غيرت فردتين كاوتش !

**zikoofire** · 26-09-2011 02:39 AM

السلام عليكم يا شباب

الحمدلله النهارده نزلت اشتريت فردتين كاوتش قدام لعربيتى ورجعت الاتنين اللى كانوا موجودين ورا .. الحقيقة انا مش عارف دا صح ولا غلط لان فى ناس بتقول لازم ال 4 مع بعض ، بس عشان الميزانية بقى وكدا ( يادى الاحراج ) ...هههههههه
المهم يعنى ، انا اشتريت يوكوهاما يابانى ، حاجة اسمه C-Drive , او اللى معناها Comfortable Drive K ، العجلة طرية اوى اوى ماشاء الله والراجل قالى انها فعلا معمولة اصلا عشان الراحة عالطريق ولكن محتاجة حرص شديد فى التعامل ، يعنى فى الركنة مثلا لو اتخبطت العجلة فى الرصيف الكاوتشة ممكن تنقطع منك ، هوا قالى كدا وخلانى كنت هارجع فى كلامى اصلا لانى دايما بحك الكاوتش فى الرصيف وانا بركن وهابقى مقلق كدا .
عاوز اخد رايكم بقى فى الحوار دا ، هل اليوكوهاما ديه ضعيفة اوى كدا يعنى ولا ايه ؟؟؟؟ اصل ديه يابانى ؟!!!!
منتظر ردودكم يا رجااالتنااااا

**Hosam_Optrawy** · 26-09-2011 05:28 PM

مبروك على الفردتين ولو انى كنت افضل تغير ال 4 بس انت بتقول ماديات مش مشكله

الحقيقه انا مجربتش اليوكوهاما لكن اسمع عنه

انت اشتريت وخلاص والراجل حذرك انه طرى

فمعلش خد بالك وربنا يسترها معاك ان شاء الله

**ahmedfra** · 26-09-2011 07:01 PM

الف مبروك .
يا ترى سعر الفردة كام ؟
و اعتقد البياع ده بيفتى فى الكلام الى قاله .

**mando_07** · 26-09-2011 07:31 PM

اليوكوهاما عجلة محترمة جدا وأنا شايفها أحسن من البريدجستون بس أهم حاجة تكون جبت ياباني على فكرة أنا عربيتي نازلة بطقم يوكوهاما وعمل 70000 كم وزي الفل

أنت جبت العجلة بكام ؟