المشاركة الأصلية كتبت بواسطة samer_engines
- بصراحة أنا مقتنع جدا بالاسبيرانزا و فعلا كله صينى دى للأسف حقيقة.
- و لما بتنزل تشترى قطعة غيار لاى عربية بتلاقى منها صينى ان مكنش مفيش الا هو.
- و العربية انتشرت تاكسى و ملاكى و معنى كدة انى قطع غيارها حتبقى عند البقالين قريباً و الميكانيكية و مراكز الخدمة اللى حيشتغلوا فيها حيكونوا اكتر من الهم على القلب.
- و بالنسبة لسعر اعادة البيع فمع احترامى للأخ اللى كتب عن عربية صاحبه لكن الله و اعلم كان فيها ايه و افتكر انه ممكن يكون فيها حاجة انت متعرفهاش!
و أنا شفت سعر إعادة البيع فى مواقع و جرايد كتير و اعتقد أنه عادى زيه زى اى عربية تانية بس الناس بتبص بمنظور تانى..
بمعنى أنى الهيونداى i10 مش عارف تقريبا بـ 75000 حاجة زى كدة ان مكانش اكتر و عربية بصراحة ميتدفعش فيها الرقم ده نهائى و عشان كدة سعر اعادة البيع فيها بيكون مثلاً 65000 يعنى تمن اسبيرانزا جديدة!!!!!
لكن الاسبيرانزا لانها الفول اوبشن بـ 66000 فبيكون سعر اعادة البيع مثلا حاجة و خمسين و اول ما الناس تقرا رقم خمسين تقولك سعر اعادة البيع ميت و ده لأننا بننظر بمنظور ضيق.
- و بالنسبة للجيلى دى و الفروتة بالذات اسمح لى و مع احترامى لملاكها دى مش عربية اصلاً و لا موضوعا و لا شكلا و حتى اسماً يعنى ايه جيلى و فروتة!!
- و الكورى حصل معاه نفس اللى بيحصل دلوقتى مع الصينى و كل الناس عارفة كدة و الوالد الله يرحمه كان قدامه الاكسيل و البرايد و بعد شراء اللادا بتاعتنا بكام شهر نزلت اللانوس و كانت بنفس سعر اللادا ساعتها و الكلام ده من 15 سنة و كان الوالد و الناس كلها ملهومش الا كام جملة و كانوا كالتالى:
- انا مركبش كورى ابداً أبداً.
- هو يا بنى فيه حد يركب عربية كورى!!
- دول حتى مشهورين بسوء الصناعة و التقفيل.
- هيونداى تقليد لهوندا و حتفشل.
- دايو ايه دايو دى فيديو ده و لا عربية و لا ايه؟!
- هو احنا مستغنيين عن عمرنا عشان نركب كورى ده بيقولك المقص اللى ورا بيتكسر و هى بتجرى و فيه اتنين ماتوا حتى الان من الهيونداى اكسيل الكورى و المآساة أنى الأتنين أخوات.
و غيره و غيره من اللى كان بيتقال!!!!!!!
و بعد ما الهيونداى و الكيا و الدايو سعرهم بقى فى السما بالنسبة للادا و غيرها قلنا ياريتنا كنا جبنا دايو و لا هيونداى من الأول و أدينى أهو ما زلت و الحمد لله مغروس فى اللادا و بحاول اغيرها و كل شوية تحصل لى حاجة تعطلنى.
فأعتقد أنى قرار شراء الصينى الموثوق فيه كالإسبيرانزا و البى واى دى هو أفضل قرار حالياً قبل ما يحصلوا الكورى اللى طلع و محدش عارف يلمه.
و ابقوا افتكروا الكلمتين دول لما الاسبيرانزا توصل في يوم لأسعار و مركز اليهونداى و الكيا.
و مبروك لصاحب الموضوع على الهيونداى و بصراحة عربيات حلوة فعلا و الماتركس ناس كتير بتشكر فيها بس انا ضد هيونداى من ناحية الأسعار الرهيبة و التصاميم الأوفر اللى بندغع تمنها من جيوبنا و عامة كل واحد حر و من حكم فى ماله ما ظلم.
و الف مبروك مرة تانية و ربنا يديك خيرها و يكفيك شرها.
المفضلات