مشورتكم يا أهل الخبرة

**Hoss88** · 29-09-2011 05:06 PM

السلام عليكم ورحمة الله
أنا محتاج مساعدتكم يا جماعة .. أنا إن شاء الله نويت على تيدا الهاتش البلس اللي فيها فتحة سقف، خصوصاً الواحد يستفيد بالتخفيض :)
بس أنا مقلق من موضوع الثبات ده .. أنا راكب لانسر بوما 1600 كاملة2006 .. هل هيقل الثبات عنها ولا لأ عشان هيا مريحاني في النقطة دي بغض النظر عن اللي بيتكلم عليها ويقول اللي يقوله..
وبالنسبة للون الطابلوه الفاتح والفرش الفاتح أخباره إيه في الجو بتاعنا النضيف قوي
ويارييييت ياريييت رجاء شخصي اللي يرد يكون من ملاك التيدا عشان معلومتك دي أمانه :))
وشكراً :))

-------------------

ان شاء الله تكتب هكذا ان شاء الله وليس إن شاء الله

مشرف القسم
1ب

**msds_eg** · 29-09-2011 06:15 PM

متابع باهتمام

**m_love4me** · 29-09-2011 07:09 PM

توكل على الله ومش هتندم

التيدا ثابته جدا جدا و بالاخص الهاتشباك
ممتاز جدا عن السيدان فى الثبات

العربيه تحفه
توكل على الله
وهتنسى للانسر تمام

**AhmdDomar** · 29-09-2011 08:46 PM

حلوه قوي

**Hoss88** · 29-09-2011 10:54 PM

يا باشا أنا مش هاسيب اللانسر دي بتاعت والدي وأنا بقارن بالنسبة ليها .. أنا كان نفسي في اللانسر الشارك بس للأسف أكبر من ميزانيتي .. والكاتيجري إاللي في نفس الرينج 135 من غير abs :(
عشان كدة بدأت أدور في الياباني طبعاً والعربي إللي لقيتها فيها أغلب المميزات وموتور محترم وتكتولوجيا أكيد أحسن من البوما واستهلاكه للبنزين أكيد أفضل .. مع عدم تقليلي ن اللانسر دي حبي الأولاني والـ cvt ده حكاية ومافيش كلام
بس بالنسبة للميزانية واللي هاخدو من العربية فالتيدا تقريباً أفضل خيار بس أنا اللي مقلقني الحاجات دي وشكراً لكل الي رد بس مستني أصحاب التيدا التانيين يباركولي الموضوع بأرائهم :))

**Hoss88** · 30-09-2011 12:23 PM

إيه يا جماعة مش معقولة مافيش رد من أصحاب التيدا إلا واحد بس .. مع إن مشاء الله يعني المواضيع الأخرى فيها اهتمام وردود تفصيلية .. لعل المانع خير :)

**Bishoy.Girgis** · 01-10-2011 02:31 AM

معلش انا مش معايا تيدا انما بصراحة هتستغرب لو قولتلك ان التيدا هاتش باك هتكون اثبت اضعاف اللانسر و انت اكيد سوقت اللانسر كتير علي الطرق السريعة و شوفت ثبات اللانسر بيبقي عامل ازاي بعد الـ 120 مش كده. و كمان تجميع الماتور معاك هتحس بفرق شاسع جدا جدا بين التيدا و اللانسر
و علي العموم ربنا يرتب ليك الصالح

**AhmdDomar** · 01-10-2011 05:22 AM

بص يا سيدي أنا كنت من إسبوعين في نفس الحيرة قعدت حوالي 6 شهور أقارن بين كل العربيات اللي موجوده في السوق مش مهم السعر بس المهم أركب عربيه كويسه وفي الآخر رسيت على عربيتين هما اللانسر والتيدا الانسر ركبتها مستريحتش لقاعدتها ولا موتورها ولكن اللي كان مخليني أفكر فيها هو إنتشارها وإن أي ميكانيكي يشتغل فيها وإنها ياباني وحاولت أبص على مراكز الصيانه بتاع الوكيل الجديد لقيت الناس بتقول تحفه بس غالي أوي أوي يعني تيل الفرامل مثلا 500 أو 550 مش فاكر والحاجات المستهلكه اللي بتتغير فى العربيه غاليه ، مكدبتش خبر ورحت على التيدا وقلت هاشتري من كلام الناس عنها بالرغم إني مركبتهاش وسألت الأستاذ أحمد مصطفى منسق قسم نيسان بالمنتدى عن الصيانه والتيل ......إلخ لقيت إن الأسعار أقل من الانسر والتوكيل أحسن والعربيه أنعم وتكنولوجيا أحدث وكماليات أكثر وسعر في المتناول لأني هاشتري مستعمل وقع الإختيارأخيرا على التيدا إشتريتها وسوقتها ومندمتش العربيه رائعه بمعنى الكلمه وأحسن من البومه بكتير أوي وبدون تحيز وأنا هاحط لك شوية مقارنات في المنتدي وبره المنتدى علشان تقارن براحتك وعلشان نكون موضوعيين ومنقولش إننا بنشكر في التيدا فقط من منطلق إننا من ملاكها

http://www............com/vb/archive...p/t-15532.html

http://www.nilemotors.net/Nile/156348-1600.html

**AhmdDomar** · 01-10-2011 05:25 AM

وبص على الموضوع ده كمان مجمع فيه كل العيوب اللي مش شرط كلها تكون في عربيه واحده واللي بعضها ممكن يكون ميزه مش عيب مع رد الناس عليها

http://www.nilemotors.net/Nile/64507-a-8.html