هيكلموا حضرتك ولو متصلوش كلمنا بكره تاني
المهم ارتحت شويه بعد كلامه وكلمت حمايه حقوق المسهلك قولت اضيع وقت النصف ساعه كلمتهم وحكتلهم وعملت محضر وخت رقمه وقالولي وقت ما تبعت الاوراق الي طلبناها كلمنا وان شاء الله خلال 72 ساعه نكون شوفنا حل
وبعدها كلمت كم ناس قرايبي في الجيش علشان موضوع التعدي الي حصل عليا في الطريق الصحراوي ده وكمان احكيلهم علي التوكيل

علي الساعه 2 ونصف لاقيت تلفون من رقم غريب رديت قالي انا محمد نجيب انا سمعت الاسم طلعت فيه بقي الحقيقه وقالي انت كداب انت متصلتش وانت قليل الادب اذاي تتكلم بالشكل ده وكرر كلمته تاني انا قولتلك العربيه هتبان معانا كم يوم ( يعني في الاول 2 ونصف هتلع العربيه بعدها هتبات وتخدها بليل بعدين قالي هتبات كم يوم ) << وانا كتر حاجه تستفذني ان الي قدامي يكدب عليا

المهم زعقتله جامد جدا الحقيقه وراح مديني المهندس محمد حسن وحتي قبل ما يديني المهندس محمد حسن قالي انت قليل الادب وخد كلمه مش عارف اكلمه المهم قولت للمهندس محمد حسن انا مش هقبل منك كلمه واحد غير ان يا اجي اخر عربيتي وامشي يا اجي اخد عربيه تانيه غير عربيتي انا في واحده ماتت بسبب وعايز انزل المنصوره ضروري حرام عليكم ومش معايا مليم في جيبي المهم الراجل بهدوء الحقيقه جزاه الله خيرا قالي طيب هكلمك علي الساعه 11 بليل اقولك اي الي في العربيه وعلي الله تخدها النهارده
قولتله طيب
كلمني قالي مش عارفين ايه الي في العربيه والعربيه بجد مش عارفين ايه سبب المشكله مش راضيه تدور ( امال مين الي يعرف بقي ... نسال مهندس تاني ياجدعان ولا ايه رايكم )
متابعه

**Dr.M.Mowafy** · 24-09-2011 01:52 AM

تاني يوم زي ما المهندس احمد تي في قالي روح للمهندسه هبه
رحتلها وحكتلها وبعدين هي دخلتني للمهندس محمد حمزاوي
وقالي نصف ساعه وعربيتك هتطلع وتبقي تمام واسفين وشويه الكلام الحلو الي عارفينه ده
هو الحقيقه راجل عارف كويس قوي ازاي يهدي الي قدامه
المهم خت العربيه فعلا واعتزرلي كذا مره المهم بدور العربيه وبرمي عنيا فيها كده جواها ايعني لاقيت كذا حاجه
لاقيت زرار المرايه مكسور
تقطيع في الباب من الداخل في الجلد بتاعه
تقطيع في التابلوه بالاخص درج التابلوه
المهم رحتله وقالي طيب الصيانه الجايه هنعملهملك لان حاليا مفيش قطع غيار قولتله طيب ماشي ومشيت
وجيت اجرب العربيه حسيت اني راكب عربيه كارو مش عربيه نيسان صني كنت بحبها وبحسد نفسي عليها علشان راكبها
المهم تاني يوم دخلتها تاني توكيل والمهندسه هبه هي الي خدتها مني وبعدين طلعوها تاني وقالولي العربيه تمام جيت اجربها نفس الحوار هو هو دخلتلهم تاني يوم بردوا
وهنا بقي استلم العربيه مني المهندس اسماعيل وكان بدايه معرفتي بيه وبردوا هنا كانت بدايه معرفتي بالمهندس هاني مبارك
المهم قالولي العربيه هتبات عندنا وده كان يوم الثلاثاء وقالي هتطلع علي يوم الاحد بس ابقي كلمنا قبل ما تيجي
علشان مش نمشورك
المهم رحتلهم علي الاحد وده كان قبل العيد بيومين تقريبا
المهم خت العربيه وصادف اني انزل افريكا بارك انا واخواتي فالمهم جريت بالعربيه وجبت 180 لفتره يعني بتاع نصف ساعه متواصل
واذ بفجاه لاقيت العربيه العداد عمال يقل عن 180 لحد ما وصل ل 90 وبعدين ثبت عليه ومش راضي يزيد
ففصلت العربيه ودورتها تاني لاقيت فيها هزه جامده جدا ولا الزلزال المهم كملت بيها لحد ما روحت البيت ودخلتها تاني بقي صيانه بعد العيد
المهم وانا وقتها كنت في قمه الضيق الحقيقه ايه الي ادخل عربيتي التوكيل اكتر من 5 مرات في شهر ليه فاضي انا يعني
المهم دخلت للمهندس هاني مبارك بس اتكلمت بشده والدنيا اتقلبت حبتين
اه صحيح نسيت اقول ان اخر مره العربيه دخلت التوكيل العربيه اتخبطت كمان بجانب الحاجات الي اتكسرت فيها دي اتخبطت والمهندسه هبه جزاها الله خيرا قالتلي هتتصلح وردتهالي في وقتها وقالتلي هتتظبط خالص ان شاء الله

المهم شديت جامد جدا مع مهندس هاني ومحمد حمزاوي وهبه والسيد انور واسماعيل
وقولتلهم ادوني عربيه تاني والا بجد الدنيا هتتقلب اكتر من كده المهم خت عربيه فعلا نيسان صني مكحكحه بس اهي تمشي
المهم ختها بعد 4 ايام العربيه بتاعتي وغيرتها كوتشات وبطاريه زي ما قالولي لانهم قالولي ان الكاوتش سبب في الي بيحصل
المهم ماذل الحال كما هو
العربيه اكنها علي فيبريشن وكمان العربيه حاسسها مخنوقه كده
والاكبر من كده بقي استهلاك البنزين قمه في الغباء في العربيه دي
وبجد انا اسف اصلي تعبت من الكتابه والجهاز فصل كذا مره
فمعلشي في الاخر انجزت اصلي بجد تعبت جدا
بس بجد انا تعبت جدا ومش عارف بجد كرهت العربيه وكرهت التوكيل وكرهت مصر بحالها
واسف لو كنت اتكلمت بنرفزه حبتين
ونشوف رائكم بقي

**Rahman** · 24-09-2011 02:39 AM

دي بنسبة كبيرة ضفيرة كهرباء
وربنا معاك ان شاء الله وتتحل المشاكل كلها

**Dr.M.Mowafy** · 24-09-2011 02:48 AM

شكرا لرد حضرتك ومعلشي نسيت اكتب عملوا ايه في كل صيانه
هم غيروا الضفيره بتاعت الانجيكشن وماذال الحال كماهو عليه :d

**Elshennawy** · 24-09-2011 02:51 AM

عليك وعلى السبع
انا عندي رأي يا دكتور موافي
ان مودرن مينفعش تعمل فيه اكتر من صيانات طبيعيه او تركيب اكسسوارات
ولكن لو عندك مشكله عويصه يبقى السبع ولما تتكلم معاهم تتكلم من منطلق انك فاهم مش اي حد يقولك غير الكاوتش تغيره ...؟؟؟ وهو يعني مثلا الكاوتش ده العربيه مكانتش شغاله بيه كويس ؟؟؟
ونصيحه مالوش لازمه الزعيق ...لانك بعد ما بتزعق بتستلم العربيه في اسوأ حالاتها
ولكن خليك تقيل في ردودك وقبولك للمواقف وان شاء الله الموضوع صحيح كبير
بس حله ضفيره تو حساسات البوابه او كمبيوتر العربيه ..
وربنا يعينك

**WalidAdel** · 24-09-2011 03:17 AM

والله كان الله في عون حضرتك هاقولك ايه بس اللي واخد بالي منه انك بتتنرفز كتييييييير و ماشاء الله عديت علي كبارات التوكيل نفر نفر دا شئ في حد ذاته مش كويس لانهم مش عارفين يتفاهموا مع حضرتك
ابويا الله يمسيه بالخير كان دايما يقولي "اخد الحق حرفنه" و انت بالزعيق و الكلام ده مش هايحيب نتيجه بل بالعكس انت كده بتضيع حقك لانك هاتجيب الغلط عليك في النهايه
عموما ياباشا حاول تروح مركز السبع و ان شاء الله هما هايظبطولك الدنيا هناك اوي
و لو حابب اجي التوكيل معاك علشان مش هاتبقي عارف مكانه انا تحت امرك و نبقي علي اتصال مع احمد مصطفي و نظبط التظبيط مافيش مشاكل و اهو بالمره اتعرف عليك لاني في المقابله مالحقتش اقعد معاك في الشويه الصغيرين اللي قعدتهم

**hugan** · 24-09-2011 05:39 AM

ربنا معاك
متابع

الموضوع: نيساان ... وقصتي مع ابو رواش وصيانه 50 الف

LinkBack

أدوات الموضوع

عرض

نيساان ... وقصتي مع ابو رواش وصيانه 50 الف - انشر الموضوع فى :

-

-

-

-

-

المواضيع المتشابهه

عايز حد متخصص فى بيع وصيانه عجل الاطفال والاكسسوارات

افضل مركز خدمه وصيانه

اول تجربه ليا مع التوكيل فرع ابو رواش وصيانه 1000

برسونتي وصيانه ال1000 وتقيمي للعربيه

الحمدلله طلعت رخصتي امبارح ,,, وقصتي مع مرور عين الصيرة

الكلمات الدلالية لهذا الموضوع

المفضلات

المفضلات

ضوابط المشاركة