ثبات العربيات موضوع للنقاش

**ramyworm** · 25-09-2011 07:05 AM

انا بلاقي حاجة غريبة اوي على المنتدى كل واحد بيحكم على ثبات العربية بطريقة غريبة جدا بمعنى ان كل واحد جاب بعربيته 180 والعربية ماتقلبتش تبقى العربية دي ثابتة . انا ليا منطق تاني خالص في الثبات وهو قدرة العربية في المناورات انا حقول على مثال من واقع خبرتي القليلة في العربيات .
انا معايا عربية فيات اونو و في قدامي عربية اسبرانزا 516 بركبها باستمرار حبدأ بوجه نظر اعضاء المنتدى بيقولو العربية الاسبيرانزا ثباتها كويس وفيها جنط 15 بيزود الثبات والعربية وزنها تقيل وناس مجرباها على سرعات عالية لغاية 180 والعربية ثابتة وعربية زي الاونو عربية خفيفة بجنط 13 ستوك بعد ال 120 تلاقي العربية بتتنطط على الطريق والعربية مش ثابتة .
انا في رأيي الشخصي ان العربية الانو اثبت من الاسبرانزا حلاقي واحد بيقولي ازاي حقوله على كام تجربة تثبت ان الاونو اثبت فعلا من الاسبرانزا .
1- انا من اسكندرية واللي من اسكندرية عارف طريق الكورنيش عامل ازاي وعارف ايه نوع الغرز اللي ممكن تتاخد فيه يعني وقت الزحمة ممكن الغرز بتاعتك من الحارة الاولى للحارة الخامسة وترود منها على ملف وتاخد عرزة تانية جوة الملف وهكذا وكل الكلام ده مثلا بيبقى على سرعة 100 وقت الزحمة الجامدة

بالنسبة للاونو ممكن اعمل كدا عادي جدا انما بالاسبرانزا بلاقي الضهر بيحدف والعجل اللي ورا بيسرخ في الارض بحس ان ضهر العربية بيروح وعاوز ياخد باقي العربية معاه وتحس احساس مقلق جدا الصراحة

2- انا ممكن بالاونو وانا داخل شارع ارفع هاند وادخل دريفت عادي جدا حتلاقي الضهر بيحدف معاك واول لما تنزل الهاند تلاقي العربية استجابت عادي تاني وماتحسش ان في مشكلة بالنسبة للاسبيرانزا جربت مرة اعمل كدا على نفس السرعة بتاعت الاونو اللي حصل كالاتي : طبعا الضهر حدف جامد جدا وكان العربية كلها بتتشفط من الضهر نزلت الهاند بسرعة لقيت وش العربية بيتشد هو كمان وانا دايس بنزين جامد عشان العربية تعدل وبعد محاولات العربية اتظبطط ودخلت مظبوط بس عملت زي التعبان وهيا داخلة حدفت في اتجاة ووانا بعدل راحت حادفة الناحية التانية .

المطلوب تفسير اللي بقوله ده عشان انا مفهوم الثبات عندي اتلخبط من ساعة لما دخلت المنتدى هنا مش عارف بقى انا اللي فاهم صح ولا فاهم غلط ؟؟

**tutankhamoun** · 25-09-2011 09:23 AM

موضوع الثبات موضوع نسبي من واحد للتاني حسب خبرته و فهمه لمعنى الثبات أصلا .

و أنا في رأيي الشخصي أن مفيش عربية هاتكون ثابتة على سرعات أعلى من 150 و تقدر تعمل بها مناورات إلا العربيات الرياضية البحتة المُصممة لذلك .

رجوعا للمثال اللي حضرتك شرحته .........
الأونو مش ثابتة خالص ......... أنا جربتها و هي عربية خفيفة و عالية عن الأرض و لو سرعتها أكتر من 100 كم هاتلاقي الهوا بيجيبها و يوديها .
حضرتك بتتكلم عن تحكم هنا ......... مش ثبات .
و أنا بصراحة مجربتش أعمل اللي أنت حكيت عنه .

بس أنا هاديك مثال تاني
الناس تقولك أنا عملت غرزة على 180 و العربية ما حدفتش مني .... (كلام مش مظبوط مع أحترامي للناس اللي بتقول كدا )
العربيات اللي أحنا بنركبها هنا مش رياضية بحتة و بالتالي كل واحدة لها قدرة على المناوة محدودة حسب تصميمها ووزنها و تصميم العفشة و التحكم العام في السيارة
و كل لما العربية قربت من الأرض ........ كل لما التحكم زاد و الثبات زاد .

و بالتالي لو جربت توصل لسرعة 160 بعربية فيرنا ........... هاتوصل للسرعة دي مفيش مشاكل
و لكن لو حاولت تعمل أي مناورة بها ........ يا هاتتقلب منك .......... يا هاتلف و تدور حوالين نفسها .

إنما لو مشيت في خط مستقيم .................... العربية زي الفل مش هاتلقب بس هاتحس أن العربية خفيفة جدا جدا
ده بس مثال على عربية من العربيات اللي تسارعها عالي و لكن ثباتها مش تمام .

====
عندي مثلا في الجين 2
العربية ثابتة و التحكم فيها عالي
و لكن أنا جربت واحدة صاحبها مغير الجنت لمقاس البروفايل بتاعه صغير قوي و قاصص السوست أو مغيرها بسوست أقصر .
الثبات أحسن من عندي (سوست الأستوك ) و بتبان على السرعات العالية و مش باينة على السرعات المنخفضة .

=====
ممكمن واحد تاني يقولك العربية دي ثابتة ......... و هو مجربش غيرها أو حاجة أقل منها و هو مش عارف أنها عربية مرجيحة على سبيل المثال لأن تجربته محدودة على اللي هو عارفه بس .

و اللي بيتحكم في موضوع الثبات
تصميم العفشة
تصميم الشاسيه
تصميم الجسم
قرب العربية من الأرض .

**strongxx** · 25-09-2011 10:02 AM

انا برضه بقول مافيش أحسن من الفيات 128...ثابته جدا علي الأرض ولو حدفت .... همه جوز بواكي يرجعوها عروسه :-))

**ramyworm** · 25-09-2011 10:02 AM

تمام اوي الكلام ده وفعلا الموضوع ده شئ نسبي ومش حيبقى فيه عربية ثابتة على السرعات العالية دي الا لو كانت رياضية .
انما مثلا انا بفكر اشتري عربية فيرنا ف بالنسبة لكلام الاعضاء وان الاسبرانزا اثبت منها وبناء على تجربتي للاسبرانزا فمعنى كدا ان الفيرنا لو طلع عيل صغير قدامي وحبيت افاديه يبقى كدة العربية حتقلب . لان الاسبرانزا انا شايفها بتحدف جامد عشان ضهرها تقيل اوي ولو على كلام الاعضاء ان الفيرنا اقل منها كتير في الثبات يبقى الفيرنا كدة باي باي .
وفي فيديو شوفته هنا من احد الاعضاء عن اللوجان وهو ماشي على 180 وقايل انه بيغرز بيها
اهو الفيديو
Logan 180 km/h with 6 Passenger [1] - YouTube

انا رأيي الشخصي ان دي ما اسمهاش غرز ده يدوب بينقل من حارة ل حارة وهل المفروض لو عربية فيرنا مكانها المفروض انها تقلب لو غيرت حارة وهيا ماشية .

ولو دي غرز تبقى دي بقى اسمها ايه
Crazy Russian street racing - YouTube

**MMamdouh** · 25-09-2011 12:24 PM

ألثبات ملوش اى علاقة بسرعة العربية فى خط مستقيم... اساسا و انت ماشى فى خط مستقيم مفيش اى قوى بتاثر على اجهزة التعليق بتاعت العربية لان جسم العربية ماشى بسرعة ثابتة فى اتجاه واحد

الثبات بيتقاس بقدرة العربية على السير فى الاتجاه اللى حددة السائق خلال المناورات... بالتالى لازم الاول يبقى عندنا "مناورة" ثم "خط سير محدد" و مع التجربة نشوف الغربية خرجت عن خط السير دة بقدار قد ايه... او بطريقة اخرى لحد سرعة كام تقدر العربية تحافظ خط السير المحدد و متخرجش عنة

للاسف فى مصر مفهوم الثبات مغلوط تماما و الناس فاكرة ان اللى يجيب 200 بعربية تبقى ثابتة.. اى علبة صفيح باربع عجلات ممكن تمشى بسرعة 200... المهم لو حودت بيها يمين فى شمال على 200 هيحصل ايه؟؟؟؟

و بالنسبة لموضوع السبرانزا و الاونو... انت كدة بتظلم السبرانزا لانها اكبر و اتقل بكتير من الاونو بالتالى مش هتبقى "رشيقة فى المناورات زى الاونو... قارن السبرانزا بعربية فى نفس الفئة بتاعتها و قارن الاونو بعربية فى نفس الفئة بتاعتها

MMamdouh

**MMamdouh** · 25-09-2011 12:37 PM

المشاركة الأصلية كتبت بواسطة ramyworm

تمام اوي الكلام ده وفعلا الموضوع ده شئ نسبي ومش حيبقى فيه عربية ثابتة على السرعات العالية دي الا لو كانت رياضية .
انما مثلا انا بفكر اشتري عربية فيرنا ف بالنسبة لكلام الاعضاء وان الاسبرانزا اثبت منها وبناء على تجربتي للاسبرانزا فمعنى كدا ان الفيرنا لو طلع عيل صغير قدامي وحبيت افاديه يبقى كدة العربية حتقلب . لان الاسبرانزا انا شايفها بتحدف جامد عشان ضهرها تقيل اوي ولو على كلام الاعضاء ان الفيرنا اقل منها كتير في الثبات يبقى الفيرنا كدة باي باي .
وفي فيديو شوفته هنا من احد الاعضاء عن اللوجان وهو ماشي على 180 وقايل انه بيغرز بيها
اهو الفيديو
Logan 180 km/h with 6 Passenger [1] - YouTube

انا رأيي الشخصي ان دي ما اسمهاش غرز ده يدوب بينقل من حارة ل حارة وهل المفروض لو عربية فيرنا مكانها المفروض انها تقلب لو غيرت حارة وهيا ماشية .

ولو دي غرز تبقى دي بقى اسمها ايه
Crazy Russian street racing - YouTube

اختبارات الثبات الرسمية ليها مقاييس محددة و الاختبار اسمة moose test و فية بيتم النقل من حارة للتانية ثم الارتداد للحارة الاساسية مرة اخرى لاختبار مدى ثبات و طواعية السيارة لرغبة السائق فى تغيير الاتجاة...

Landwind CV9 Moose Test - YouTube

Citroأ«n Nemo fails the Moose test - YouTube

Toyota Hilux fails the Moose test - YouTube

الموضوع مش عايم و كل واحد يروح ياخد الملف اللى على كيفة و يقولك انا دخلت ملف على 150... مهو ممكن الملف دة يتاخد بنفس عربيتك على 190 لو اللى راكبها واحد بيعرف يسوق... او هو اصلا مش ملف و ممكن يتاخد flat-out على 220 بسهولة

كقاعدة عامة لازم يبقى عندك معايير ثابتة للاختبار عشان تقدر تقارن بين العربيات انما كل واحد يعمل حاجة على كيفة و يعتبرها مقياس فا دة غلط

MMamdouh

**AutoTycoon** · 25-09-2011 07:53 PM

طب طالما اتكلمنا في مناورات و يمين في شمال يبقى نتكلم في ESP
هل وجود الـESP يضمنلي ان اخد الـslalom test على سرعة اكتر من 120 و ليكن بVW Scirocco ..؟
نظرياً ممكن نقول ينفع بس انا مش مقتنع..حاسس ان الإلكترونيات ليها حدود برضه

**ramyworm** · 25-09-2011 08:12 PM

المشاركة الأصلية كتبت بواسطة autotycoon

طب طالما اتكلمنا في مناورات و يمين في شمال يبقى نتكلم في esp
هل وجود الـesp يضمنلي ان اخد الـslalom test على سرعة اكتر من 120 و ليكن بvw scirocco ..؟
نظرياً ممكن نقول ينفع بس انا مش مقتنع..حاسس ان الإلكترونيات ليها حدود برضه

احنا كدة الموضوع فتح مننا جامد . يارب تلاقي حد يفيدك عن تجربة عملية

-

الموضوع: ثبات العربيات موضوع للنقاش

LinkBack

أدوات الموضوع

عرض

-

-

-

-

-

المواضيع المتشابهه

ليه العربيات الجديدة والمستعمله غالية في مصر(دعوة مفتوحة للنقاش)

النظريات البطيخيه في العربيات الصينيه ( موضوع كوميدي للنقاش حول السيارات الصينيه )

رش vs رم ؟؟؟؟ موضوع للنقاش

الجنوط : كمالية و شكل ام ثبات حقيقي ؟ ( ادخل و قل رأيك / موضوع للنقاش )

موضوع مهم للنقاش جدا

الكلمات الدلالية لهذا الموضوع

المفضلات

المفضلات

ضوابط المشاركة