تقرير مبدئى عن استلام افيو 2012

الحمد لله ياجماعه استلمت امبارح افيو اوتوماتيك من معرض اوتو سمير ريان

سعر العربيه :

اشتراتها ب 88000 دفعت 50 % يبقى 44000 ج والمتبقى 44000 ج
تم عمل القسط على 60 شهر بقسط حوالى 1080 ج كل شهر
وتم التقسيط مع البنك الوطنى للتنميه بفايده حوالى 9.7 %

خطوات الشراء :

تم زياره المعرض واتفرجت على العربيه وصليت استخاره رغم الانتقادات الشديده للعربيه وتوكلت على الله
مليت استماره فيها بيناتى لمندوب البنك اللى موجود فى المعرض
الراجل قلى بكره هرد عليك وان شاء الله هجبلك الموافقه
فاستغربت قلتله بكره قلى اه
المهم تانى يوم فعلا واحد جيه من البنك وتم الاستعلام عنى فى البيت وتم الاتصال بيه على الموبيل للتأكد من البيانات ونوع العربيه وتم زياره مكان عملى
وفعلا الساعه 5 تانى يوم اتصل بيه مندوب البنك وقلى مبروك ياهندسه الموافقه جتلك
رحت تانى يوم البنك مليت استمارات بكل بياناتى ومضيت على الشيكات والصراحه بنك شكله غريب
بمعنى انك هتخاف اول متخش لانى طبعا متعود على cib بس الناس اللى جوه محترمه جدا جدا جدا جدا
وفى نفس يوم البنك رحت المعرض ودفعت المقدم وبعديها جت العربيه
استلمت العربيه ومضيت على اقرار الاستلام
الراجل بتاع المعرض قلى ان بعديها بيوم هيوصل الورق بتاع العربيه
وهيتصل بيه مندوب من المعرض هيجى معايا المرور نرخص
وان شاء الله لاما ارخص هقلكم على اللى حصل

التقرير المبدئى للعربيه :

المميزات :

1- العربيه عاليه عن الارض ومبيخليهاش تحك فى اى مطب تخش على المطب كده بقلب جامد :) .
2- سحب العربيه الحقيقه كويس تماما تحس ان العربيه بتجرى لوحدها كده وعايز حد يمسكها .
3- الكراسى مريحه تماما .

العيوب :

1- ابواب العربيه لازم تترزع كده عشان تقفل كويس .
2- العربيه بعد 100 كم تحس انها مش ثابته تماما اى مطب هوائى تحس انك هطير .
3- العفشه حسسها مش ناعمه اوى بس مش وحشه يعنى .
4- الدركسيون تقيل شويه .
5- العربيه بمفتاح مش بريموت ولا انزار .
6 - التكييف حاسه مش قوى انا مشغلتوش كتير بس حاسه مش جامد اوى يعنى .
( للعلم انا كان معايا النترا 2007 وبناءا على كده قلت هذه الملاحظات )

الاستفسارات :

1- هو فعلا الافيو لازم تترزع الابواب كده عشان تقفل ؟
2- هل اركب جنوط وكاوتش عريض شويه عشان ازود الثبات ولا اسيبها كده زى مهيه دلوقتى ؟
3- ممكن اركب ريموت بانزار ووحدات رفع بره ولا لازم اركبهم فى التوكيل وهل التوكيل فيه وحدات رفع
وانزار ؟
4- أول صيانه هتبقى امتى ؟
5- كيفيه تليين العربيه بطريقه سليمه ؟

ويارب اكون افيدتكم ولكل واحد مقبل على الشراء

الف مبروك علي العربية و ربنا يرزقك خيرها

عامة الأفيو والأوبترا لازم ترزع شوية الباب
ممكن تركب جنوط و كاوتش بس بعد ضمان العفشة ما ينتهي بعد 20 الف كيلو عشان ما تخرجش من الضمان

نفس القصة لكماليات الكهربا لازم تركبها فب التوكيل و الا يضيع عليك ضمان كهرباء السيارة

اول صيانة بعد اول 5000 كيلو و كل 5000 كيلو

طريقة التليين المثلي لشيفروليه:
1- عدم تشغيل التكييف في اول 1000 كيلو
2- عدم تجاوز ال 3000 ار بي ام علي اي سرعة بردوا اول 1000 كيلو
3- عدم استخدام فرامل مفاجئة حتي يطبع التيل مع الطنبورة

مبروك عليك العربيه ، ومنور قسم شيفروليه .

رزقك الله خيرها وبعد عنك شرها
واصبر شويه علي العربيه وبعدين حتعرف تقرر انت محتاج ايه بالضبط
وشكرا

التلين مرحله مهمه جدا جدا اشمي برحتك جدا جدا
تخلي الار بي ام ميزيدش عن 3 خليك تحت 3
ماتخدش بيها مشواير طويل قوي يعني مترحش شرم الشيخ ولا الاسكندريه
العربيه عمله زي الفرس ينفع تجري بفرس مترودش
المهم غير الزيت علي 1000 وغير الفلتر علشان تزل برادة الحديد او الرايش مشهتبان بالعين
وامشي بيها اقصي سرعه تجبها 100 بعد الالف وبعد كده تزود كل 5000 كيلو السرعه 20
انا لسه حارق علي العربيه وصلت الاربي ام 4 الي 5 وانا عامل 25000 كيلو
انا بحرق بشويش علي العربيه جدا جدا
لغايه متوصل للسرعه التصميميه
انا خر سرعه جبتها 150 وانا مشغل التكيف في 2 معيا في العربيه ده لسه بعتبره مرحلة تلين و تفتيح
اصبر شويه في الاول لاكن هيفرق معاك كتيررر
الناس ممكن تقول ده مبالغه بس الكلام ده علم مش من دماغي

هو انا هغير الزيت بتاع ال 1000 ده فى التوكيل يعنى

اقتباس:

---

المشاركة الأصلية كتبت بواسطة heshhesh

هو انا هغير الزيت بتاع ال 1000 ده فى التوكيل يعنى

---

زي ما قلتلك الزيت بيتغير بعد 5000 كيلو لأن الموتور جاي من كوريا متلين و بزيت نضيف

اول الف كيلو دول لنقل الحركة و العربية كلها مش الموتور و بس

شيفروليه مختلفة عن بعض الشركات في موضوع تغيير زيت الموتور

موضوع الزيت عند ال 5000 مكتوب في كتالوج العربية اللي مفروض تستلمه من التوكيل

اقتباس:

---

المشاركة الأصلية كتبت بواسطة bluemaneg

زي ما قلتلك الزيت بيتغير بعد 5000 كيلو لأن الموتور جاي من كوريا متلين و بزيت نضيف

اول الف كيلو دول لنقل الحركة و العربية كلها مش الموتور و بس

شيفروليه مختلفة عن بعض الشركات في موضوع تغيير زيت الموتور

موضوع الزيت عند ال 5000 مكتوب في كتالوج العربية اللي مفروض تستلمه من التوكيل

---

ياباشا متشكرين على المعلومات المهمه ديه ولتفاعلك معايا شكرا جدا ليك
وانا ان شاء الله هستلم الضمان والكتالوجات يوم الثلاثاء

* * * * * * * * * * * * * *

ممنوع كتابة اللغة العربية بالأحرف الانجليزية ومن لم يتوفر لدية لوحة مفاتيح أو نظام تشغيل يدعم اللغة العربية فعلية استخدام أحد المواقع التي تقوم بتحويل الأحرف الانجليزية إلى أحرف عربية

م 4أ

موضوع التليييين دة خدعة كبيييييرة .... هو يفضل فى اول 1000كيلو متكسرش ال 4 ار بى ام يعنى سرعة 120 تقريبا غير كدة تمام

تانى حاجة اتأكد من ضغط الهوا فى الكاوتش


تالت حاجة



الف مليووون مبروك ربنا يديك خيرها ومتقلقش من اى عيوب ... اى عربية حتحرمها حتحترمك حتهنها حتبهدلك !

الف مبروك يامعالي الباشا وربنا يحفظهالك ويحفظك منها
واول صيانة عند 5000 كيلو ولاتتجاوز سرعة 100 الا بعد 1000 كيلو مع عدم تشغيل التكييف
وبالتوفيق والف مبروك

اقتباس:

---

المشاركة الأصلية كتبت بواسطة ashouhdy

موضوع التليييين دة خدعة كبيييييرة .... هو يفضل فى اول 1000كيلو متكسرش ال 4 ار بى ام يعنى سرعة 120 تقريبا غير كدة تمام

تانى حاجة اتأكد من ضغط الهوا فى الكاوتش


تالت حاجة



الف مليووون مبروك ربنا يديك خيرها ومتقلقش من اى عيوب ... اى عربية حتحرمها حتحترمك حتهنها حتبهدلك !

---

+1111111

مبروك على العربيه وربنا يعينك على العفشه وفعلا العربيه بعد ال 100 مش ثابته خالص
(الكاوتش ال 14 وأرتفاع العربيه مبهدلينها الصراحه)

مبروك ربنا يباركلك فيها ويكفيك شرها

مبروك عليك وشكرا على التقرير

الف الف مبرووك وربنا يباركلك فيها ويديك خيرها ويكفيك شرها

معلش هو شكل 2012 هو برده الشكل القديم
ولا اتغيرت

الف الف مبروك و ربنا يحميهالك و يكفيك شرها

اقتباس:

---

المشاركة الأصلية كتبت بواسطة pedro732000

معلش هو شكل 2012 هو برده الشكل القديم
ولا اتغيرت

---

لا هو هو بس الزجاج بقى فاميه

الف الف مبروك يا باشا وربنا يديك خيرها ويكفيك شرها
وانا بصراحه محتار
بفكر اجيب افيو ومليون حد يقلى بلاش وكل واحد يلعب فى دماغى شويه
بس موضوعك دة شجعنى
دلوات انا محتار اجيب افيو مانول ولا اوتوماتك

اقتباس:

---

المشاركة الأصلية كتبت بواسطة flymido

الف الف مبروك يا باشا وربنا يديك خيرها ويكفيك شرها
وانا بصراحه محتار
بفكر اجيب افيو ومليون حد يقلى بلاش وكل واحد يلعب فى دماغى شويه
بس موضوعك دة شجعنى
دلوات انا محتار اجيب افيو مانول ولا اوتوماتك

---

بص يباشا بالنسبه للعربيه هيه لحد دلوقتى كويسه جدا ومفيهاش حاجه بس هيه زيرو ومش هيبان دلوقتى طبعا

انا عماتا جايبها عشان هيه عاليه عن الارض وانا كل مجيب عربيه الاقيها واطيه واى مطب يقعد يحك فى العربيه وانا بتحنق جدا من الحوار ده

لكن لو انت شاب وبتحب تغرز وكده بلاش لانها على سرعات مش ثابته الصراحه خالص

انا عماتا عندى اتنين من صحابى جايبنها واحد عامل بيها 200 الف كيلو والتانى عامل بيها 80 الف كيلو

فانت اللى تقرر بقى عايز ايه بالضبط من العربيه اللى هتشتريها

انا جبتها اوتوماتيك لان بكره حاجه اسمها مانيول خصوصا فى الزحمه

لو انت مش فارقه معاك الزحمه وكده هات المانيول طبعا عربيات صحابى منيول وسحبها احسا طبعا

ده اللى اقدر انصحك بيه وربنا يكرمك وتستقر كده :)

ممكن تبص على الموضوع ده مفيد
http://www.nilemotors.net/Nile/212403-a.html

اولا الف مبروك على العربيه وربنا يديك خيرها ويبعد عنك شرها
ثانيا انت محتاج حاجتين مهمين وبعدها هتستمتع بالعربيه دى جدا جدا
جنوط سبور نضيفه مقاس 15
وكوتش نضيف بردجستون يكون طرى والمقاس 185/55/15 والمقاس ده هتلاقى الشركه موصيه بيه هتلاقيه على استيكر بداخل درج التابلوه ابقى بص عليه عشان تتاكد
طبعا اختلاف تام فى الثبات والفرامل ان شاء الله وطبعا العفشه هتتحسن بنسبة 60% او اكثر بعد تركيب الكوتش النضيف وكل مغيرت بدرى كل محافظت على عفشة العربيه ومشهتحتاج تربطها غير كل 20 او 30 الف كيلو وبقولهالك بقلب جامد عن تجربه
معرفش موضوع تكييف الافيو اللى متجمعه فى مصر عامل ايه بس انا ركبت الشيفورليه الانوس كذا مره تاكسى واقسم بالله تكييفها كان قوى جدا جدا وتلاجه بمعنى الكلمه لو عندك التكييف ضعيف راجع التوكيل على طول
طبعا هتحس ان العربيه بتتخنق مع تشغيل التكييف ولاكن اللى بيجرو اخدو ايه
عشان تتلاشى موضوع الخنقه عليك بحاجتين
لما تغير زيت ياريت يكون شيل 10000 او زيت كاسترول دا بيخلى العربيه صاروخ
وانا بركب بوجيهات نيو اكسنت كورى اصلى من التوكيل بتاع هيونداى او موزع معتمد لغبور بجد العربيه بتتغير تماما
موضوع الرزع قولهم فى التوكيل او لو تعرف واحد بتاع كوالين عربيات برده هيظبطهالك
ولو احتجت اى مساعده كلنا فى خدمتك ونسالك الدعاء

متشكرين ياباشا على المعلومات الجامده ديه

بس ليه كام استفسار بقى

1- هو انا لو غيرت الجنوط والكاوتش مش هخرج من ضمان العافشه كده ؟؟

2- لو احتجت انى اركب حساسات ركن هطلع برده من الضمان ؟؟

3- انا عربيتى اوتوماتيك عندى مفتاحين مش فاهمهم Shift lock & Hold ممكن حد يقلى وظيفتهم أيه ؟

اصلا على حسب علمى العفشه ضمانها 20 الف كيلو يعنى اعتقد انك تجبهم بسرعه وكمان يعنى لو مساعد ضرب من عيب صناعه هيغيرولك المساعد وكمان متقلقش ان شاء الله انت بس حاول متكلش مطبات جامد ولا تهبد العربيه فى حتت مكسره وان شاء الله العربيه هتعيش معاك فمتقلقش

الهولد بيخليك تقرص على النقله عشان لو عايز تشد ونصيحه متلعبش خالص فى زراير الفتيس الاتوماتيك عشان يعيش وفتيس الافيو الاتوماتيك محترم ومحدش اشتكى منه حتى الان

الحساسات الركن هتخليك تلعب فى الكهرباء وهتخرج من ضمان الكهرباء يبقى لو ضرورى قوى اصبر لحد متخلص ضمانك وابقى ركب اللى انت عايزه

والله المستعان

اقتباس:

---

المشاركة الأصلية كتبت بواسطة memo823000

اصلا على حسب علمى العفشه ضمانها 20 الف كيلو يعنى اعتقد انك تجبهم بسرعه وكمان يعنى لو مساعد ضرب من عيب صناعه هيغيرولك المساعد وكمان متقلقش ان شاء الله انت بس حاول متكلش مطبات جامد ولا تهبد العربيه فى حتت مكسره وان شاء الله العربيه هتعيش معاك فمتقلقش

الهولد بيخليك تقرص على النقله عشان لو عايز تشد ونصيحه متلعبش خالص فى زراير الفتيس الاتوماتيك عشان يعيش وفتيس الافيو الاتوماتيك محترم ومحدش اشتكى منه حتى الان

الحساسات الركن هتخليك تلعب فى الكهرباء وهتخرج من ضمان الكهرباء يبقى لو ضرورى قوى اصبر لحد متخلص ضمانك وابقى ركب اللى انت عايزه

والله المستعان

---

متشكرين ياباشا على كل النصايح الغاليه ديه

انا فعلا جبت جنوط 15 وكوتش وفرق معااااايااا تماما بالزات الثبات والفرامل والعربيه فعلا بقيت ناعمه ربنا يكرمك بجد على نصحيتك

ليه استفسار بس هو اول صيانه بعد 5000 كيلو صح ؟

اعمل الصيانات فى التوكيل ولا اعملها بره لانى سمعت ناس كتير اشتكت من التوكيل ؟

وبعدين العربيه وهيه طالعه مطب او نازله منه اى مرتفع يعنى بيخلى العربيه تترفع من حته وحته لا بسمع صوت تززيييق فى العفشه من وراه ده طبيعى ده ولا ايه ؟

انا بمشى بالعربيه للاسف فى الصحراء كتير لانى مهندس مدنى فى مواقع
العربيه بتتوسخ منى تراب كتير هل يفضل اغسلها كل اسبوع ولا ده غلط عليها ؟

انا عايز اركب انزار ووحدات رفع اركبهم فى التوكيل ولا ايه واجيبهم من بره وبعدين اركبهم فى التوكيل ولا ممكن اجيبهم من التوكيل نفسه ؟

وشكرا ياباشا على كل مساعدتك ليه

اقتباس:

---

المشاركة الأصلية كتبت بواسطة heshhesh

متشكرين ياباشا على كل النصايح الغاليه ديه

انا فعلا جبت جنوط 15 وكوتش وفرق معااااايااا تماما بالزات الثبات والفرامل والعربيه فعلا بقيت ناعمه ربنا يكرمك بجد على نصحيتك

ليه استفسار بس هو اول صيانه بعد 5000 كيلو صح ؟

اعمل الصيانات فى التوكيل ولا اعملها بره لانى سمعت ناس كتير اشتكت من التوكيل ؟

وبعدين العربيه وهيه طالعه مطب او نازله منه اى مرتفع يعنى بيخلى العربيه تترفع من حته وحته لا بسمع صوت تززيييق فى العفشه من وراه ده طبيعى ده ولا ايه ؟

انا بمشى بالعربيه للاسف فى الصحراء كتير لانى مهندس مدنى فى مواقع
العربيه بتتوسخ منى تراب كتير هل يفضل اغسلها كل اسبوع ولا ده غلط عليها ؟

انا عايز اركب انزار ووحدات رفع اركبهم فى التوكيل ولا ايه واجيبهم من بره وبعدين اركبهم فى التوكيل ولا ممكن اجيبهم من التوكيل نفسه ؟

وشكرا ياباشا على كل مساعدتك ليه

---

يافندم العفو انا بس طالب دعائك مش اكتر وربنا يكرمنا جميعا ويبعد عننا المشاكل يارب

ممكن اعرف مقاس الكوتش كام بالظبط يعنى هل هو 185/55/15 ولا اييييييه؟؟

الصيانه كل 5000 كيلو ان شاء الله وهتبقى الصيانات من غير تير الزيت ولا فلتر الزيت

(بالنسبه لتغيير الزيت يفضل تحط زيت شيل الترا 10000 كيلو ودا ممكن تشتريه دلوقتى ومعاه الفلتر من اى محل قطع غيار (انت بس قله فلتر فلتر الافيو الاصلى بتاع جنيرال موتورز فى حدود 35 جنيه) وتاخد الزيت والفلتر وتروح بنزينه محترمه وقلهم غيرولى الزيت دلوقتى وطبعا بفكرك موتور الافيو بياخد 3.5 لتر فقط مش الجركن كله وطبعا وظبط ورقه صغيره وسجل فيها انت حطيت الزيت على كام كيلو بالظبط وبعدين ابقى زود عليهم 9 الاف كيلو وبكدا تعرف انت ان شاء الله هتنزله امتى عشان تبقى فى المضمون

موضوع صيانة التوكيل حظوظ يعنى انا مثلا كان حظى سيىء جدا جدا مع التوكيل عشان كدا انا صينت ال 5000 كيلو وال 10000 وبصراحه السيرفس والوقت فى منصور الصحراى كانت وحشه قوى عشان كدا انا بصين العربيه مع واحد بره

مثلا الاستاذ حسام اوبتراوى بيصين عربيتهالاوبترا فى نفس التوكيل وبصراحه مريحينه جدا ومفيش اى مشكله معاه

فاانا راى جرب وروح التوكيل صين عربيتك هناك وبعدين احكلنا على اللى حصل بالظبط وساعتها نفكر مع بعض ومع الناس ذات الخبره ان كنت تكمل فى التوكيل ولا لا (عشان الضمااااان) انا خايف عليه لحسن يحصل عيب صناعه ولا حاجه (فهمنى)

طبعا فى ناس بتعمل حاجات مختلفه خالص غير اللى قولت عليها وبرده مظبوط وانت مع مرور الوقت هتاخد الخبره وتلاقى نفسك عارف انت هتعمل ايه

والله المستعان

معلش ياباشا يعنى اانا اغير الزيت دلوقتى انا عامل 1400 كيلو ولا لاما اتم ال 10000 وشكرا ياباشا على الافاده

اه والمقاس هو اللى حضرتك كتبته 185/55/15 هو ده اللى جبته فعلا

اقتباس:

---

المشاركة الأصلية كتبت بواسطة heshhesh

معلش ياباشا يعنى اانا اغير الزيت دلوقتى انا عامل 1400 كيلو ولا لاما اتم ال 10000 وشكرا ياباشا على الافاده

اه والمقاس هو اللى حضرتك كتبته 185/55/15 هو ده اللى جبته فعلا

---

لا طبعا
التوكيل بيقول يتغير الزيت ابتدائا من 5000 كيلو وتبتدى تحط الزيت الشيل ال 10 الاف كيلو اللى قولتلك عليه يعنى جدولك فى تغيير الزيت كالاتى
طبعا من استلام الزيرو يعنى من 0 الى 5000 كيلو ودا زيت المصنع
بعد كدا يتغير وتحط الزيت الجديد من شيل من 5000 الى 15000
وبعد كدا زيت جديد من 15000 الى 25 الف ............ وهكذا

بس انا بعمل ايه بنزل الزيت قبل معاده بشويه صغيره اعتبار الزحمه والوقفه وهى دايره والحرق وهكذا
فاول ملاقى الموتور بدا يخشن والسحب بقى تعبان وضوت الموتور بقى عالى بنزل الزيت على طول واحط غيره وابتدى انزله وهو عامل 7 الاف او 8 الاف او 9 الاف كيلو على حسب حالة الموتور وحرق الزيت لاكن عمرى مخليته يكمل ل 10 الاف ابدا

معلش هو مقاس الكوتش اللى انت اشتريته 185/55/15 نوعه ايه وبكام الفرده وجبته منين

نوع الكاوتش ياباشا كومهو كورى وسعر الفرده 400 وسعر الجنط الواحد 450 وديه جنوط سبور شكلها حلو جدا هبقى اصورلك العربيه ان شاء الله

سؤال بقى كمان هو انا لو جبت الانزار وروحت بيه التوكيل فى صيانه ال 5000 يركبوه ولا ايه ؟

وبالنسبه لتغيير الزييت هو فعلا التوكيل مبيغيرهوش وانا اللى بغيره بره ؟

اقتباس:

---

المشاركة الأصلية كتبت بواسطة heshhesh

نوع الكاوتش ياباشا كومهو كورى وسعر الفرده 400 وسعر الجنط الواحد 450 وديه جنوط سبور شكلها حلو جدا هبقى اصورلك العربيه ان شاء الله

سؤال بقى كمان هو انا لو جبت الانزار وروحت بيه التوكيل فى صيانه ال 5000 يركبوه ولا ايه ؟

وبالنسبه لتغيير الزييت هو فعلا التوكيل مبيغيرهوش وانا اللى بغيره بره ؟

---

مبروك عليك الكوتش والجنوط وربنا يباركلك فى العربيه
بس ياريت شوية صور لان انت الوحيد اللى معاك افيو سيدان وركبت المقاس 185/55/15 فاعيز اشوف شكله على العربيه

بالنسبه للانظار انا راى تروح الصيانه وتسال الاول افضل

طبعا التوكيل بيعرف يغير وكل حاجه بس بيحط زيت موبيل وزيت موبيل جودته وحشه و معنديش فكره ان كان بيرضى انك تشترى الزيت من بره وهما يحطوهولك ولا لا بس ممكن تجيب رقم منصور ال 5 ارقام وتتصل بيه وتسال

والله المستعان