مبدئيا المفروض تكون الورقة إللى فيها شكاوى العميل من السيارة و إللى بتقدم شفهيا لمهندس الاستقبال تكون مطبوعة و ليست مكتوبة بخط اليد...و تكون معبرة بتفصيل أكتر..مش تكون مقتضبة...
الشروط المفروضة على العميل لصيانة السيارة بكل معنى هى عقد إذعان...تخيل إنى بأمضى إن العربية تتجرب على يد المركز و أنا إللى أتحمل مسئوليتها فى تلك الأثناء
سياسة قبول عدد معين من السيارات فى اليوم الواحد يجب أن تراعى الحفاظ على مستوى الخدمة و الإمكانيات المتاحة للمركز من حيث عدد الأفراد و المعدات و المساحة
لو ممكن إتاحة الفرصة لمهندس الاستقبال إنه يعرف بدقة أعلى تكلفة تغيير قطعة بعينها (المصنعية و السعر )...بيغالى فى البداية علشان يضمن إنك ساعة ما تدفع على الخزنة تكون عامل حسابك..و ده كويس بس ليه ما تكونش المعلومة متاحة بدقة
يكون شىء ظريف لو العميل يحصل على ticket number فور وصوله لمكان الاستقبال...مرة حصلت معايا إنى وصلت بدرى و فضلت قاعد فى العربية ظنا منى إن مهندس الاستقبال لما يوصل هايعرف مين أول عربية و مين اللى بعديها و هكذا..خصوصا إن الأسماء بتقيد فى دفتر بواسطة موظف الأمن...فجئت بإن فيه 3 عملاء قدموا بعدى و تم التعامل معاهم قبلى.....لا أفترض سوء نية..لكن أكيد فى نظام أفضل من نظام الطابور
اقتباس:
المشاركة الأصلية كتبت بواسطة gazzar91
مكان الاستراحة تحب تقول رأيك فيه إزاي؟؟؟
أرى إن الاستراحات مرضية إلى حد كبير فى معظم التوكيلات و إن كان من الممكن الاهتمام أكثر بالصيانة و الحقيقة كل المراكز التى تفتتح حديثا بتهتم بالاستراحات
اقتباس:
المشاركة الأصلية كتبت بواسطة gazzar91
لما العربية تخلص شغل و تطلع مش هتقدر تجربها و بعد كده تدفع... طيب إزاي نعرف رأيك؟؟
الدفع أولا أو أخيرا مش هى جوهر القضية بالنسبة لى....المهم لما أمشى خالص أكون مطمئن إنى مش راجع تانى....
إلا لو حاجة خاصة تستوجب التجربة لمدة و يكون الكلام ده مثبت فى شهادة الجودة بتاريخه.....
المفروض مايكونش ليا كعميل غير رأى واحد..إن المشكلة اختفت تماما....و بالتالى راضى...أمال رايح ليه التوكيل !!!
اقتباس:
المشاركة الأصلية كتبت بواسطة gazzar91
بعد ما تخرج من المكان بأسبوع كده.. تحب تلاقي حد بيتصل بيك يسألك عن مستوى الخدمة مباشرة؟؟
هى فعلا حاجة كويسة و تهم مركز الخدمة نفسه لإنها مقياس اختبار سريع و واقعى لرضاء العملاء عن الخدمة....و تعطى العميل إحساس بالاهتمام و المتابعة
اقتباس:
المشاركة الأصلية كتبت بواسطة gazzar91
تحب تقدم اقتراحات بصورة مباشرة؟؟؟
أكييد....و هناك عدة مستويات....أقلها الصندوق الخشبى " شكاوى و اقتراحات "....لكن تتنوع لوجود مسئول خدمة عملاء داخل المركز..له القدرة على التحرك و الحل السريع و ده موجود الحقيقة فى فرع توكيل رينو فى المقطم..أتمنى فعلا إن باقى التوكيلات يكون فيها نفس الكلام و على نفس المستوى و ليس أقل..لإنه فرق معايا كتير و عن تجربة..و مهمة جدا إمكانيات المسئول و شخصيته لإنه بيكون نوع من الحكم إلى حد ما بين المركز و العميل...لإن بصراحة فى عملاء عايزين أكتر من حقهم.....فضرورى المسئول فى الموقع ده يكون على خبرة متنوعة من الناحية الفنية و من ناحية العلاقات العامة
كمان ممكن من خلال فتح نافذة للتواصل online ...زى على ال facebook
و ولو إنى أميل إلى وجود مساحة مخصصة داخل موقع التوكيل أو المركز لذلك يكون بها خانات محددة لهوية السيارة
اقتباس:
المشاركة الأصلية كتبت بواسطة gazzar91
بجد نفسي أسمع آرأكم و اقتراحاتكم عليا
يا ريت لو تمت إتاحة الفرصة لمراقبة أقرب و أدق لصيانة السيارة..
