أيزن ،، منا اعرف أنها كده ،، بتتظبط بالمسمار ده !!
بس مش فاكر الميكانيزم بظبط ،، و مش لاقي فيديوهات على النت لشرح ظبط أي موتور فيات حتى أو أي موتور 4 سليندر !! :((
عرض للطباعة
أيزن ،، منا اعرف أنها كده ،، بتتظبط بالمسمار ده !!
بس مش فاكر الميكانيزم بظبط ،، و مش لاقي فيديوهات على النت لشرح ظبط أي موتور فيات حتى أو أي موتور 4 سليندر !! :((
حسام باشا
السلام عليكم ورحمة الله وبركاته
انا كنت مظبط تاكيهات من 7 شهور تقريبا
عربيتى
شاهين موديل 2004
كاربراتير
1400 سى سى
قالى اشترى 8 أطباق (مش واثق من العدد بالظبط)
4 نحاس و 4 ألمومنيوم
وعندى طبق منهم لحد دلوقتى ديه صورته
http://img832.imageshack.us/img832/6...1109251214.jpg
تقريبا سعرهم كان حوالى 5 أو 6 جنيه مش فاكر الصراحة
وجبت جوان تاكيهات الاصلى جلد كان بحواى 6 جنيه
قالى رجعه وهاتلى جوان فلل على كاوتش علشان ميسربش زيت بـ 4 جنيه
بس بصراحة بعد تضبيط التاكيهات محستش بفرق كبير
الصوت نعم حاجه بسيطه جدا وبس
اللى فرق معايا فعلا نظافة الماتور بعد تركيب الجوان الجديد
بقى دائما نظيف ومش محتاج يتغسل
ومفيش التراب والزيت اللى كان بيشوه منظر العربية لما بفتح الكابوت
بالنسبة للمصنعيه الميكانيكى عمل شوية شغل تانى
كان فكلى الطنابير الامامية وروحت خرطهم علشان كان بدال الفرامل بيرج فى رجلى
واشتريت تيل فرامل امامى جديد
واخد مصنعيه يومها حوالى 50 جنيه على الشغل ده
حرام 70 و 80 جنيه على التاكيهات بس !!!
أه والله أنا بلمت لما سألت الميكانيكي !!
قلت من طلع من داره أتقل مقدارة ،، انا قررت أصلاً مش حعمل حاجة غير أني أغير جوان بس ،، و حغيره بنفسي !! :)))))))
بالمرة عايز أغير جوان كارتيرة الزيت !! هل في الحالة دي لما بروح للميكانيكي ،ن بيطلعلي الموتور برا العربية ؟؟ ولا
اسمها بالانجليزى valve clearance adjustment
او valve lash
معرفش فكرة الاطباق ايه
بس انا بعرف اظبطها بنفسى في عربيتى
بس بتبقى محتاج حد معاك عشان تعشق رابع وترفع عجلة ورا ويلف العجلة وانت متابع حركة الصبابات وتقول له قدام ، ورا ، لحد ما تظبط كل الصبابات
الا لو معاك المفتاح اللى بيلف الصامولة بتاعت طمبورة الكرنك
او تكون العربية امامى فتقدر تلف العجلة وتشوف الموتور في نفس الوقت
---------
بالنسبة للظبط بقى اللى انا بعمله بالظبط في عربيتى وبتبقى زي ظبطة المصنع بالظبط
اولا بتشوف المقاسات كام في الكتالوج
يعنى مثلا انا في عربيتى
البنزين = 0.10
العادم = 0.25
يعنى بلغة الميكانيكية 10 و 25 تمام
---
طبعا هتحل غطاء التاكيهات وتفك سلوك البوجيهات الاول ان لزم الامر حسب نوع العربية
هتلاقى 8 صبابات كل 4 قدام بعض
بتوع البنزين اللى ناحية المانفولد وبتوع العادم طبعا اللى ناحية فرن الشكمان
طريقة الظبط اننا بنلف الموتور لحد ما يبقى صمام من صمامات العادم مفتوح على الاخر ( يعنى الصمام يكون نازل لجوة والسوستة مضغوطة )
ونضبط خلوص صمام بنزين وعادم تانيين
ونرجع نلف الموتور ونفتح الصمام اللى بعده ، ونظبط صمامين تانيين وهكذا
ترتيب الصمامات
صمام عادم مفتوح --- ضبط صمام بنزين --- ضبط صمام عادم
1 -------------------------- 3 ------------------ 4 ---------
3 -------------------------- 4 ------------------ 2 ---------
4 -------------------------- 2 ------------------ 1 ---------
2 -------------------------- 1 ------------------ 3 ---------
وعشان تحفظ الترتيب ده
الصفوف 1 3 4 2 اللى هو نفس ترتيب البوجيهات والاسبراتيرر المعروف
في كل صف بقى
برضه هى نفس السلسلة 1 3 4 2 بس في كل مرة بتبدأ من مكان مختلف وناقصة واحد
يعنى لو قلت انا فاتح صمام عادم 1 يبقى تظبط 3 بنزين و 4 عادم ( 1 , 3 , 4 )
ولما اقولك 3 يبقى 4 و 2
ولما اقولك 4 يبقى 2 و 1
ولما اقولك 2 نبدا السلسلة من الاول ويبقى 1 و 3
طريقة الظبط نفسها
هنفترض انك فتحت صمام 1 عادم ( العد من جهة طمبورة الكرنك او الفتيس بس يفضل من ناحية الفتيس )
طبقا للجدول اللى فوق واللى حفظاناه هنظبط صمام 3 بنزين و 4 عادم
عند صمام 3 بنزين هنلاقى دراع كدة وفي من ناحية مسمار وصامولة ومن ناحية الخلوص بين الدراع ده والصباب ، هنحط الفيلر في الخلوص ده ( مقاس 0.10 ) عشان ده صمام بنزين وعشان ده مقاس عربيتى
ونبدأ نفك الصامولة شوية
وبعدين نربط المسمار لحد ما يدوبك نقدر نسحب الفيلر من مكانه ويكون ماسك سنة صغيرة ( ما نخليش الخلوص كبير والفيلر يلعب فيه ( تاكيهات مبوشة ) او الخلوص ضيق جدا وزنق على الفيلر لدرجة اننا مش عارفين نشد الفيلر ( تاكيهات محملة ) )
وبعدين نروح على الصمام 4 عادم ونعمل نفس الحركة بس بمقاس فيلر 25
--------
كدة خلصنا 25% من الشغلانة
نحرك الموتور ونفتح الصمام عادم رقم 3 و نظبط بنزين 4 و عادم 2
ونكرر الموضوع لحد ما نخلص خالص ونقفل غطا التاكيهات
طبعا الظبط ده مش في كل العربيات
حسب نوع العربية OHV زي عربيتى
ولا SOHC ولا DOHC
في عربيات مثلا تاكيهاتها بضغط الزيت ومش محتاجة ظبط
وفي التاكيهات بالاطباق دى ما عرفش ايه ظروفها بالظبط
بس على الاقل محتاج تشوف الميكانيكى وهو بيعملها مرة واحدة على الاقل عشان تعرف تظبطها بنفسك بعد كدة
حتة نسيت اقولها بس مفهومة من السياق
ااننا بعد ما نفك الصامولة ونظبط المسمار لحد ما يدى خلوص على قد الفيلر بالظبط
بنرجع نربط الصامولة تانى طبعا
أستاااااااااااااااذ والله !!!!!!!
تسلم أيدك بجد يا عمرو باشا !!! :)))
انا عامةً موتوري sohc
طيب هي متطلبات ظبطها أيه ،، أني أحس أن العربية موتورها خشن ،، صوتأ و سحباً ؟؟
+ صوت التكتكة أياه ؟؟
ولا في أسباب تانية !!
العفو يا باشا ربنا يخليك
انا حبيت اقول خلاصة تجربتى في الموضوع
وفعلا زي مانت قلت كدة الخشونة والتكتكة ده يعنى التاكيهات مبوشة شوية
او سخونة عالية واستهلاك بنزين اكتر وسلانسيه مش مظبوط ، مع صوت موتور هادى جدا جدا ، ودى لما تكون التاكيهات محملة ، بس الحالة دى مينفعش يتسكت عليها
فانت ممكن تظبطها عند متخصص تاكيهات احسن من الميكانيكى وهيبقى عارف مقاسات عربيتك بالظبط
ولو رحت عند واحد بيفهم وعنده ضمير ان شاء الله مش هياخد اكتر من 30 جنيه
لا انا عندي العرض التاني ده ،، بس صوت الموتور عاادي جداً
عامةً أنا عندي الردياتير حغسله كمان كام يوم !! و الحساسات حغير البايظ فيها !!
لأ، عندي سخونية على المشي على الهادي !! او الجري !! + زيادة جاااامدة و ملحوظة في أكل البنزين !!!
يانهار أبيض ،، لسه حيطلع الموتور كله ؟؟؟؟
لا ،، لو كده ،، أروح اعمل الجوان ده في التوكيل أحسن !! :))) علشان وصلات الأنجيكشان و كده