سؤال عن الفرامل Gen 2

**monybunny** · 28-09-2011 11:48 AM

السلام عليكم
العربيه استلمتها فى ابريل اللى فات و فى صيانه ال 10000 اول الشهر دة قلتلهم فالتوكيل عن صوت الفرامل فقالولى هتحتاج تتغير و هتتكلف 1000 جنيه "الماليزى"..
سؤالى عن: هل دة عمر تيل الفرامل فعلا (عربيه مانيوال) و حاجه كمان لما شفت اسعار قطع الغيار حاسه ان الفرق كبير قوى حتى بعد اضافه الضريبه مش معقول المصنعيه تبقى اغلى من قطع الغيار؟؟ ولا دو عادى بردو
شكرا

**eng.m7md.ali** · 28-09-2011 12:24 PM

ههههههههههههههههههههههههه ههههههههههههههههههههههههه ههههههه
تيل ماليزي بالف جنيه ؟؟
حسبي الله ونعم الوكيل
ده اسوء تيل ممكن تجيبه في حياتك الماليزي ده
سيبك من الاتيال اللي في التوكيل ده وهات تيل مايلي بتاع الفيات بترا زي باقي الاعضاء

**monybunny** · 28-09-2011 02:15 PM

انا للاسف متعاملتش مع اى حد بخصوص العربيه خارج التوكيل.. ف لو تقدر تقولى اجيب تيل الفرامل منين و اركبه عند ميين ابقى شاكرة ليك جدا :)

**eng.m7md.ali** · 28-09-2011 03:49 PM

بصي حضرتك هو التيل الاصلي في التوكيل ب 800 جنيه اللي هو بوش الماني وده مع الضريبة والمصنعية ممكن يدخل في 1000 جنيه
فاكيد تقصدي ده
بس في حل بقى الاعضاء هنا شاكرين جدا اكتشفوه وهو ان في تيل اسمه مايلي بتاع فيات بترا او فيات جراند بونتو بيركب على الجين2 وكفائته حلوة شبيه بالاصلي تقريبا ب 180 جنيه او حاجة كدة وفي تيل تاني اسمه بوش بس ايطالي وده ب 350 جنيه وبرده زي الاصلي
بالنسبة للمكان اكيد لو حضرتك تعرفي شارع دمشق في مصر الجديدة هتلاقي هنا محلات جميع انواع السيارات وممكن تجيبي التيل من محل فيات
بس بالنسبة لان التيل يخلص في 10000 كم بس ده طبعا بيعتمد على طريقة السواقة لو حضرتك بتجري كتير بالعربية او بتسافري

ولو في اي حل تاني للتيل اكيد الوحوش هيفيدوكي اكتر لاني مش معايا جين2

**P_R_I_N_C_E** · 28-09-2011 06:10 PM

انا عندى التيل خلص عند 13000
بس فى التوكيل عندهم تيل ب300 وادائه كويس

**Ahmed.Ali** · 28-09-2011 06:55 PM

المشاركة الأصلية كتبت بواسطة eng f3lix

ههههههههههههههههههههههههه ههههههههههههههههههههههههه ههههههه
تيل ماليزي بالف جنيه ؟؟
حسبي الله ونعم الوكيل
ده اسوء تيل ممكن تجيبه في حياتك الماليزي ده
سيبك من الاتيال اللي في التوكيل ده وهات تيل مايلي بتاع الفيات بترا زي باقي الاعضاء

طبعا 1000 جنيه دا الالماني
بس انا شخصيا مجرب الماليزي و مش وحش خالص و حاليا مستخدم المايلي بقالي 20 الف و ماشي تمام

**abdoumahros** · 28-09-2011 10:26 PM

ممكن حضرتك تعملي زي ما انا عملت
تيل امامي مايلي الماني بتاع فيات بترا من عند محلات قطع الغيار خاصه بفيات من شارع دمشق وسعره حوالي 160 جنيه وتيل خلفي fbk ماليزي من محل مكه او المدينه سعره 150 جنيه برضه في شارع دمشق وتركبيه في عصام وصفا بحوالي 100 جنيه والتيل ماشي معايا زي الفل لحد الان حوالي 5000 كيلو بدون مشاكل خالص

**Khaled85** · 29-09-2011 12:58 AM

مبروك العربية الاول و لو انها متأخرة
فيه3 انواع من التيل في التوكيل
الالماني بحوالي 900 جنيه (الكلام ده من 3-4 شهور)
الماليزي بـ 500 جنيه
و المصري بـحوالي 300 جنيه و الماليزي و المصري كويسين بس ليهم صوت صفاره مع كل دوسة فرامل هتخليكي تكرهي تدوسي فرامل (عن تجربة مع المصري) بس انا معرفش ايه اللي برا التوكيل
و بالنسبة للمسافة اللي المفروض يقعدها التيل , زي ما الاخوة قالو انه بيتوقف على حسب طريقية سواقتك ... يعني ممكن انتي تكوني بتحبي تكبسي و بعدين تدوسي فرامل أو ممكن تكوني بتستخدمي الفرامل على سرعات عاليه (لاحظي ان العربية وزنها تقيل فمحتاجه قوه كبيرة لايقافها)

**monybunny** · 29-09-2011 10:33 AM

مبدئيا.. شكرا جزيلا لكل من رد على السؤال..
المشكله ان الفرامل هى شئ حساس فالعربيه و خايفه اغيرها بحاجه متكونش كويسه قوى خصوصا انى فعلا بسافر بيها كتير و طريقى اليومى للشغل طريق سريع
بس اسأل مجرب ولا تسأل التوكيل
ان شاء الله هجرب المايلى
شكرا مرة تانيه :)

**eng.m7md.ali** · 29-09-2011 02:22 PM

ملاحظة بس خفيفة قبل ماحضرتك تغيري التيل
تغير التيل برة التوكيل بيخرج الطنابير من الضمان + ان ضمان الطنابير تقريبا 30 الف كيلو ولو حصل اي حاجة لاقدر الله بيتم خرط الطنابير في التوكيل وليس التغيير بالكامل وده طبعا سياسة عبيطة في التوكيل ملهاش اي لازمة ومع الخرط ده بيضعف اداء الفرامل
حضرتك طبعا تختاري ان تجيبي تيل ب 1000 جنيه ويطلع كويس ان شاء الله ويريحك بس غالي او تجيبي تيل تعبان ماليزي او مصري سعره من 300 ل 500 جنيه من التوكيل وده هيبوظ الطنابير اكيد
او انك تيجي تيل من برة سواء مايلي او هالتكس الامريكي او بوش الايطالي واداء كويس ومحترم ومش غالي زي التوكيل بس هتفقدي الضمان

القرار لحضرتك طبعا ومتخليش حد يقنعك بالريمسا والاف بي كيه والكلام الفاضي ده لانهم كلهم زفت